ពលរដ្ឋខ្មែរនៅឯនាយសមុទ្រ បានបួងសួងដល់ទេវតាឆ្នាំថ្មី គឺឆ្នាំមមែ សូមនាំសុខសន្តិភាព សេរីភាព និងប្រជាធិបតេយ្យពិតប្រាកដជូនដល់ពលរដ្ឋខ្មែរក្នុងប្រទេសកម្ពុជា។
ពលរដ្ឋខ្មែរនៅក្នុងទ្វីបអាមេរិកខាងជើង ថ្លែងដូចៗគ្នាថា អ្វីដែលពួកគេចង់ឃើញនោះ គឺការរីកចម្រើនពិតប្រាកដប្រកបដោយសិទ្ធិសេរីភាព និងសន្តិភាពសម្រាប់ពលរដ្ឋខ្មែរក្នុងប្រទេសកម្ពុជា។ ពួកគេបានបួងសួងដល់ទេវតាឆ្នាំថ្មីឆ្នាំមមែ នេះ ព្រមទាំងវត្ថុសក្ដិសិទ្ធិទាំងឡាយនាំមកនូវយុត្តិធម៌សង្គមពិតប្រាកដសម្រាប់ប្រជារាស្ត្រ។
ពីរដ្ឋវឺជីនៀ (Virginia) សហរដ្ឋអាមេរិក លោក សូ សុខុម មានប្រសាសន៍ថា អ្វីដែលលោកចង់ឃើញសម្រាប់ឆ្នាំថ្មីនេះ គឺពលរដ្ឋខ្មែរទូទៅលែងហូរទឹកភ្នែក លែងរងការឈឺចាប់ដោយអំពើអយុត្តិធម៌ ដូចជាការរំលោភដីធ្លីពីសំណាក់អ្នកមានអំណាច ការបំផ្លាញធនធានធម្មជាតិ អំពើពុករលួយ និងប្រព័ន្ធតុលាការមិនឯករាជ្យ៖ «ហើយក៏សូមជូនពរដល់បងប្អូនប្រជាពលរដ្ឋខ្មែរ សូមជួបតែសេចក្តីសុខគ្រប់ប្រការ។ សូមឲ្យបងប្អូនយើងនៅស្រុកខ្មែរលោកមានសេរីភាព ពីព្រោះសេរីភាព គឺជាភាពសំខាន់ណាស់សម្រាប់មនុស្ស។ សូម្បីតែសត្វក៏គេត្រូវការសេរីភាពដែរ។ ហេតុនេះ សូមលោកទទួលបាននូវសេរីភាពជោគជ័យក្នុងជីវិត កុំឲ្យមានបញ្ហាដូចសព្វថ្ងៃនេះទៀត»។
ក្រៅពីការបួងសួងឲ្យពលរដ្ឋខ្មែរមានសេរីភាព សន្តិភាព និងយុត្តិធម៌សង្គមពិតប្រាកដនេះ ក៏មានមនុស្សជាច្រើនទៀតបានបួងសួងឲ្យសាសនា និងវប្បធម៌ប្រពៃណី និងទំនៀមទម្លាប់របស់ខ្មែរឋិតនៅគង់វង្ស។
ពីរដ្ឋកាលីហ្វ័រញ៉ា (California) លោក ម៉ិល សាវឿន មានប្រសាសន៍ថា កូនខ្មែរទាំងអស់គួរតែដឹងខ្លួនថា វប្បធម៌ និងប្រពៃណីរបស់ខ្លួនកំពុងធ្លាក់ចុះ។ តួយ៉ាងដូចជាករណីខ្លោងទ្វារអង្គរសង្ក្រាន្តដែលលោកចាត់ទុកថា អ្នករចនាខ្លោងទ្វារនោះបានយករចនាបថពីប្រពៃណីវៀតណាម ឬ ចិន មកដាក់ជំនួសរចនាបថរបស់ខ្មែរ៖ «ជាពិសេសកន្លងមកនេះឆ្នាំថ្មីនៅអង្គរវត្តយើងមានការបារម្ភត្រង់ថា គេយកប្រពៃណីខ្មែរចេញ ហើយដាក់ជំនួសប្រពៃណីសាសន៍បរទេសវិញ ដែលមិនដែលមានពាក់ព័ន្ធតាំងពីដើមមក។ ខ្មែរយើងមិនដែលយកវប្បធម៌អរិយធម៌របស់យួន យកមកដាក់ក្នុងបរិវេណអង្គរ ឬតំបន់អង្គរដូចពេលបច្ចុប្បន្ននេះទេ។ ដូច្នេះ ខ្ញុំបារម្ភហើយព្រួយអំពីប្រទេសជាតិណាស់។ ដូច្នេះនៅឆ្នាំថ្មីនេះ សូមឲ្យខ្មែរយើងដឹងខ្លួន អ្វីដែលយើងត្រូវធ្វើ គឺធ្វើយ៉ាងណាឲ្យចំលក្ខណៈរបស់ខ្មែរ»។
ជាងនេះទៅទៀតសម្រាប់ឆ្នាំថ្មីនេះ លោកក៏ចង់ឃើញពលរដ្ឋខ្មែរក្នុងសហរដ្ឋអាមេរិក ទាំងអស់ ចេះរួបរួមសាមគ្គីគ្នា និងរក្សាមរតកវប្បធម៌របស់ខ្មែរឲ្យបានគង់វង្ស។
