កសិករចិញ្ចឹមជ្រូកជាលក្ខណៈគ្រួសារ ត្អូញត្អែរពីតម្លៃជ្រូកចុះថោកក្នុងរដូវបុណ្យភ្ជុំបិណ្ឌ។ កសិករខ្លះត្រូវបង្ខំចិត្ដលក់ជ្រូកទាំងបានតម្លៃថោក ដើម្បីយកប្រាក់ចាត់ចែងក្នុងឱកាសបុណ្យទានផង និងដោះបំពុលដែលបានខ្ចីយកមកធ្វើដើមទុនចិញ្ចឹមជ្រូកផង។ បញ្ហានេះ កសិករស្ដីបន្ទោសឈ្មួញកណ្ដាលផង និងរដ្ឋាភិបាលដែលបើកឲ្យនាំចូលជ្រូកច្រើនពីក្រៅប្រទេសផង។
ក្រៅពីតម្លៃស្រូវ និងផលដំណាំមួយចំនួនចុះថោកក្នុងរយៈពេលចុងក្រោយនេះ កសិករចិញ្ចឹមជ្រូកក៏ខកចិត្តនឹងរឿងលក់ជ្រូកបានថោកដែរក្នុងរដូវកាន់បិណ្ឌនេះ។ កសិករសង្ស័យថា ឈ្មួញកណ្ដាលជាអ្នកក្រឡុកតម្លៃ ដោយកាលពីបុណ្យកាន់បិណ្ឌ និងភ្ជុំបិណ្ឌកន្លងទៅ ពួកគាត់លក់ជ្រូករស់ក្នុងមួយគីឡូក្រាមតម្លៃ ៨.៥០០រៀល ប៉ុន្តែឆ្នាំនេះលក់បានតែ ៧.៥០០រៀលក្នុងមួយគីឡូក្រាម។
កសិករម្នាក់នៅសង្កាត់ស្វាយអាត់ ក្រុងពោធិ៍សាត់ លោកស្រី លី សារិទ្ធិ ឲ្យដឹងនៅថ្ងៃទី២៤ ខែកញ្ញា ថា រូបគាត់ និងកសិករជាច្រើនគ្រួសារទៀតដែលចិញ្ចឹមជ្រូក សង្ឃឹមថាលក់បានចំណេញប្រាក់ខ្លះ ព្រោះនៅរដូវបុណ្យភ្ជុំចំណាំតែលក់បានថ្លៃ តែបែរជាជ្រូកមិនសូវមានតម្លៃទៅវិញ ដែលធ្វើឲ្យកសិករប្រឈមនឹងការជំពាក់បំណុល និងលែងចង់ចិញ្ចឹមជ្រូកបន្តទៅទៀត៖ « កាលមុន ជ្រូក លក់បាន ៨៥ ទៅ ៩០អី ( ៨ . ៥០០ រៀលទៅ ៩ . ០០០រៀល ) តែឥឡូវជ្រូកចុះថោក ហើយសូម្បីឈ្មួញដែលថាទិញយល់ព្រមក្នុងតម្លៃប៉ុណ្ណឹងហើយ មកយកហ្នឹង គាត់ថាអត់ មកវិញ ទេ »។
បើទោះបីជាតម្លៃជ្រូករស់របស់កសិករនៅខេត្តពោធិ៍សាត់ ថោក ប៉ុន្តែសាច់ជ្រូកលក់នៅលើទីផ្សារសព្វថ្ងៃមានតម្លៃថ្លៃ គឺចន្លោះពី ១៤.០០០រៀលទៅ ១៦.០០០រៀលក្នុងមួយគីឡូក្រាម។
