ក្នុងកិច្ចប្រជុំនោះ មានការពិនិត្យរបាយការណ៍លទ្ធផលត្រួតពិនិត្យគ្រឿងញៀន ៩ខែ ដើមឆ្នាំ២០១២ និងបានលើកទិសដៅអនុវត្តដល់ចុងឆ្នាំ២០១២ ដែរ។
មន្ត្រីមកពីក្រសួងនានាចំនួន ២២ក្រសួង និងអាជ្ញាធរជាតិប្រយុទ្ធប្រឆាំងគ្រឿងញៀន បានប្រជុំគ្នានៅថ្ងៃ២៦ ខែកញ្ញា ឆ្នាំ២០១២ ដើម្បីអនុម័តសេចក្ដីព្រាងផែនការជាតិ ៥ឆ្នាំ ស្ដីពីការត្រួតពិនិត្យគ្រឿងញៀន ឆ្នាំ២០១១-២០១៥។
ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ឧបនាយករដ្ឋមន្ត្រី កែ គឹមយ៉ាន បានថ្លែងថា ផែនការជាតិ ៥ឆ្នាំនេះ បានធ្វើបន្តពីផែនការជាតិ ៥ឆ្នាំ កាលពីឆ្នាំ២០០៥ ដល់ឆ្នាំ២០១០។
ក្នុងកិច្ចប្រជុំថ្ងៃ២៦ ខែកញ្ញា គឺពិនិត្យរបៀបវារៈចំនួន ២។ ទី១ ការពិភាក្សា និងអនុម័តសេចក្ដីព្រាងផែនការជាតិ ៥ឆ្នាំ ស្ដីពីការត្រួតពិនិត្យគ្រឿងញៀន (ឆ្នាំ២០១១ ២០១៥)។ ទី២ ការពិភាក្សា និងអនុម័តសេចក្ដីព្រាងរបាយការណ៍ស្ដីពីលទ្ធផលការងារត្រួតពិនិត្យគ្រឿងញៀន ៩ខែ ដើមឆ្នាំ២០១២។ បន្ទាប់មកគឺការលើកទិសដៅការងារសំរាប់អនុវត្តដល់ចុងឆ្នាំ២០១២៖ «ឥឡូវយើង ២០១២ ហើយ មានន័យថា ផែនការនេះបានអនុវត្តបាន ២ឆ្នាំហើយ ប៉ុន្តែឯកសារមិនទាន់អនុម័ត»។
អនុប្រធាននាយកដ្ឋានរដ្ឋបាលហិរញ្ញវត្ថុនៃអាជ្ញាធរជាតិប្រយុទ្ធប្រឆាំងគ្រឿងញៀន លោក សួន ខឿន ថ្លែងប្រាប់ក្រុមអ្នកកាសែតថា ផែនការជាតិ ៥ឆ្នាំនេះ នឹងចំណាយទឹកប្រាក់ជាង ៤១លានដុល្លារ សំរាប់ធ្វើការងារដោយធានាពង្រឹងដល់ការត្រួតពិនិត្យចរាចរណ៍គ្រឿងញៀនក្នុងតំបន់អាស៊ាន។
លោកថា អាណត្តិទី១ ដែលអាជ្ញាធរជាតិប្រយុទ្ធប្រឆាំងគ្រឿងញៀនបានអនុវត្តកាលពីឆ្នាំ២០០៥ ដល់ឆ្នាំ២០១០ នៅមានសល់ការប្រឈមច្រើនក្នុងការអនុវត្តការងារ។
