មន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង នឹងដឹកនាំលេងល្បែងប្រជាប្រិយខ្មែរជាច្រើនប្រភេទក្នុងឱកាសបុណ្យចូលឆ្នាំថ្មីថ្ងៃទី១ ត្រូវនឹងថ្ងៃទី១៤ ខែមេសា ឆ្នាំ២០១៥ ចាប់ពីម៉ោង ២រសៀលរហូតដល់ម៉ោង ៥ល្ងាច។
គោលបំណងនៃការដឹកនាំលេងនេះ គឺចង់បង្កើនភាពសប្បាយរីករាយ និងឲ្យយុវវ័យងាកមកចាប់អារម្មណ៍ល្បែងប្រជាប្រិយខ្មែរ ជាជាងនាំគ្នាជិះម៉ូតូដើរលេងប៉ាតម្សៅ ឬជះទឹកដាក់គ្នា។
អនុប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង លោក សិត ស ថ្លែងនៅថ្ងៃទី១១ ខែមេសា ថា ល្បែងប្រជាប្រិយខ្មែរចំនួន ៨ប្រភេទ ក្នុងនោះក៏មានការប្រកួតកីឡាបោកចំបាប់មួយដែរ នឹងត្រូវលេងនៅលើសួនកុមារទល់មុខមន្ទីរវប្បធម៌។ លោកថា សកម្មភាពលេងល្បែងទាំងនេះមានប្រយោជន៍ច្រើនសម្រាប់មនុស្ស និងវប្បធម៌ជាតិ តាមរយៈការស្ដែងចេញនូវល្បែងប្រពៃណីជាតិខ្មែរ៖ «លេងល្បែងប្រជាប្រិយនេះ ដើម្បីរំឭកដល់យុវជនជំនាន់ក្រោយឲ្យស្គាល់អំពីប្រពៃណីវប្បធម៌ជាតិ។ ហើយល្បែងមានដូចជា ចោលឈូង បោះអង្គញ់ ទាញព្រ័ត្រ វាយក្អម ចាប់កូនខ្លែង លាក់កន្សែង និងរាំកម្សាន្តនៅពេលរាត្រី។ តាងនាមខ្ញុំថ្នាក់ដឹកនាំមន្ទីរវប្បធម៌ សូមអំពាវនាវដល់យុវជនជំនាន់នេះ សូមឲ្យបង្វែរមកលេងល្បែងប្រជាប្រិយដើម្បីសប្បាយ ហើយជាមិត្តភាព និងសីលធម៌ផង»។
លោកបញ្ជាក់ថា ល្បែងប្រជាប្រិយខ្មែរត្រូវបានមន្ទីរ និងថ្នាក់ដឹកនាំក្នុងខេត្តកំពង់ឆ្នាំង ផ្ដួចផ្ដើមលេងតាំងពីឆ្នាំ២០១៤ ហើយនឹងបន្តលេងជារៀងរាល់ឆ្នាំទៅមុខទៀតក្នុងឱកាសបុណ្យចូលឆ្នាំ។ កាលពីឆ្នាំ២០១៤ មានមនុស្សប្រមាណ ៤០០នាក់មកពីសង្កាត់ចំនួន៤ នៃក្រុងកំពង់ឆ្នាំង បានចូលរួមលេងយ៉ាងសប្បាយ ហើយឆ្នាំនេះលោកសង្ឃឹមថា នឹងមានមនុស្សកាន់តែច្រើនឡើងនឹងចូលរួមលេង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។