ទឹកទន្លេមេគង្គបន្តឡើងមិនឈប់ឈរ ហើយចំនួនមនុស្សស្លាប់ដោយសារគ្រោះទឹកជំនន់នេះក៏កើនដែរ។ ស្របពេលនេះដែរ ទឹកជំនន់ក៏ជន់លិចតំបន់ជាច្រើនទៀតធ្វើឲ្យទំហំនៃផលប៉ះពាល់នៃទឹកជំនន់កាន់តែខ្លាំងឡើង ក្នុងពេលដែលនៅតំបន់ផ្សេងទៀត កសិករខ្វះទឹកធ្វើស្រែ ក្នុងពេលរដូវវស្សាជិតផុតពេលទៅហើយនោះ។
អនុប្រធាននៃគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា ឲ្យដឹងថា ចំនួនមនុស្សស្លាប់ដោយសារជំនន់ទន្លេមេគង្គ បានកើនឡើងដល់ ២០នាក់ហើយមកទល់ថ្ងៃទី១០ សីហា នេះ។
លោកអះអាងថា នៅពេលនេះលោកកំពុងចុះទៅពិនិត្យស្ថានភាពទឹកជំនន់នៅខេត្តព្រៃវែង ដោយបន្ថែមថា តំបន់ដែលទឹកឡើងលិចក៏កើនឡើងច្រើនដែរ គិតចាប់តាំងពីពេលទឹកទន្លេឡើង កាលពីថ្ងៃទី១ សីហា មកទល់ថ្ងៃទី១០ សីហា នេះ គឺពេលមុននេះចំនួនតំបន់ជនលិចកើនឡើងពី ៥៧ មក ៦៣ស្រុក ខណ្ឌ និងក្រុង ព្រមទាំងចំនួនឃុំសង្កាត់បានកើនឡើងពី ៧៨ មក ៨៤ ឃុំសង្កាត់៖ «ស្លាប់មនុស្សថ្ងៃនេះថែមម្នាក់ទៀត នៅព្រៃវែង ឡើង ២០ (នាក់)។ ២០ ប្រុស ១៤ ស្រី ៦ ក្នុងហ្នឹងកុមារ ១០នាក់»។
លោក ញឹម វណ្ណដា ដែលជាទេសរដ្ឋមន្ត្រីដែរនោះ បន្តថា ផលប៉ះពាល់ទឹកជំនន់ឆ្នាំនេះ ជិតប្រហាក់ប្រហែលទឹកជំនន់ឆ្នាំ២០១៣ ដែរ តែលោកមិនទាន់អាចវាយតម្លៃកម្រិតនៃផលប៉ះពាល់បានភ្លាមទេ គ្រាន់តែធ្វើការវាយតម្លៃត្រួសៗថា ប៉ះពាល់ផលស្រូវរាប់ម៉ឺនហិកតារ ប្រជាពលរដ្ឋរាប់ម៉ឺនគ្រួសារ៖ «ការខូចខាតឃើញមនុស្ស ២០នាក់ ហើយស្រូវដំណាំរួមផ្សំតួលេខទាបជាងបន្តិច ប៉ុន្តែ ការខូចខាតគឺខ្ញុំមិនទាន់វាយតម្លៃបានទេ ប្រហែលក្រសួងជំនាញគាត់គិតគូរក្រោយ ប៉ុន្តែខ្ញុំគ្រាន់តែដឹងថា ប៉ះពាល់រាប់ម៉ឺនហិកតារស្រូវ ហើយប្រជាជនប៉ះពាល់គឺយើងនិយាយថា រាប់ម៉ឺនគ្រួសារដែរ»។
លោក ញឹម វណ្ណដា បន្តដូច្នេះ៖ «ប្រជាជន (ជម្លៀសទៅ) ទីទួលសុវត្ថិភាពម្សិលមិញគឺ ៨,៨៨៦គ្រួសារ ប៉ុន្តែថ្ងៃនេះឡើងដល់ជិតមួយម៉ឺនហើយនៅទីទួលសុវត្ថិភាព ហើយទីទួលសុវត្ថិភាពច្រើនជាងគេនៅស្រុកត្បូងឃ្មុំ ហើយខេត្តកំពង់ចាម ហើយថ្ងៃនេះ ខ្ញុំមកព្រៃវែង ឃើញឡើងដល់ជិត ៣០០គ្រួសារហើយ នៅទីទួលសុវត្ថិភាព ព្រោះផ្ទះប្រជាជនមានជាង ៤ម៉ឺនខ្នងដែលប៉ះពាល់ ហើយគោក្របី ៣ម៉ឺន គោបានទៅទីទួលសុវត្ថិភាព តាមវត្ត តាមថ្នល់ តាមស្ពាន»។
ជាទូទៅ ទឹកជំនន់ទន្លេមេគង្គ ច្រើនជនលិចក្នុងរវាងខែសីហា ដល់ខែតុលា ស្ទើររៀងរាល់ឆ្នាំនៅកម្ពុជា។ កាលពីឆ្នាំទៅមិញ ទឹកជំនន់បានធ្វើឲ្យមនុស្សស្លាប់ ១៦៨នាក់ និងប៉ះពាល់ពលរដ្ឋជិត ២លានគ្រួសារដែលភាគច្រើនស្ថិតនៅតាមដងទន្លេមេគង្គ នេះបើផ្អែកលើរបាយការណ៍គណៈកម្មាធិការជាតិគ្រប់គ្រងគ្រោះមហន្តរាយ។
ចំពោះទឹកជំនន់ឆ្នាំនេះ ក្រសួងធនធានទឹកនិងឧតុនិយម បានព្យាករថា ក្រៅពីជំនន់មេគង្គដូចសព្វមួយដង ក៏បណ្ដាលមកពីឥទ្ធិពលព្យុះ រ៉ាំម៉ាសាន់ នៅប្រទេសខ្សែទឹកខាងលើផង។
ទាក់ទងទៅនឹងជំនន់មេគង្គនេះ លោក ញឹម វណ្ណដា ព្រួយបារម្ភថា ទឹកនឹងអាចឡើងម្ដងទៀតនៅខែតុលា ដូចកាលពីឆ្នាំ២០១៣ ដែលអាចធ្វើឲ្យមានការប៉ះពាល់និងខូចខាតកាន់តែច្រើនឡើងថែមទៀត ស្របពេលនៅតំបន់នៃខេត្តដទៃទៀត កសិករកំពុងខ្វះទឹកធ្វើស្រែ ដូចជាខេត្តកំពង់ស្ពឺ តាកែវ កណ្ដាល ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។