យុវជនខេត្តស្វាយរៀង ភាគច្រើនមិនចាប់អារម្មណ៍លេងល្បែងប្រជាប្រិយទេ ពួកគេតែងតែជួបជុំគ្នាជាក្រុមៗផឹកស៊ី និងរាំធុងបាសជាដើម។ ចំណែកចាស់ព្រឹទ្ធាចារ្យលើកឡើងថា ប្រសិនបើយុវជនបោះបង់ការលេងល្បែងប្រជាប្រិយ នោះវប្បធម៌ប្រពៃណីជាតិនឹងអាចបាត់បង់បន្តិចម្តងៗ។
តំណាងចាស់ទុំ អំពាវនាវឲ្យយុវជនទាំងអស់ជួយអភិរក្សល្បែងប្រជាប្រិយ តាមរយៈការចូលរួមលេងទាំងអស់គ្នា ដើម្បីរក្សាប្រពៃណីជាតិខ្មែរ។
ក្នុងពិធីបុណ្យចូលឆ្នាំថ្មីដែលឈានចូលមកដល់ថ្ងៃទី២ នេះ យុវជនខេត្តស្វាយរៀង ភាគច្រើនធ្វើការនៅតាមបណ្ដាខេត្តផ្សេងៗ ដូចជារាជធានីភ្នំពេញ និងនៅបរទេសជាដើម បានធ្វើដំណើរមកស្រុកកំណើតជួបជុំក្រុមគ្រួសារសាច់ញាតិ មិត្តភក្ដិ ប៉ុន្តែអ្វីដែលជាក្តីបារម្ភសម្រាប់ចាស់ទុំ ព្រមទាំងព្រះសង្ឃផងនោះ គឺយុវជនស្ទើរតែ ៨០ភាគរយហើយមិនលេងល្បែងប្រជាប្រិយទេ។
ព្រះចៅអធិការវត្តព្រៃម្នាស់ នៅស្រុកកំពង់រោទិ៍ ខេត្តស្វាយរៀង ព្រះនាម ចឹក សង មានថេរដីកាថា នៅវត្តព្រៃម្នាស់ ព្រះអង្គគង់នៅបានរៀបចំលេងល្បែងប្រជាប្រិយ មានដូចជា វាយក្អម ទាញព្រ័ត្រ រៀបចំកីឡាបាល់ទះ និងបឺតទឹកដាក់ដបជាដើម គោលបំណងដើម្បីពង្រឹងសាមគ្គីភាព បង្កើនភាពសប្បាយរីករាយក្នុងពិធីបុណ្យប្រពៃណីជាតិ។ ព្រះតេជព្រះគុណមានថេរដីកាបន្តថា ព្រះអង្គចង់ឲ្យគ្រប់ទីវត្តអារាមទាំងអស់ទូទាំងប្រទេស និងស្ថាប័នរដ្ឋ និងឯកជន គួរផ្ដួចផ្ដើមលេងល្បែងប្រជាប្រិយ។ តួយ៉ាងបច្ចុប្បន្ននេះ ព្រះតេជព្រះគុណកត់សម្គាល់ថា យុវជនកំពុងតែទទួលយកវប្បធម៌បរទេស ហើយភ្លេចវប្បធម៌ប្រពៃណីដែលជារបស់ខ្មែរ និងមិនចាប់អារម្មណ៍ពីអត្ថប្រយោជន៍នៃល្បែងប្រជាប្រិយឡើយ។
ព្រះតេជព្រះគុណមានថេរដីកាបន្ថែមថា ការថែរក្សាវប្បធម៌ប្រពៃណីជាតិឲ្យបានគង់វង្ស គឺចាប់ផ្ដើមឡើងដោយយើងទាំងអស់គ្នា ពិសេសគឺយុវជនតែម្តងដែលជាទំពាំងស្នងឫស្សី។ លើសពីនេះទៀត ប្រទេសជាតិអាចរីកចម្រើនទៅបានអាស្រ័យលើការគិត និងការប្រព្រឹត្តរបស់យុវជនទាំងអស់ ហើយព្រះអង្គក៏អំពាវនាវឲ្យយុវជនចាប់អារម្មណ៍លេងល្បែងប្រជាប្រិយទាំងអស់គ្នានៅតាមទីវត្តអារាម តាមលំនៅឋាន និងទីប្រជុំជនជាដើមនៅក្នុងពិធីបុណ្យចូលឆ្នាំខ្មែរប្រពៃណីជាតិ៖ «ដែលជាចេះដឹងហើយមានព្រះសង្ឃជាអ្នកដឹកនាំឲ្យមានលេងល្បែងប្រជាប្រិយវិញទេ បុណ្យចូលឆ្នាំខ្មែរនេះអត់មានលេងល្បែងដូចពីដូនតាយើងពីដើមទេ គឺមានតែចាក់ធុងបាសតែប៉ុណ្ណឹង ហើយល្បែងប្រជាប្រិយនេះទៀតកាលណាយើងលេងទៅវាបានភាពសប្បាយរីករាយ ហើយមានសាមគ្គីភាព ភាតរភាពសម្គាល់ថាជាល្បែងរបស់ខ្មែរ»។
