ក្រសួងព័ត៌មាន បានប្រកាសថា ក្រសួងនឹងទុកពេល ១ខែទៀតឲ្យស្ថានីយទូរទស្សន៍ក្នុងស្រុក បញ្ឈប់ការចាក់ផ្សាយភាពយន្តបរទេសចាប់ពីចន្លោះម៉ោង ៧ ដល់ម៉ោង ៩យប់ ដោយត្រូវអនុវត្តចាប់ពីថ្ងៃទី៣១ ខែធ្នូ ខាងមុខនេះវិញ។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានឲ្យដឹងតាមរយៈសេចក្ដីប្រកាសព័ត៌មាន ដែលបានចេញផ្សាយនៅថ្ងៃទី២៦ ខែតុលា ថា វិធានការឲ្យទូរទស្សន៍ក្នុងស្រុកអនុវត្តបញ្ឈប់ចាក់ផ្សាយភាពយន្តបរទេស ដែលនឹងត្រូវអនុវត្តចាប់ពីថ្ងៃទី១ ខែវិច្ឆិកា ខាងមុខនេះ មានរយៈពេលលឿនពេក។ ជាងនេះទៀត ស្ថានីយទូរទស្សន៍ក្នុងស្រុកមួយចំនួន ក៏បានសុំឲ្យក្រសួង ពន្យារពេលចាក់ផ្សាយភាពយន្តខ្មែរ ដោយសារស្ថានីយទូរទស្សន៍ទាំងនោះ មានបញ្ហាផលិតកម្មវិធី និងការផ្លាស់ប្ដូរម៉ោងផ្សាយ។
លោកបន្តថា ហេតុនេះ ក្រសួងបានអនុញ្ញាតឲ្យម្ចាស់ស្ថានីយទាំងអស់ អាចពន្យារពេលចាក់ផ្សាយវណ្ណកម្មខ្មែររហូតដល់ថ្ងៃទី៣១ ខែធ្នូ ឆ្នាំ២០១៥ ជាកំហិតវិញ។
កាលពីថ្ងៃទី២៥ កញ្ញា កន្លងទៅ ក្រសួងព័ត៌មាន បានសម្រេចហាមឃាត់ការចាក់ផ្សាយភាពយន្តបរទេសគ្រប់ប្រភេទនៅតាមកញ្ចក់ទូរទស្សន៍ទាំងអស់ ក្នុងប្រទេសកម្ពុជា ចន្លោះម៉ោង ៧ ដល់ម៉ោង ៩យប់ ដោយត្រូវតែចាក់ផ្សាយវណ្ណកម្មខ្មែរ ដើម្បីចូលរួមលើកស្ទួយវប្បធម៌ និងអត្តសញ្ញាណភាពយន្តខ្មែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។