ការចូលរួមសំដែងនៅទីនោះ គឺដើម្បីផ្សព្វផ្សាយពីសិល្បៈវប្បធម៌ខ្មែរ ហើយក៏ដើម្បីរៀនយកបទពិសោធន៍រវាងក្រុមសិល្បករ របាំបុរាណនៃប្រទេសមួយចំនួនទៀតដែលបានទៅចូលរួមនៅក្នុងពិធីនោះដែរ។
ក្រុមសិល្បៈរបាំបុរាណនៃបណ្ដាប្រទេសចំនួន ៩ នៅក្នុងតំបន់អាស៊ី ក្នុងនោះរួមមានក្រុមសិល្បៈរបាំបុរាណខ្មែរផង បានត្រៀមបើកមហោស្រពសិល្បៈធំមួយក្រោមប្រធានបទ "មហោស្រពរាមកេរ្តិ៍"។
កម្មវិធីនេះនឹងប្រព្រឹត្តទៅនៅក្នុងប្រទេសឥណ្ឌូនេស៊ី និងមានរយៈពេលជាង ១សប្ដាហ៍ គឺចាប់ពីថ្ងៃទី៦ ខែកញ្ញា ដល់ថ្ងៃទី១៣ ខែកញ្ញា ឆ្នាំ២០១៣។
ទីប្រឹក្សានៃក្រសួងវប្បធម៌និងវិចិត្រសិល្បៈ លោក ព្រឿង ឈាង ដែលបានដឹកនាំក្រុមសិល្បៈរបាំបុរាណខ្មែរទៅសំដែងប្រទេសឥណ្ឌូនេស៊ី បានប្រាប់ឲ្យដឹងថា ក្នុងមហោស្រពរាមកេរ្តិ៍នោះ គឺក្រុមសិល្បៈរបាំបុរាណនៃប្រទេសទាំង ៩ នឹងសំដែងអំពីឈុតខ្លះនៃរឿងរាមកេរ្តិ៍ ឬហៅថា រាមាយណ។
លោកបន្តថា ការចូលរួមសំដែងរបស់កម្ពុជា កត្តាសំខាន់គឺដើម្បីផ្សព្វផ្សាយទម្រង់សិល្បៈវប្បធម៌របាំបុរាណខ្មែរដល់អន្តរជាតិឲ្យគេបានដឹងកាន់តែច្បាស់ ដូចជាការសំដែងរបាំរឿងរាមកេរ្តិ៍ជាដើម ថ្វីបើប្រទេសទាំង ៩ នាំគ្នាសំដែងរឿងនេះតែមួយក៏ដោយ ក៏ប៉ុន្តែទេពកោសល្យនៃការសំដែងគឺមិនដូចគ្នាទេ។
មហោស្រពរាមកេរ្តិ៍ដែលប្រទេសចំនួន ៩ត្រៀមនឹងសំដែងនៅក្នុងប្រទេសឥណ្ឌូនេស៊ី នោះ គឺរួមមានកម្ពុជា ឥណ្ឌា ហ្វីលីពីន ឥណ្ឌូនេស៊ី សិង្ហបុរី ម៉ាឡេស៊ី ថៃ ភូមា និងឡាវ រីឯចំនួនសិល្បករសំដែងវិញ គឺអាស្រ័យទៅតាមលទ្ធភាពរបស់ប្រទេសនីមួយៗ។ ដោយឡែកសម្រាប់ប្រទេសកម្ពុជា គឺមានសិល្បករ សិល្បការិនីចំនួន ២៥រូប ដែលជ្រើសយកពីសាលាសកលវិទ្យាល័យភូមិន្ទវិចិត្រសិល្បៈ និងមួយចំនួនទៀតយកពីក្រសួងវប្បធម៌និងវិចិត្រសិល្បៈ។
ទីប្រឹក្សានៃក្រសួងវប្បធម៌និងវិចិត្រសិល្បៈ លោក ព្រឿង ឈាង បានបញ្ជាក់ដែរថា ការជ្រើសយកសិល្បករពីក្រសួងផង និងពីសាលាផង គឺដើម្បីផ្ដល់ឱកាសឲ្យគេបានចេញយកបទពិសោធន៍ថ្មីៗពីក្រៅបន្ថែមទៀត ពីព្រោះថា នៅសម័យនេះជាសម័យវិទ្យាសាស្ត្រជឿនលឿន ដូច្នេះសិល្បករក៏ត្រូវតែចេះផ្លាស់ប្ដូរការសំដែងឲ្យស្របទៅតាមសម័យកាលដែរ។
លោកបានឲ្យដឹងទៀតថា ក្រុមសិល្បៈរបាំបុរាណខ្មែរនៃសកលវិទ្យាល័យភូមិន្ទវិចិត្រសិល្បៈ និងក្រសួង តែងតែបានចេញទៅសំដែងនៅក្រៅប្រទេសក្នុង១ឆ្នាំបាន ២ដង ដោយជួនកាលសំដែងនៅតំបន់អាស៊ី ឬជួនកាលទៅសំដែងនៅតំបន់អឺរ៉ុប។
លោកបន្ថែមថា ការចេញទៅនោះ គឺភាគច្រើនតាមការអញ្ជើញរបស់ប្រទេសផ្សេងៗ ដោយគេមានបំណងចង់ឲ្យមានការផ្លាស់ប្ដូរបទពិសោធន៍រវាងសិល្បករនិងសិល្បករ ដើម្បីជាប្រយោជន៍លើកស្ទួយដល់វិស័យសិល្បៈវប្បធម៌ក្នុងប្រទេសរៀងៗខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។