សម្ដេចសង្ឃ និងរដ្ឋមន្ត្រីក្រសួងធម្មការ និងសាសនា មិនទាន់មានវិធានការតាមផ្លូវច្បាប់ ប្រឆាំង បុរសស្លៀកពាក់ស ឈ្មោះ ធាន វុទ្ធី ដែលតាំងខ្លួនជាព្រះសិអារ្យមេត្រី នៅវត្តទួលព្រះរាជា ក្នុងស្រុកកោះធំ ខេត្តកណ្ដាលនៅឡើយទេ។
នៅព្រឹកថ្ងៃទី៧ខែសីហានេះ លោក ធាន វុទ្ធី បានថ្លែងសុំអភ័យទោសដោយព្រមទទួលកំហុស នៅចំពោះសម្តេចសង្ឃ និងលោក មិន ឃិន រដ្ឋមន្ត្រីក្រសួងធម្មការ និងសាសនា និងអាជ្ញាធរខេត្តកណ្តាល។
នៅក្នុងជំនួបនោះ លោក ធាន វុទ្ធី បានធ្វើកិច្ចសន្យាសរសេរដោយដៃ និងមានផ្ដិតស្នាមមេដៃ ទៅលើកំហុសឆ្គង របស់ខ្លួនចំនួន៩ ចំណុច មានដូចជា៖ទទួលស្គាល់ថាបានរំលោភលើច្បាប់រដ្ឋធម្មនុញ្ញស្គាល់ ឬប្រាថ្នាខ្លួនជាព្រះហើយឲ្យគេអភិសេក ពិតជាមានព្រះសង្ឃបានថ្វាយបង្គំលោកមែន។ ពិតជាបានឲ្យជាងគូររូបរបស់ខ្លួនជាព្រះតំណាងព្រះពុទ្ធតាមរឿងរ៉ាវពុទ្ធប្រវត្តិជាដើម។
លោកបញ្ជាក់ទៀតថា គ្រឿងអលង្កានៅក្នុងវត្តទាំងអស់ គឺបានទិញពីផ្សារដើម្បីលក់ ហើយថា កំហុសឆ្គង របស់លោកដោយសារតែភាពល្ងង់ខ្លៅ។
« សំឡេង »
នៅលើកិច្ចសន្យាសរសេរដោយដៃ លោក ធាន វុទ្ធី ប្រគល់វត្តទួលព្រះរាជាឲ្យស្ថាប័នពាក់ព័ន្ធគ្រប់គ្រងបន្ត។ កន្លងមកករណី លោក ធាន វុទ្ធី នេះត្រូវលោកនាយករដ្ឋមន្ត្រី ហ៊ុន សែន ដាក់បទបញ្ជា ឲ្យលោក មិន ឃិន រដ្ឋមន្ត្រីក្រសួងធម្មការ និងមន្ត្រីពាក់ព័ន្ធ តាមចាប់បុរសនោះឲ្យមកទទួលខុសត្រូវចំពោះការប្រព្រឹត្តកំហុសឆ្គងរបស់ខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។