មន្ត្រីវប្បធម៌មកពីប្រទេសអាស៊ានទាំង១០ បានជួបពិភាក្សាក្នុងសិក្ខាសាលាពេញមួយថ្ងៃជាមួយនឹងមន្ត្រីផ្នែកវប្បធម៌របស់ប្រទេសចិន នៅថ្ងៃអង្គារ ទី២៧ ខែធ្នូ ដើម្បីបង្ហាញអំពីវប្បធម៌ផ្សេងៗគ្នាក្នុងបំណងតភ្ជាប់វប្បធម៌ទាំងនោះនៅក្នុងតំបន់។
សិក្ខាសាលាក្រោមប្រធានបទ «អាស៊ាន-ចិន រួមគ្នាសម្ដែងវប្បធម៌ដើម្បីការតភ្ជាប់» នេះ គឺធ្វើឡើងនៅមុនពេលដែលប្រទេសទាំង១១ គ្រោងនឹងសម្ដែងសិល្បៈរួមគ្នានៅឯបរិវេណប្រាសាទបាយ័ន ខេត្តសៀមរាប នៅរាត្រីថ្ងៃទី២៨ ខែធ្នូ។
រដ្ឋលេខាធិការក្រសួងការបរទេសខ្មែរ ដែលអញ្ជើញចូលរួមជាអធិបតីក្នុងសិក្ខាសាលានោះ គឺអ្នកស្រី សឿង រ័ត្នចាវី មានប្រសាសន៍ក្នុងបទសម្ភាសន៍ជាមួយអ្នកសារព័ត៌មាននៅព្រឹកថ្ងៃអង្គារ ទី២៧ ខែធ្នូ ថា ប្រទេសកម្ពុជា បានដើរតួនាទីយ៉ាងសំខាន់ក្នុងការជួយជំរុញ និងពង្រឹងទំនាក់ទំនងរវាងបណ្ដាប្រទេសអាស៊ាន និងចិន ពីព្រោះទំនាក់ទំនងនេះវាមានថាមពល និងសក្ដានុពលធំធេងជាច្រើនវិស័យ ទាំងផ្នែកនយោបាយ សេដ្ឋកិច្ច និងទេសចរណ៍ ជាដើម។
អ្នកស្រី សឿង រ័ត្នចាវី បញ្ជាក់ថា ការរៀបចំព្រឹត្តិការណ៍សម្ដែងសិល្បៈរួមគ្នាអាស៊ាន-ចិន ពេលនេះទៀតសោត គឺក្នុងបំណងដើម្បីរំឭកខួប ២៥ឆ្នាំនៃទំនាក់ទំនងដៃគូសន្ទនាអាស៊ាន-ចិន ផង និងបង្កើនទំនាក់ទំនងរវាងយុវជនចិន និងអាស៊ានផង។ អ្នកស្រីយល់ថា ព្រឹត្តិការណ៍នេះគឺមានសារសំខាន់យ៉ាងខ្លាំងសម្រាប់បណ្ដាប្រទេសអាស៊ាន និងចិន៖ « ជាគំនិតផ្ដួចផ្ដើមរបស់អាស៊ានផង របស់កម្ពុជា និងចិន ផង ក្នុងការផ្សារភ្ជាប់តំបន់ ហើយការផ្សារភ្ជាប់តំបន់ហ្នឹង គឺវាមានច្រើនវិស័យ ទាំងហេដ្ឋារចនាសម្ព័ន្ធ ផ្នែកធនធានមនុស្ស តាមរយៈអប់រំ និងទេសចរណ៍ ជាដើម »។
ចាប់ពីពេលនេះតទៅអនាគត ប្រទេសចិន មានគោលបំណងតភ្ជាប់ជាមួយបណ្ដាប្រទេសអាស៊ានលើគ្រប់វិស័យទាំងអស់ គឺវិស័យមួយ ទំនាក់ទំនងមួយ។
ទីប្រឹក្សាកុងស៊ុលរបស់ក្រសួងការបរទេសចិន ប្រចាំតំបន់អាស៊ី លោក វ៉ាង គួពីង (Wang Guo Ping) ថ្លែងថា ការភ្ជាប់ទំនាក់ទំនងជាដៃគូសន្ទនារវាងចិន និងប្រទេសអាស៊ាន គឺពិតជាមានសារសំខាន់ខ្លាំងណាស់ ដែលអាចនឹងនាំឲ្យបណ្ដាប្រទេសអាស៊ានជាមួយចិន កាន់តែខិតជិតគ្នាឡើងៗ៖ « វប្បធម៌នៃការជួបជជែក ការទំនាក់ទំនង ហើយនិងដៃគូជាមួយគ្នា គឺវាពិតជាអាចបង្កើតឲ្យមានការជឿទុកចិត្តលើគ្នា ការយល់ពីគ្នាទៅវិញទៅមក ព្រមទាំងអាចនាំមកនូវផលចំណេញជាច្រើនសម្រាប់ប្រជាជន និងប្រជាជន ដែលរស់នៅក្នុងតំបន់ទាំងមូល »។
នៅថ្ងៃរាត្រីថ្ងៃទី២៨ ខែធ្នូ បណ្ដាប្រទេសអាស៊ានទាំង១០ និងចិន មានគម្រោងនឹងសម្ដែងសិល្បៈរួមគ្នានៅប្រាសាទបាយ័ន នៃបរិវេណអង្គរធំ។
អគ្គនាយកបច្ចេកទេសផ្នែកវប្បធម៌របស់ក្រសួងវប្បធម៌ និងវិចិត្រសិល្បៈខ្មែរ លោក ហាប់ ទូច មានប្រសាសន៍ថា នោះជាពេលវេលាមួយដែលនឹងបង្ហាញឲ្យឃើញនូវភាពសម្បូរបែប នៃវប្បធម៌ក្នុងតំបន់ទៅកាន់ពិភពលោក ហើយក៏ជាឱកាសមួយ នឹងផ្ដល់ឲ្យយុវជនអាស៊ាន និងចិន បានស្គាល់គ្នាសម្រាប់ផ្លាស់ប្ដូរបទពិសោធន៍ និងចំណេះដឹង។
លោក ហាប់ ទូច យល់ថា នេះជារឿងដ៏សំខាន់ បើសិនជាយុវជនអាស៊ាន-ចិន បានជួបគ្នា ហើយយល់គ្នា គឺអាស៊ាន និងចិន ប្រាកដជារស់នៅដោយសន្តិភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។