អភិបាលខេត្តព្រះសីហនុ ស្នើឲ្យពលរដ្ឋគោរពច្បាប់ចរាចរណ៍ និងត្រូវប្រយ័ត្នពីគ្រោះថ្នាក់ដែលអាចនឹងកើតមានឡើងដោយអគ្គីភ័យឆាបឆេះ នៅឱកាសពិធីបុណ្យចូលឆ្នាំប្រពៃណីជនជាតិចិន វៀតណាម ឆ្នាំនេះ។
ភ្ញៀវទេសចរ និងពលរដ្ឋខេត្តព្រះសីហនុ រិះគន់មូលដ្ឋានខេត្តជាប់ឆ្នេរសមុទ្រមួយនេះ ថានៅពេលមានឮសំឡេងផ្ទុះផាវ និងបាញ់កាំជ្រួច ត្រូវបានគេដុតលាន់កងរំពងនៅពេលរាត្រី រំខានដល់ការទទួលទានដំណេក និងបារម្ភពីអគ្គីភ័យឆាបឆេះ ប៉ុន្តែមិនឃើញមានកម្លាំងសមត្ថកិច្ចពាក់ព័ន្ធចុះហាមឃាត់ទេ។
ក្នុងឱកាសពិធីបុណ្យចូលឆ្នាំប្រពៃណីជនជាតិចិន និងវៀតណាម ឆ្នាំ២០១៧ នេះ អភិបាលខេត្តព្រះសីហនុ លោក យន្ត មីន បានរំលឹកដល់ប្រជាពលរដ្ឋទូទៅ ពិសេសពលរដ្ឋជាប់សែស្រឡាយ ឬឈាមជ័រចិន វៀតណាម ទាំងអស់ឲ្យប្រុងប្រយ័ត្នចំពោះអគ្គិភ័យដែលអាចនឹងកើតមាននៅតាមលំនៅឋានរៀងៗខ្លួន។ ជាងនេះ ប្រជាពលរដ្ឋនៅតាមគេហដ្ឋាន ឬទីតាំងបើកបម្រើសេវាកម្មទេសចរណ៍ផ្សេងៗ ក៏មិនត្រូវនាំគ្នាដុតផាវ ឬបាញ់កាំជ្រួច និងដុតគ្រឿងផ្ទុះផ្សេងៗ ដែលអាចបង្កឲ្យមានអគ្គីភ័យឆាបឆេះ និងរំខានដល់ការរស់នៅរបស់អ្នកជិតខាងនោះទេ។
បន្ថែមលើនេះ លោក យន្ត មីន ក៏បានអំពាវនាវដល់អ្នកបើកបរ ឬអ្នកប្រើប្រាស់ផ្លូវសាធារណៈ ទោះធ្វើដំណើរទៅជួបសួរសុខទុក្ខសាច់ញាតិនៅឯស្រុកកំណើត ឬធ្វើដំណើរកម្សាន្តចូលមកខេត្តព្រះសីហនុ ក្តី ត្រូវចូលរួមគោរពច្បាប់ចរាចរណ៍ផ្លូវគោកឲ្យបានទាំងអស់គ្នា ប្រយោជន៍ដើម្បីចូលរួមកាត់បន្ថយអត្រាគ្រោះថ្នាក់ចរាចរណ៍នៅកម្ពុជា ឲ្យថយចុះចំនួន៖ «សូមឲ្យបងប្អូនអ្នកបើកបរ ឬជាអ្នកធ្វើដំណើរទាំងអស់ ដែលធ្វើដំណើរមកកម្សាន្តលេងសប្បាយ នៅខេត្តព្រះសីហនុ សូមឲ្យទទួលបានផាសុកភាព សូមមានសុវត្ថិភាព និងមានសេចក្ដីរីករាយគ្រប់ក្រុមគ្រួសារនៅក្នុងឱកាសថ្ងៃចុងសប្ដាហ៍ ដែលចំថ្ងៃនៃការរៀបចំពិធីបុណ្យចូលឆ្នាំប្រពៃណីជនជាតិចិន និងវៀតណាម ឆ្នាំនេះ»។
