កីឡាករកីឡាការិនីជាង៦០០នាក់ចូលរួមអុំទូកប្រណាំងនៅខេត្តសៀមរាប
2015.11.24
ក្រុមកីឡាករកីឡាការិនីមកពីស្រុកចំនួន១១ និងក្រុង១ របស់ខេត្តសៀមរាប ប្រមាណជាង ៦៦០នាក់ ចូលរួមប្រារព្ធពិធីបុណ្យអុំទូកនៅក្នុងស្ទឹងខេត្តសៀមរាប កាលពីរសៀលថ្ងៃអង្គារ ទី២៤ ខែវិច្ឆិកា ឆ្នាំ២០១៥។
ពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក មិនត្រឹមតែជាព្រឹត្តិការណ៍ប្រមូលផ្ដុំទូកអុំ និងទូកងជាច្រើនមកពីគ្រប់ទិសទី ដើម្បីប្រណាំងគ្នាលេងកម្សាន្តក្នុងខេត្តសៀមរាប ប៉ុណ្ណោះទេ ប៉ុន្តែវាក៏ជាប្រពៃណីរបស់បុព្វបុរសខ្មែរដែលបានបន្សល់ទុកជាច្រើនជំនាន់មកហើយ។
ជារៀងរាល់ឆ្នាំ រដ្ឋាភិបាលតែងប្រារព្ធពិធីបុណ្យអុំទូកជាលក្ខណៈជាតិ នៅក្នុងទន្លេចតុមុខនាទីក្រុងភ្នំពេញ ក៏ប៉ុន្តែឆ្នាំនេះ បើទោះបីជាការប្រារព្ធពិធីបុណ្យអុំទូកថ្នាក់ជាតិបានអាក់ខានក៏ដោយ ក៏នៅឯខេត្តសៀមរាប ដែលជាតំបន់ទាក់ទាញភ្ញៀវទេសចរបរទេសបំផុត នៅតែរៀបចំពិធីនេះយ៉ាងអធិកអធម។
ក្រុមកីឡាករកីឡាការិនីមកពីស្រុកចំនួន១១ និងក្រុង១ របស់ខេត្តសៀមរាប ប្រមាណជាង ៦៦០នាក់ បានចូលរួមប្រារព្ធពិធីបុណ្យអុំទូកនៅក្នុងស្ទឹង កាលពីរសៀលថ្ងៃអង្គារ ទី២៤ ខែវិច្ឆិកា។ កម្មវិធីបានចាប់ផ្ដើមកាលពីវេលាម៉ោងប្រមាណជា ២រសៀល ដោយមានភ្ញៀវជាតិ និងអន្តរជាតិ ចូលរួមទស្សនាយ៉ាងច្រើនកុះករ។
អភិបាលខេត្តសៀមរាប ដែលជាគណៈអធិបតីនៃការបើកពិធីបុណ្យអុំទូកនេះ គឺលោក ឃឹម ប៊ុនសុង។ លោកថ្លែងកាលពីរសៀលថ្ងៃអង្គារ ទី២៤ ខែវិច្ឆិកា ថា កាលពីដើមឆ្នាំកន្លងទៅ ខេត្តសៀមរាប មានមោទនភាពដែលបានជាប់ចំណាត់ថ្នាក់លេខ១ នៃគោលដៅទេសចរណ៍ក្នុងចំណោមទីក្រុងចំនួន ២៥ ទៀតនៅក្នុងពិភពលោក ហើយទីក្រុងសៀមរាប ក៏បានជាប់ចំណាត់ថ្នាក់ជាទីក្រុងស្អាតនៃផ្ការំដួល ៣ទងដែរ។
លោក ឃឹម ប៊ុនសុង រំពឹងថា ការប្រារព្ធពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក នៅខេត្តសៀមរាប ឆ្នាំនេះ មិនត្រឹមតែជាការគោរពតាមប្រពៃណីរបស់ខ្មែរឲ្យបានខ្ជាប់ខ្ជួនប៉ុណ្ណោះទេ គឺវាអាចជាព្រឹត្តិការណ៍ដែលជួយទាក់ទាញភ្ញៀវទេសចរបរទេស ឲ្យចូលមកទស្សនាកម្ពុជា បានកាន់តែច្រើនថែមទៀត៖ «បងប្អូនកីឡាករកីឡាការិនី ត្រូវមានស្មារតីសាមគ្គី យោគយល់អធ្យាស្រ័យគ្នា ជៀសវាងបញ្ចេញអាកប្បកិរិយាដែលមិនសមរម្យ ធ្វើឲ្យប៉ះពាល់ដល់តម្លៃសីលធម៌ និងសេចក្តីថ្លៃថ្នូរនៃជាតិសាសន៍របស់យើង»។
ក្រុមអ្នកចូលរួមប្រណាំងទូក និងក្រុមអ្នកមកទស្សនា បានសម្ដែងការសប្បាយរីករាយដូចគ្នា ក្នុងពេលដែលពិធីប្រណាំងទូកកំពុងតែប្រព្រឹត្តទៅនេះ។
កីឡាការិនីម្នាក់ដែលមកពីឃុំប្រាសាទបាគង ស្រុកប្រាសាទបាគង ភាគខាងកើតនៃទីក្រុងសៀមរាប ដើម្បីចូលរួមប្រណាំងទូក លោកស្រី សុខ លន់ មានប្រសាសន៍ថា លោកស្រីធ្លាប់ចូលរួមប្រណាំងទូកចំនួនពីរលើកមកហើយ ក៏ប៉ុន្តែលោកស្រីនៅតែមានអារម្មណ៍សប្បាយរីករាយចំពោះព្រឹត្តិការណ៍នេះ៖ «មានអារម្មណ៍ថាសប្បាយរីករាយអបអរសាទរបុណ្យអុំទូក ដោយសារមានភ្ញៀវជាតិ និងអន្តរជាតិមកចូលរួមទស្សនាច្រើន»។
គណៈកម្មការរៀបចំពិធីបុណ្យអុំទូកខេត្តសៀមរាប ឲ្យដឹងថា ក្នុងឆ្នាំនេះមានទូកអុំ និងទូកងចំនួន ១៥គូ ស្មើនឹង ៣០ទូក ដែលបានចូលរួមប្រណាំង។ ក្នុងចំណោមទូកប្រណាំងទាំង ៣០ទូកនោះ គឺមានទូកស្ត្រីចំនួន ៨ផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
