នៅថ្ងៃធ្វើមហាបាតុកម្មអហិង្សាដំបូងរបស់គណបក្សសង្គ្រោះជាតិ គឺនៅថ្ងៃទី១៥ កញ្ញា នេះដែរ មានអព្ភូតហេតុមួយកើតឡើង គឺមានថ្ងៃបាំងឆត្រពីលើក្រុមបាតុករ ធ្វើឲ្យមេដឹកនាំបក្សសង្គ្រោះជាតិ ដែលកំពុងថ្លែងសារនយោបាយភ្ញាក់ផ្អើល ហើយបានប្រកាសក្នុងជំនឿថា នេះជាសញ្ញាជ័យជម្នះ ព្រោះថា គេកម្រឃើញមានថ្ងៃបាំងឆត្រដូច្នេះណាស់។ ផ្ទុយទៅវិញ អ្នកគាំទ្របក្សសង្គ្រោះជាតិមួយចំនួន ជាពិសេសមនុស្សវ័យចាស់ៗជឿថា នេះជាសញ្ញាមិនល្អចំពោះអនាគតប្រទេសជាតិ ជាពិសេសចំពោះក្រុមគ្រួសារព្រះរាជវង្ស។
ក្រុមបាតុករម្នាក់ៗ នាំគ្នាសម្លឹងមើលព្រះអាទិត្យបាំងឆត្រនៅលើមេឃ ហើយនាំគ្នាស្រែកហោរក្នុងទឹកមុខញញឹមស្ទើរគ្រប់ៗគ្នា ក្នុងពេលមេដឹកនាំបក្សសង្គ្រោះជាតិ ដែលកំពុងឈរត្រៀបត្រានៅលើឆាកប្រកាសថា ព្រះអាទិត្យបាំងឆត្រនេះ មានន័យថា មានបារមី មហិទ្ធិឫទ្ធិ ផ្ដល់ជោគជ័យដល់បក្សសង្គ្រោះជាតិ ដែលកំពុងតវ៉ាជំទាស់នឹងលទ្ធផលបោះឆ្នោត។
ក៏ប៉ុន្តែនៅខាងក្រោមឆាកវិញ អ្នកគាំទ្រខ្លះយល់ស្រប ខ្លះយល់ឃើញថា នេះជាប្រផ្នូលមិនល្អទេចំពោះវាសនាប្រទេសជាតិសព្វថ្ងៃ៖ «ចាស់បុរាណពីដើម តាមម្ដាយឪពុកខ្ញុំថា អ្នកមានបុណ្យ កាលបើយើងមានបញ្ហាអី អ្នកមានបុណ្យងើបមកជួយហើយ»។
ចំណែកអ្នកគាំទ្រដទៃទៀតក៏បានអះអាងថា គេក៏ធ្លាប់ឮដូនតាតំណាលរឿងប្រផ្នូលអំពីព្រះអាទិត្យបាំងឆត្រនេះដែរ។
បាតុករមកពីភ្នំពេញ កញ្ញា ភួង ពីសី បានឆ្លើយថា កាលណាព្រះអាទិត្យបាំងឆត្រ ដែលកញ្ញាហៅថា ព្រះអាទិត្យបាំងក្លស់នេះ កើតឡើង គឺជាប្រផ្នូលមិនល្អចំពោះវាសនាប្រទេសជាតិ៖ «គេថាពេលព្រះអាទិត្យបាំងក្លស់អ៊ីចឹង ស្ដេចកើតទុក្ខ ពិបាកចិត្ត»។
រឿងរ៉ាវអប្បិយជំនឿរបស់ប្រជាពលរដ្ឋខ្មែរចំពោះអព្ភូតហេតុធម្មជាតិភ្ជាប់ទៅរឿងនយោបាយនេះ បានកើតឡើងយូរលង់មកហើយ។
សព្វថ្ងៃនេះអប្បិយជំនឿនេះក៏នៅតែស្ថិតនៅក្នុងបេះដូងខ្មែរភាគច្រើនដដែល។ បើទោះបីជាអ្នកវិទ្យាសាស្ត្រនយោបាយសម័យទំនើបបកស្រាយថា រឿងអប្បិយជំនឿចំពោះអព្ភូតហេតុធម្មជាតិភ្ជាប់ទៅរឿងនយោបាយនេះជារឿងគួរឲ្យអស់សំណើចនិងហួសសម័យយ៉ាងណាក្ដី។
ក៏ប៉ុន្តែប្រជាពលរដ្ឋខ្មែរភាគច្រើនដែលជឿលើអប្បិយជំនឿនៅតែជឿស៊ុបដដែល។ រឿងរ៉ាវជឿលើបារមីព្រះអាទិត្យបាំងឆត្រលើកជោគវាសនាអនាគតប្រទេសជាតិជារឿងមួយ។ ក៏ប៉ុន្តែជំនឿលើផ្កាយដុះកន្ទុយ គឺជារឿងមួយទៀតដែលប្រជាពលរដ្ឋខ្មែរភាគច្រើននៅជឿស៊ុបនៅឡើយ។ ជាក់ស្ដែងដូចក្រុមបាតុករដែលកំពុងធ្វើបាតុកម្មនៅទីលានប្រជាធិបតេយ្យនេះ អះអាងថា ពួកគាត់បានរំលឹកមេរៀនប្រវត្តិសាស្ត្រខ្លះៗ ដែលបានកើតឡើងកន្លងមក ដែលពួកគាត់ផ្ទាល់បានរស់នៅ ឆ្លងកាត់ស្រាប់ ហើយបានរំលឹកបទពិសោធន៍របស់គាត់ផ្ទាល់ធ្លាប់ឆ្លងកាត់ក្នុងទសវត្សឆ្នាំ១៩៥០ ទសវត្សឆ្នាំ១៩៦០ បន្ទាប់មកឆ្នាំ១៩៨០ ជាដើម។