នៅមុនពិធីបុណ្យចូលឆ្នាំចិន និងវៀតណាម ចូលមកដល់នៅឆ្នាំនេះ រដ្ឋបាលខេត្តព្រះសីហនុ និងស្ថាប័នជំនាញពាក់ព័ន្ធ មានស្នងការនគរបាល និងកងរាជអាវុធហត្ថខេត្តនេះជាដើម បានត្រៀមកម្លាំងការពារសន្តិសុខសុវត្ថិភាពជូនប្រជាពលរដ្ឋ ពិសេសភ្ញៀវទេសចរចម្រុះជាតិសាសន៍ ដែលនឹងចូលមកទស្សនាខេត្តនេះ។ ក្នុងនោះរដ្ឋបាលខេត្តព្រះសីហនុ ក៏បានដាក់បម្រាមហាមមិនឲ្យប្រតិបត្តិករទេសចរណ៍ ប្រជាពលរដ្ឋជាប់ឈាមជ័រ ឬសែស្រឡាយចិន វៀតណាម និងភ្ញៀវទេសចរជាដើម ហាមមិនឲ្យដុតគ្រឿងផ្ទុះ មានផាវ និងកាំជ្រួចជាដើម នៅក្នុងឱកាសពិធីបុណ្យចូលឆ្នាំនេះទេ ព្រោះបារម្ភខ្លាចនាំឲ្យប៉ះពាល់ដល់សន្តិសុខសណ្ដាប់ធ្នាប់សាធារណៈ ជាពិសេសអាចបង្កើតឲ្យមានអគ្គីភ័យកើតឡើងជាយថាហេតុ។
ទោះមានបម្រាមបែបនេះក្តី គេសង្កេតឃើញថា នៅតាមទីតាំងសំណង់អគារធំៗ មានកម្ពស់ច្រើនជាន់ ឬសណ្ឋាគារធំៗ វិឡាប្រណិតៗស្កឹមស្កៃ និងផ្ទះប្រជាពលរដ្ឋមួយចំនួននាខេត្តព្រះសីហនុ ត្រូវបានគេដុតផាវបំផ្ទុះ និងបាញ់កាំជ្រួចកងរំពងអនាធិបតេយ្យនៅពេលរាត្រី រំខានដល់ដំណេកអ្នកជិតខាង។ សកម្មភាពដុតផាវ និងបាញ់កាំជ្រួចកងរំពងនៅចំកណ្ដាលក្រុងទេសចរណ៍ មួយនេះ មិនឃើញមានកម្លាំងសមត្ថកិច្ចនគរបាល និងកងរាជអាវុធហត្ថជាដើម ចុះដល់ទីតាំងមានដុត និងបាញ់គ្រឿងផ្ទុះទាំងនោះដើម្បីហាមឃាត់ទេ។
កាលពីយប់ថ្ងៃទី២៧ ឆ្លងចូលថ្ងៃទី២៨ ខែមករា គេសង្កេតឃើញមានពលរដ្ឋខ្លះបានថតជារូបថត និងរូបវីដេអូឃ្លិប បង្ហោះតាមបណ្ដាញសង្គមហ្វេសប៊ុក (Facebook) រិះគន់សកម្មភាពដុតផាវ និងបាញ់កាំជ្រួចយ៉ាងកងរំពងនៅពេលរាត្រីនេះ ថាបានរំខានដល់ការទទួលទានដំណេករបស់ពួកគេ។ភ្ញៀវទេសចរ និងពលរដ្ឋសំណូមពរថា សមត្ថកិច្ចពាក់ព័ន្ធគួរតែចុះហាមឃាត់ម្ចាស់ទីតាំងនីមួយៗ ឬឈានដល់មានវិធានការតាមផ្លូវច្បាប់។
យ៉ាងនេះក្ដី ក្នុងឱកាសពិធីបុណ្យចូលឆ្នាំចិន វៀតណាម ដែលបានចាប់ផ្ដើមកាលពីថ្ងៃទី២៧ ខែមករា មក ហាក់មិនសូវឃើញភ្ញៀវទេសចរ ពិសេសភ្ញៀវជាតិ បង្ហាញវត្តមានច្រើនទេនៅតាមតំបន់ឆ្នេរសមុទ្រ តាមកោះ និងតាមរមណីយដ្ឋានធម្មជាតិនានា ជាដើម។ ប៉ុន្តែសម្រាប់ថ្ងៃសៅរ៍ ទី២៨ ខែមករា នេះ ភ្ញៀវទេសចរបានបង្ហាញវត្តមានជាបណ្តើរៗ នៅតាមតំបន់កោះ តាមតំបន់ឆ្នេរ មានឆ្នេរអូរឈើទាល ឆ្នេរព្រែកត្រែង ឆ្នេរលំហែកាយ ឆ្នេរអូរត្រេះ និងរមណីយដ្ឋានក្បាលឆាយជាដើម។
