សារមន្ទីរញីវយ៉ក (New York’s Metropolitan Museum of Art) បានដាក់តាំងបដិមាទាំងពីរជារូបឆ្មាំលុតជង្គង់នោះ ក្នុងអគារផ្នែកវត្ថុបុរាណអាស៊ី អស់រយៈពេល ២០ឆ្នាំមកហើយ។
មន្ត្រីក្រសួងវប្បធម៌កម្ពុជា ចាត់ទុកថា ការសងរូបបដិមាទាំងពីរនេះមកកម្ពុជាវិញ ជាព្រឹត្តិការណ៍ប្រវត្តិសាស្ត្រសម្រាប់កម្ពុជា។ មន្ត្រីដដែលសង្ឃឹមថា ប្រទេសដទៃទៀត ដែលមានវត្ថុបុរាណខ្មែរដែលត្រូវបានលួច នឹងអាចសងមកកម្ពុជា វិញដែរ។
រូបបដិមាទាំងពីរត្រូវបានលួចកាលពីទសវត្សឆ្នាំ១៩៧០ ចេញពីប្រាសាទកោះកែរ មានចម្ងាយប្រមាណ ៨០គីឡូម៉ែត្រ ពីប្រាសាទអង្គរ នៅពេលដែលប្រទេសកម្ពុជា កំពុងមានវិបត្តិសង្គ្រាមស៊ីវិល។ រូបបដិមាទាំងពីរត្រូវបានផ្ដល់ឲ្យមួយម្តងៗ ទៅឲ្យសារមន្ទីរ កាលពីចុងទសវត្សឆ្នាំ១៩៨០ និង១៩៩០។
រូបបដិមាទាំងពីរនឹងត្រូវដាក់តាំងនៅវិមានសន្តិភាព ក្នុងកិច្ចប្រជុំគណៈកម្មាធិការបេតិកភណ្ឌពិភពលោកលើកទី៣៧ ដែលនឹងចាប់ផ្ដើមនៅថ្ងៃអាទិត្យ ចុងសប្ដាហ៍នេះ។ បន្ទាប់ពីកិច្ចប្រជុំរូបបដិមាទាំងពីរនឹងត្រូវដាក់តាំងនៅសារមន្ទីរមួយនៅខេត្តសៀម រាប។
បច្ចុប្បន្ននៅសល់រូបបដិមាមួយផ្សេងទៀត ដែលមានប្រវត្តិមកពីប្រាសាទកោះកែ ដូចគ្នានេះដែរ កំពុងគ្រប់គ្រងដោយក្រុមហ៊ុនដេញថ្លៃមួយឈ្មោះ សុថធេប៊ី (Sotheby) នៅបុរីញីវយ៉ក។
រដ្ឋាភិបាលកម្ពុជា និងសហរដ្ឋអាមេរិក បានទាមទារបដិមានេះ ប៉ុន្តែក្រុមហ៊ុន សុថធេប៊ី បដិសេធមិនសងកម្ពុជា។ បដិមានោះត្រូវបានដាក់លក់ក្នុងតម្លៃប្រមាណពី ២ ទៅ ៣ លានដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។