និយាយពីរឿងជំនឿនេះ ធ្វើឲ្យក្រុមបាតុករខ្លះបាននឹកឃើញរឿងប្រវត្តិសាស្ត្រវែងឆ្ងាយបន្តិចទៅទៀត នោះគឺពួកគាត់បានរំលឹកអំពីរឿងជំនឿលើពុទ្ធទំនាយដែលប្រជាពលរដ្ឋខ្មែរមានវ័យជាង ៥០ឆ្នាំនៅចងចាំនៅឡើយ។ រឿងពុទ្ធទំនាយនេះបានកើតឡើងក្នុងជំនាន់ទសវត្សឆ្នាំ១៩៦០ ដល់ទសវត្សឆ្នាំ១៩៨០ ក្នុងពេលប្រទេសកម្ពុជា ធ្លាក់ចូលភ្នក់ភ្លើងសង្គ្រាម។
បាតុករវ័យចំណាស់លោក គីង សំណាង មកពីខេត្តព្រៃវែង កំពុងជ្រកម្លប់ជាមួយក្រុមបាតុករដទៃទៀត ក្បែរទីលានប្រជាធិបតេយ្យរំលឹករឿងអព្ភូតហេតុនេះ។
តែទោះយ៉ាងណា ក៏មានក្រុមបាតុករផ្សេងទៀតបង្ហាញអាកប្បកិរិយាជំទាស់ និងអស់សំណើចនៅពេលឮក្រុមបាតុករនិយាយអំពីរឿងអបិយជំនឿនេះ។ ពួកគាត់យល់ឃើញថា ជារឿងមិនសមហេតុផល ព្រោះថា រឿងព្រះអាទិត្យបាំងឆត្រនៅលើមេឃឯនោះ មិនមានអីទាក់ទងរឿងធ្វើបាតុកម្មនៅលើដីអ្វីទេ។
ត្រឡប់ទៅរឿងជំនឿលើប្រផ្នូលនៃព្រះអាទិត្យបាំងឆត្រវិញ។ នៅពេលដែលសួរថា តើប្រផ្នូលនៃព្រះអាទិត្យបាំងឆត្រនឹងអាចធ្វើឲ្យប្រទេសកើតសង្គ្រាមដូចពេលមុនៗដែរទេ។ ក្រុមបាតុករភាគច្រើនជ្រួញចិញ្ចើម សើចញឹមៗ ខ្លះគ្រវីក្បាលគ្មានចម្លើយ។ ក៏ប៉ុន្តែពួកគាត់បានពោលថា បើនិយាយអំពីជំនឿអំពីប្រផ្នូលថា ព្រះអាទិត្យបាំងឆត្រធ្វើឲ្យព្រះមហាក្សត្រពិបាកចិត្តវាហាក់ដូចជាគួរឲ្យជឿ ព្រោះថា វាហាក់ដូចជាស៊ីទៅនឹងព្រឹត្តិការណ៍នយោបាយបច្ចុប្បន្ន ព្រោះថា ព្រះមហាក្សត្រអាចពិបាកព្រះហឫទ័យនៅពេលនេះ ព្រោះប្រទេសជាតិមានបញ្ហានយោបាយជាប់គាំង។
ដោយបានលើកជាឧទាហរណ៍ថា កាលពីថ្ងៃទី១៤ កញ្ញា នេះ ព្រះមហាក្សត្រព្រះករុណាព្រះបាទសម្ដេច ព្រះបរមនាថ នរោត្តម សីហមុនី បានកោះហៅមេដឹកនាំបក្សទាំងពីរ គឺបក្សសង្គ្រោះជាតិ និងបក្សប្រជាជនចូលគាល់ព្រះអង្គក្នុងរាជវាំងដើម្បីដោះស្រាយបញ្ហានយោបាយជាប់គាំង តែការដោះស្រាយនោះមិនបានសម្រេច។ ដូច្នេះជំនឿដែលថា ព្រះអាទិត្យបាំងឆត្រធ្វើឲ្យព្រះមហាក្សត្រពិបាកចិត្តអាចត្រូវ។ តែត្រង់ប្រផ្នូលថា ប្រទេសកម្ពុជា អាចមានសង្គ្រាម ទំនងដូចជាមិនសម។ មិនសមនោះព្រោះថា គេមិនឃើញមានផ្កាយដុះកន្ទុយដូចសម័យមុនៗ។ ម្យ៉ាងវិញទៀត គឺបក្សសង្គ្រោះជាតិ មិនមានអាវុធតតាំងជាមួយបក្សកាន់អំណាច ចំណែកព្រៃឈើក៏គេកាប់បំផ្លាញអស់ហើយដែរ បើទោះជាបក្សសង្គ្រោះជាតិ ចង់ចូលព្រៃតស៊ូ ដូចជំនាន់ខ្មែរក្រហមក៏ទៅមិនរួចដែរ ព្រោះព្រៃឈើនៅគ្រប់ទិសទី គេកាប់វាលអស់ហើយ គ្មានព្រៃជ្រកតស៊ូដូចមុនទៀតទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។