ប្រតិបត្តិករទេសចរណ៍បម្រើសេវាម្ហូបអាហារ និងសេវាស្នាក់នៅ បានឲ្យដឹងថា បន្ទប់ជួលស្នាក់នៅតាមផ្ទះសំណាក់ និងសណ្ឋាគាររបស់ពួកគេ មានភ្ញៀវកុម្ម៉ង់កក់បន្ទប់សម្រាប់ការស្នាក់នៅរយៈពេល ២ថ្ងៃ ចាប់ថ្ងៃទី២៨ ដល់ថ្ងៃទី២៩ ខែមករា ជាបន្តបន្ទាប់រួចហើយ។ ម្ចាស់បម្រើសេវាស្នាក់នៅខ្លះ បានអះអាងថា បានរក្សាតម្លៃបន្ទប់ជួលស្នាក់នៅក្នុងតម្លៃដូចថ្ងៃធម្មតាដដែល ប៉ុន្តែមានប្រតិបត្តិករទេសចរណ៍ខ្លះទៀត បានដំឡើងតម្លៃបន្ទប់ជួលខ្ពស់ជាងថ្ងៃធម្មតាបន្តិចបន្តួច។ ម្ចាស់សណ្ឋាគារ និងផ្ទះសំណាក់ភាគច្រើន បានអះអាងថា បន្ទប់ជួលស្នាក់នៅរបស់ពួកគេនៅសល់បន្ទប់ទំនេរជាច្រើន ដែលមិនទាន់មានភ្ញៀវកក់ គិតត្រឹមថ្ងៃទី២៨ ខែមករា។
យ៉ាងណាក៏ដោយចុះ លោក យន្ត មីន អភិបាលខេត្តព្រះសីហនុ បានអំពាវនាវដល់ភ្ញៀវទេសចរចម្រុះជាតិសាសន៍ ទាំងប្រជាពលរដ្ឋខ្មែរ ទាំងខ្មែរកាត់ចិន វៀតណាម និងមន្ត្រីរាជការគ្រប់ជាន់ថ្នាក់ដែលមានឱកាសឈប់សម្រាកពីការងារនៅថ្ងៃចុងសប្ដាហ៍ ដែលត្រូវចំថ្ងៃជនជាតិចិន វៀតណាម ធ្វើបុណ្យចូលឆ្នាំថ្មីនេះ សូមចាប់អារម្មណ៍ ឬងាកមកជ្រើសយកមូលដ្ឋានខេត្តទេសចរណ៍ជាប់ឆ្នេរសមុទ្រមួយនេះ សម្រាប់ការលំហែកម្សាន្ត នៅតាមក្រុមគ្រួសារនីមួយៗ។
លោក យន្ត មីន បានបង្ហាញមោទនភាព នៃការអភិវឌ្ឍមូលដ្ឋានខេត្តព្រះសីហនុ នៅពេលបច្ចុប្បន្នថា មានសោភណភាពល្អ មានផ្លូវធំទូលាយ មានសួនច្បារ បំពាក់ភ្លើងបំភ្លឺចម្រុះពណ៌ពេលរាត្រីស្រស់បំព្រង ដើម្បីរង់ចាំស្វាគមន៍ភ្ញៀវទេសចរពីគ្រប់ទិសទីឲ្យមានភាពសប្បាយរីករាយ ពិសេសជាងនេះ រដ្ឋបាលខេត្តបានពង្រាយកម្លាំងនគរបាល និងកងរាជអាវុធហត្ថជាដើមនៅគ្រប់ច្រកល្ហកទាំងយប់ថ្ងៃ ដើម្បីត្រៀមការពារសន្តិសុខសុវត្ថិភាពជូនទេសចរ និងប្រជាពលរដ្ឋទូទៅ មានការប្រុងប្រយ័ត្នខ្ពស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។