មន្ត្រីបរិស្ថានខេត្តព្រះវិហារ ឃាត់ខ្លួនអ្នកកាប់ឈើ ៥នាក់បញ្ជូនទៅតុលាការពីបទកាប់ឈើខុសច្បាប់ក្នុងតំបន់អភិរក្សព្រៃព្រះរកា។ប្រធានមន្ទីរបរិស្ថានខេត្តព្រះវិហារ លោក អ៊ា សុខា មានប្រសាសន៍នៅថ្ងៃទី៣១ ខែតុលា ថា បុរសចំនួនប្រាំនាក់នោះឋិតក្នុងចំណោមមនុស្សចំនួន ១០នាក់ដែលត្រូវចាប់ខ្លួននៅពេលមន្ត្រីបរិស្ថានបានរួមគ្នាជាមួយបណ្ដាញព្រះសង្ឃឯករាជ្យ និងសហគមន៍ ចុះល្បាតព្រៃព្រះរកា ចាប់ផ្ដើមកាលពីថ្ងៃទី២៩ តុលា។
លោកបន្តថា លោករៀបចំឯកសារបញ្ជូនអ្នកទាំង ៥នាក់ទៅតុលាការ។ លោកឲ្យដឹងទៀតថា ពួកគេជាជនចំណូលថ្មីពីខេត្តកំពត ចូលមកកាប់ឈើក្នុងព្រៃព្រះរកា៖ « យើងបានរាយការណ៍ជូនព្រះរាជអាជ្ញាដោយផ្ទាល់មាត់រួចហើយ និងកំពុងបំពេញឯកសារបញ្ជូនទាំងសំណុំរឿង ទាំងជនល្មើសទៅព្រះរាជអាជ្ញាតែម្ដង »។
លោក សុខា បន្ថែមថា មានស្ត្រីម្នាក់ដែលត្រូវឃាត់ខ្លួនដែរនោះ បានរត់រួចខ្លួនទៅវិញ។ ចំណែកមនុស្ស ៤នាក់ទៀតកំពុងឋិតក្នុងការតាមដានសំណុំរឿង៖ « បើតាមច្បាប់ គាត់ធ្វើអាជីវកម្ម គឺយើងអនុវត្តទៅតាមនីតិវិធី។ បើយោងតាមច្បាប់ស្ដីពីតំបន់ការពារធម្មជាតិមាត្រា៦១ គឺគាត់កាប់ឈើនៅក្នុងតំបន់ការពារធម្មជាតិដែលជាឈើកម្រ ឬឈើដែលនឹងបាត់បង់ គឺគាត់ត្រូវមានទោសពី ១ឆ្នាំទៅ ៥ឆ្នាំ និងពិន័យជាប្រាក់។ ក្នុងករណីគាត់កាប់សម្រាប់លំនៅឋាន យើងខាងជំនាញឲ្យគាត់បញ្ជាក់ពីអាជ្ញាធរមូលដ្ឋានភូមិ ឃុំ ស្រុក ថាគាត់ពិតជាធ្វើផ្ទះសម្បែងមែន ចឹងគ្រាន់តែធ្វើកិច្ចសន្យាមួយ ហើយនឹងត្រូវដោះលែង »។
កាលពីថ្ងៃទី២៩ ខែតុលា មន្ត្រីបរិស្ថានចំនួន ៩នាក់បានចូលរួមជាមួយបណ្ដាញព្រះសង្ឃឯករាជ្យ និងសហគមន៍ចុះល្បាតព្រៃព្រះរកា ដែលមានទីតាំងនៅជាប់ស្រុកចំនួន៤ ក្នុងខេត្តព្រះវិហារ គឺស្រុកឆែប ស្រុកត្បែងមានជ័យ ស្រុកជាំក្សាន្ត និងស្រុកជ័យសែន។
ក្រៅពីចាប់ខ្លួនមនុស្ស គេរឹបអូសបានសម្ភារៈមួយចំនួនទៀតរួមមាន រណារយន្តចំនួន ៤គ្រឿង និងគោយន្តដឹកឈើចំនួន ៣គ្រឿង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។