ពីរដ្ឋជចារ (Georgia) ឯណោះវិញ លោក ណែម ឈើង មានប្រសាសន៍ថា លោកបួងសួងឲ្យប្រទេសកម្ពុជា មានការផ្លាស់ប្ដូរមួយប្រកបដោយសន្តិវិធី និងការឈប់បង្ហូរឈាមគ្នារវាងខ្មែរ និងខ្មែរ។ លើសពីនេះទៅទៀត លោកក៏បានអំពាវនាវឲ្យពលរដ្ឋខ្មែរក្នុងសហរដ្ឋអាមេរិក ត្រូវយកចិត្តទុកដាក់ជួយដល់សហគមន៍រៀងៗខ្លួនឲ្យបានល្អ ជាពិសេសទៅលើកិច្ចការសង្គម រួមនឹងការបណ្ដុះគំនិតភាពជាអ្នកដឹកនាំសម្រាប់សហគមន៍នីមួយៗ៖ «ចំពោះសហគមន៍ខ្មែរនៅក្នុងសហរដ្ឋអាមេរិក ក៏ដូចជាតំបន់ដទៃទៀតក្រៅប្រទេសហ្នឹង ខ្ញុំចង់ឃើញបងប្អូនខ្មែរយើងផ្ដោតការយកចិត្តទុកដាក់ចំពោះសេចក្តីត្រូវការក្នុងសហគមន៍នីមួយៗ ជាពិសេសសហគមន៍ដែលខ្លួននៅហ្នឹង កុំភ្លេចថាយើងមានសេចក្តីត្រូវការជាច្រើន ដែលយើងមើលរំលងជាយូរមកហើយ ដូចជាការជួយបង្រៀនភាសាអង់គ្លេសដែលគ្នាត្រូវការ ការជួយចំពោះជនទន់ខ្សោយដែលគ្នាមិនសូវចេះច្បាប់ទម្លាប់ ជាពិសេសករណីច្បាប់អន្តោប្រវេសន៍ជាដើម ហើយនិងការបកប្រែភាសា ព្រមទាំងការបង្រៀនឲ្យមានការបណ្ដុះអ្នកដឹកនាំក្នុងសហគមន៍នីមួយៗ»។
ចំណែកពីប្រទេសកាណាដា (Canada) ឯណោះវិញ លោក ថាច់ ងុក ថាច់ ប្រធានសហព័ន្ធខ្មែរកម្ពុជា ជូនពរឲ្យពលរដ្ឋខ្មែរទាំងនៅក្នុង និងក្រៅប្រទេស ជួបប្រកបតែសេចក្តីសុខ និងការរីកចម្រើន។ ប្រធានសហព័ន្ធខ្មែរកម្ពុជាក្រោមរូបនេះ ក៏បានបួងសួងដល់ទេវតាឆ្នាំថ្មី ប្រសិទ្ធិពរជ័យដល់ប្រទេសកម្ពុជា ទាំងមូល ឲ្យឆាប់ធូរស្បើយពីការគាបសង្កត់សិទ្ធិសេរីភាព និងទុក្ខលំបាកទាំងពួង៖ «ខ្ញុំសូមជូនពរដល់ពលរដ្ឋខ្មែរទាំងអស់ឲ្យបានសេចក្តីសុខ សេចក្តីចម្រើន ជាពិសេសបងប្អូនខ្មែរក្នុងប្រទេសកម្ពុជា។ យើងឃើញថាមានបញ្ហាក្នុងសង្គមហ្នឹងដែលមានជាហូរហែ ហើយជាពិសេសក្នុងឆ្នាំថ្មីហ្នឹង សូមឲ្យបានធូរស្រាល ដើម្បីឲ្យបងប្អូនយើងមានភាពរីកចម្រើនក្នុងការកសាងប្រទេសជាតិ»។
ក្រៅពីការជូនពរសេរីសួស្តីឆ្នាំថ្មីរបស់ពលរដ្ឋខ្មែរនៅឯនាយសមុទ្រទាំងនេះ ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) តាមរយៈរដ្ឋមន្ត្រីក្រសួងការបរទេសសហរដ្ឋអាមេរិក លោក ចន ឃែរី (John Kerry) ជូនពរឲ្យពលរដ្ឋខ្មែរទាំងអស់ប្រកបដោយសេចក្តីសុខ និងសុវត្ថិភាព ក្នុងឱកាសបុណ្យចូលឆ្នាំដ៏រីករាយនេះ។ លើសពីនេះ លោក ចន ឃែរី ក៏សម្ដែងការកោតសរសើរចំពោះសន្ទុះទឹកចិត្តរបស់យុវជនកម្ពុជា ក្នុងការយល់ដឹងអំពីមូលដ្ឋានគ្រឹះនៃលទ្ធិប្រជាធិបតេយ្យក្នុងពេលបច្ចុប្បន្ន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។