នៅក្នុងអាណត្តិទី២ កំពុងអនុវត្តពីឆ្នាំ២០១១ ដល់ឆ្នាំ២០១៥ នោះ អាជ្ញាធរជាតិផ្ដោតសំខាន់លើការជួយព្យាបាល និងបណ្ដុះបណ្ដាលវិជ្ជាជីវៈដល់អ្នកញៀនគ្រឿងញៀន៖ «ព្រោះអាណត្តិទី២ នៃផែនការជាតិនេះនៅសល់រយៈពេលតែ ៣ឆ្នាំទៀតទេ ធ្វើពី ២០១១ ដល់ ២០១៥។ ចំណុចសំខាន់ដែលឯកឧត្ដមឧប បានលើកអម្បាញ់មិញនេះ គឺថា ក្នុងយុទ្ធសាស្ត្រទាំង៥ របស់ផែនការជាតិក្នុងអាណត្តិទី២នេះយុទ្ធសាស្ត្រមួយ ដែលត្រូវប្រមូលផ្ដុំឲ្យធ្វើខាងតែបាននាចុងឆ្នាំនេះ ហើយនិង ៣ឆ្នាំតទៅមុខទៀតនោះ គឺយុទ្ធសាស្ត្រ ស្ដីពីការព្យាបាលបណ្ដុះបណ្ដាលវិជ្ជាជីវៈ សមាហរណកម្មអ្នកញៀនគ្រឿងញៀន»។
ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនថ្លែងថា ចំណុចសំខាន់ដែលអង្គប្រជុំតម្រូវឲ្យអាជ្ញាធរជាតិពង្រឹងនោះ រួមមានការលើកកំពស់ការយល់ដឹងជាសាធារណៈពីបញ្ហាគ្រឿងញៀន។ កាត់ផ្ដាច់ការហូរចូលគ្រឿងញៀនពីតំបន់ព្រំដែនភាគឦសានប្រទេសកម្ពុជា។
ការពង្រឹងការអនុវត្តច្បាប់ និងការពង្រឹងស្ថាប័នច្បាប់នៅថ្នាក់ជាតិ។ ការពង្រឹងត្រួតពិនិត្យសារធាតុគីមីផ្សំ ទាំងស្របច្បាប់ និងមិនស្របច្បាប់។ ការរៀបចំបន្ថែមឲ្យមានការព្យាបាលដោយផ្អែកលើសហគមន៍នៅតាមមន្ទីរពេទ្យបង្អែក គោលដៅជនងាយរងគ្រោះ និងតាមមន្ទីរពេទ្យបង្អែកនៃខេត្តតាមព្រំដែន។ ចំពោះផែនការជាតិ ៥ឆ្នាំ នៅពេលកែសម្រួលរួច ត្រូវស្នើសុំការសម្រេចពីរាជរដ្ឋាភិបាល។
នៅខែសីហា ឆ្នាំ២០១២ អាជ្ញាធរជាតិប្រយុទ្ធប្រឆាំងគ្រឿងញៀនចាប់បានជនសង្ស័យរត់ពន្ធគ្រឿងញៀន ចំនួន ៦នាក់ ដែលភាគច្រើនជាស្រីថៃ គឺរឹបអូសបានគ្រឿនញៀនសរុបជាង ៣០គីឡូក្រាម ក្នុងនោះមានកូកាអ៊ីន (Cocain) ហេរ៉ូអ៊ីន (Heroin) និងមេតំហ្វេតាមីន (Methamphetamine) ដែលបាននាំចូលមកប្រទេសកម្ពុជា តាមច្រកអាកាសយានដ្ឋានអន្តរជាតិភ្នំពេញ។
នៅមុនការបង្ក្រាបនេះ នគរបាលប្រឆាំងគ្រឿងញៀនបានចាប់ខ្លួនជនសង្ស័យរត់ពន្ធគ្រឿងញៀនម្នាក់ និងរឹបអូសបានម្សៅសារធាតុផ្សំគ្រឿងញៀន និងសម្ភារៈផលិតគ្រឿងញៀន សរុបចំនួនជាង ៣០តោន ដឹកតាមកប៉ាល់ចូលមកកំពង់ផែ ខេត្តព្រះសីហនុ កន្លងទៅនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។