ចំណែកគណៈកម្មការអាចារ្យវត្តព្រៃម្នាស់ លោក សូស ខេមរៈ យល់ថា ការងាកមកលេងល្បែងប្រជាប្រិយទាំងអស់គ្នា ក៏អាចជៀសវាងការជិះម៉ូតូដើរលេងរបស់យុវជន អាចងាយបណ្ដាលឲ្យគ្រោះថ្នាក់ចរាចរណ៍ផ្សេងៗ និងអាចជៀសវាងនូវការសេពគ្រឿងស្រវឹងច្រើន អាចបង្កនូវបញ្ហាវាយតបគ្នា៖ «លេងសប្បាយដើម្បីឲ្យប្អូនៗជំនាន់ក្រោយតូចៗដើម្បីឲ្យវាដឹងថា ល្បែងប្រពៃណីមានអីខ្លះចឹង? ហើយខ្ញុំក៏ជម្រាបដែរ ល្បែងប្រពៃណីមានឈូង ទាញព្រ័ត្រ លាក់កន្សែង បោះអង្គញ់ បូមទឹកដាក់ដប ហើយបើថារាំវង់ គឺមានរាំក្បាច់សារវ៉ាន់ឡាំលាវ»។
គណៈកម្មការរៀបចំលេងល្បែងប្រជាប្រិយនៅវត្តព្រៃម្នាស់ លោក ហែម រំចេក ឲ្យដឹងនៅថ្ងៃទី១៥ មេសា ថា វត្តព្រៃម្នាស់ គឺចាប់ផ្ដើមលេងល្បែងប្រជាប្រិយ ៤ឆ្នាំហើយ គឺមានការចូលរួមឧបត្ថម្ភពីពុទ្ធបរិស័ទចំណុះជើងវត្ត បានរាយអង្គាសបច្ច័យតាមកម្លាំងសទ្ធារៀងៗខ្លួន។ លោកបន្តថា ប្រសិនបើទីវត្តអារាមទាំងអស់ដឹកនាំយុវជនលេងល្បែងប្រជាប្រិយ យុវជនអាចនឹងយល់បន្ថែមពីតម្លៃនៃវប្បធម៌ប្រពៃណីខ្មែរ។ លោកថា មានយុវជនតិចតួចណាស់ដែលចាប់អារម្មណ៍នឹងល្បែងប្រជាប្រិយ ហើយការអភិរក្សប្រពៃណីជាតិ គឺចាប់ផ្ដើមឡើងដោយយើងទាំងអស់គ្នា៖ «គណៈកម្មការយើងខ្ញុំខំបង្កើតនូវកម្មវិធីល្បែងប្រជាប្រិយនេះ ដើម្បីឲ្យក្មេងៗប្រមូលផ្តុំគ្នា មកលេង មិនចង់ឲ្យវាដើរឆ្ងាយៗ តែដើរឆ្ងាយ គឺមានគ្រោះថ្នាក់ចរាចរណ៍ហើយ»។
ចំណែកយុវនារីម្នាក់រស់នៅភូមិវាលយន្ត សង្កាត់ស្វាយរៀង ក្រុងស្វាយរៀង កញ្ញា ផន ពេជ្ររស្មី កត់សម្គាល់ថា យុវជនភាគច្រើនតែជួបជុំគ្នាផឹកស៊ី និងដើររាំតាមធុងបាសនៅវត្តអារាម និងកន្លែងមានកម្មវិធីផ្សេងៗ។ កញ្ញាសម្ដែងក្តីបារម្ភថា ប្រសិនបើយុវជននៅព្រងើយកន្តើយមិនលេងល្បែងប្រជាប្រិយទេ នោះអត្តសញ្ញាណជាតិប្រឈមនឹងបាត់បង់បន្តិចម្តងៗ ហើយក្មេងជំនាន់ក្រោយអាចមិនស្គាល់ប្រភេទល្បែងប្រជាប្រិយខ្មែរ៖ «នៅឥឡូវគេស្ងាត់ណាស់ អត់មានអ្នកលេងចឹង ហើយគេធំៗអស់ហើយគេអត់លេងហ្មង បើសិនជាម្នាក់ៗគិតតែចឹង វប្បធម៌ប្រពៃណីខ្មែរអាចនឹងបាត់បង់ទៅថ្ងៃខាងមុខ»។
អ្នករត់ម៉ូតូឌុបម្នាក់នៅក្រុងស្វាយរៀង លោក នង សុខុម ក៏មានក្ដីបារម្ភដែរថា ល្បែងប្រជាប្រិយខ្មែរប្រែប្រួលបន្តិចម្តងៗខុសប្លែកពីដើម។ លោកថា ចាស់ទុំពីដើមតែងតែលេងល្បែងប្រជាប្រិយនៅមុនចូលឆ្នាំរយៈពេល ១ខែ ហើយការលេងល្បែងប្រជាប្រិយគេលេងនៅតាមទីវត្តអារាម និងទីសាធារណៈផ្សេងៗជាដើម៖ «ចេះតែស្ងាត់ទៅ មិនសូវឃើញមានសប្បាយដូចចាស់ជំនាន់ខ្ញុំចូលចិត្តសប្បាយណាស់ ប៉ោតឆ្នាំងវៃរាំលេងសប្បាយដល់ៗ ដល់ឥឡូវមិនសូវដែរ គេឃើញតែបាសតែអីចាក់រាំចឹងតាមផ្ទះដែរ»។
ដោយឡែកនៅទីរួមខេត្តស្វាយរៀង ចាប់ផ្ដើមស្ងាត់ប្លែកពីសព្វដង ផ្ទះជាច្រើនបិទទ្វារ ចំណែកហាងមួយចំនួនធំក៏ត្រូវបិទដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។