ទាក់ទងបញ្ហានេះ ឈ្មួញទិញជ្រូកកាប់សាច់សម្រាប់លក់ពីខេត្តពោធិ៍សាត់ និងខេត្តបាត់ដំបង ដែលថ្លែងក្នុងលក្ខខណ្ឌសុំមិនបញ្ចេញឈ្មោះ បដិសេធថាឈ្មួញកណ្ដាលមិនបានបង្អាប់តម្លៃជ្រូកក្នុងស្រុកនោះទេ ប៉ុន្តែបរិមាណសាច់ជ្រូកមានច្រើនស្ទើរលើសតម្រូវការ ព្រោះជ្រូកនាំចូលពីក្រៅប្រទេសផង ជ្រូកកាប់សាច់លក់ក្នុងស្រុករបស់ក្រុមហ៊ុន ស៊ីភី (CP) ផង ហើយគាប់ជួនកសិករខ្មែរច្រើនលក់ជ្រូកក្នុងរដូវបុណ្យទានធំៗទៀត៖ « ជា រៀងរាល់ឆ្នាំ ពេលភ្ជុំអត់ ឡើងថ្លៃ ទេ ដោយសារកសិករ ម្នាក់ចាំលក់ពេលភ្ជុំ ពីរនាក់ចាំលក់ភ្ជុំអ៊ីចឹងទៅណាបង ។ ដល់ពេលដល់ថ្ងៃភ្ជុំអ៊ីចឹង យើងកាប់លក់អត់ទាន់ »។
អាស៊ីសេរី មិនអាចទាក់ទងប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តពោធិ៍សាត់ លោក ឡាយ ពិសិដ្ឋ ដើម្បីសុំការអត្ថាធិប្បាយជុំវិញបញ្ហានេះបានទេ នៅថ្ងៃទី២៤ ខែកញ្ញា។
អភិបាលរងខេត្តទទួលបន្ទុកវិស័យកសិកម្ម លោក ខូយ រីដា ថ្លែងថា នៅទូទាំងខេត្តពោធិ៍សាត់ ពុំមានកសិដ្ឋាន ឬក្រុមហ៊ុនចិញ្ចឹមជ្រូកនោះទេ មានតែកសិករចិញ្ចឹមក្នុង ១គ្រួសារប្រមាណបួន ឬប្រាំក្បាលប៉ុណ្ណោះ។ លោកបន្ថែមថា របបទីផ្សារសេរីលំបាកនឹងទប់ស្កាត់ការនាំចូលជ្រូក ឬបង្កើនតម្លៃជ្រូកក្នុងស្រុក ប៉ុន្តែកន្លងទៅ លោកមិនដែលឮការត្អូញត្អែររបស់កសិករចិញ្ចឹមជ្រូកនៅខេត្តពោធិ៍សាត់ ឡើយ៖ « ហើយគ្រួសារខ្លះចិញ្ចឹមពីរបី ក្បាលទៅ បួនប្រាំក្បាល ហើយសព្វថ្ងៃចំណុច ដែលយើង ផ្ដោតបំផុតហ្នឹង គឺខាង បច្ចេកទេសបសុព្យាបាល ដែលយើងកំពុងចុះពិនិត្យទាំង គោ ក្របី ជ្រូក មាន់ ទា តែដល់អារឿងតម្លៃទីផ្សារហ្នឹងយើងមិនទាន់មានថាយ៉ាងម៉េចនៅឡើយទេ »។
ប្រជាកសិករនៅខេត្តពោធិ៍សាត់ តែងតែចិញ្ចឹមជ្រូកមេបង្កើតកូនលក់ ឬចិញ្ចឹមជ្រូកសាច់សម្រាប់លក់។ ដើមទុនស្ទើរទាំងស្រុង ត្រូវខ្ចីបុលធនាគារ ឬត្រូវបណ្ដាក់ចំណីគេឲ្យជ្រូកស៊ីសិន ទម្រាំលក់បានលុយសងគេវិញ។ កសិករចិញ្ចឹមជ្រូកខ្លះអះអាងថា កន្លងទៅ រដ្ឋាភិបាលមិនឲ្យនាំជ្រូកចូលច្រើនគំហុកដូចបច្ចុប្បន្ន ទីផ្សារជ្រូករបស់កសិករខ្មែរលក់បានថ្លៃគួរសមអាចទ្រទ្រង់ជីវភាពគ្រួសារបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។