ពលរដ្ឋរាប់រយគ្រួសារនៅក្រុងប៉ោយប៉ែតចោទក្រុមហ៊ុនអានកូថាលុបទ្វារទឹកបុរាណ
2017.01.03
អូរស្ពានបុរាណដែលក្រុមហ៊ុន អានកូ (ANCO) ចាក់ដីលុបនៅរមណីយដ្ឋានអូរខៃដន ភូមិសុខសាន្ត សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ ថ្ងៃទី១ ខែមករា ឆ្នាំ២០១៧។ Photo Provided
Photo Provided
ប្រជាពលរដ្ឋរាប់រយគ្រួសារនៅក្រុងប៉ោយប៉ែត ខេត្តបន្ទាយមានជ័យ ស្នើឲ្យអាជ្ញាធរខេត្ត ទប់ស្កាត់ក្រុមហ៊ុន អានកូ (ANCO) ឲ្យបញ្ឈប់ចាក់ដីលុបទ្វារទឹកបុរាណ ដើម្បីទប់យកទឹកនៅរមណីយដ្ឋានអូរខៃដន ធ្វើអាជីវកម្មជាប្រយោជន៍ផ្ទាល់ខ្លួនបន្តទៀត។ មេភូមិកូនដំរី អះអាងថា ប្រសិនបើក្រុមហ៊ុនបន្តបិទប្រឡាយទឹកនោះ នឹងធ្វើឲ្យពលរដ្ឋនៅតំបន់នោះគ្មានទឹកធ្វើស្រែចម្ការដោះស្រាយជីវភាពប្រចាំថ្ងៃឡើយ។
ប្រជាពលរដ្ឋនៅតំបន់រមណីយដ្ឋានអូរខៃដន ក្រុងប៉ោយប៉ែត កំពុងព្រួយបារម្ភខ្លាចដាច់ពោះស្លាប់ ដោយសារមិនអាចធ្វើស្រែដោះស្រាយជីវភាពគ្រួសារបាន។
មេភូមិកូនដំរី សង្កាត់និមិត្ត ក្រុងប៉ោយប៉ែត លោក អម វ៉ន ឲ្យដឹងនៅថ្ងៃទី៣ មករា ថា ប្រជាពលរដ្ឋនៅក្នុងភូមិ រួមទាំងលោកផង ប្រឆាំងដាច់ខាតមិនឲ្យក្រុមហ៊ុនអានកូន (ANCO) របស់លោកឧកញ៉ា កុក អាន ចាក់ដីលុបទ្វារទឹកបុរាណនៅរមណីយដ្ឋានអូរខៃដន នោះឡើយ។ លោកអះអាងថា មូលហេតុដែលហាមឃាត់ ដោយសារប្រឡាយទឹកនោះជាប្រភពសំខាន់សម្រាប់បង្ហូរទឹកស្រោចស្រពផលដំណាំរបស់ពលរដ្ឋ៖ «គេទាមទារចង់បានឲ្យក្រុមហ៊ុនកាយសំណង់ឡើងវិញ ហើយធ្វើយ៉ាងណាកុំឲ្យប៉ះពាល់ទៅដល់ការធ្វើស្រែចម្ការរបស់ប្រជាពលរដ្ឋ»។
អាស៊ីសេរី ពុំអាចទាក់ទងតំណាងក្រុមហ៊ុន អានកូន និងអភិបាលក្រុងប៉ោយប៉ែត ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី៣ មករា។
ចៅសង្កាត់និមិត្ត លោក ប៉ាល់ សេដ្ឋា ទទួលស្គាល់ថា ប្រជាពលរដ្ឋរស់នៅសង្កាត់និមិត្ត រាប់ពាន់គ្រួសារ ពិតជាជួបការលំបាកខ្វះទឹកធ្វើស្រែ ដោយសារក្រុមហ៊ុន អានកូ (ANCO) បិទទ្វារបង្ហូរទឹកនៅអូរខៃដន ប្រាកដមែន។ លោកបន្ថែមថា បញ្ហានេះកន្លងមក លោកធ្លាប់ស្នើទៅអាជ្ញាធរក្រុងប៉ោយប៉ែត ឲ្យជួយអន្តរាគមន៍ទៅខាងក្រុមហ៊ុនមួយនេះ ដើម្បីបើកទ្វារទឹកឡើងវិញដែរ ប៉ុន្តែគ្មានដំណោះស្រាយ៖ «ខ្ញុំចង់ឲ្យក្រុមហ៊ុននោះដោះស្រាយ ឬក៏ធ្វើប្រព័ន្ធទឹកត្រង់ណាកុំឲ្យមានផលប៉ះពាល់ដល់ប្រជាពលរដ្ឋ ដើម្បីឲ្យពួកគាត់យកទឹកប្រើប្រាស់សម្រាប់បង្កបង្កើនផល»។
កាលពីថ្ងៃទី១ មករា កន្លងទៅ មេភូមិកូនដំរី និងប្រជាពលរដ្ឋរស់នៅសង្កាត់និមិត្ត ប្រមាណ ៧០នាក់ បានលើកគ្នាតវ៉ានៅទីតាំងទ្វារបង្ហូរទឹកនោះ ដើម្បីទទូចឲ្យក្រុមហ៊ុន អានកូន បើកទ្វារទឹកឡើងវិញ តែពុំទទួលបានលទ្ធផលនោះទេ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា កត់សម្គាល់ថា ក្រុមហ៊ុន អានកូន បិទទ្វារទឹកអូរខៃដន ដើម្បីយកទឹកទៅផ្គត់ផ្គង់ក្រុងប៉ោយប៉ែត ហើយបានផលចំណេញជាប្រយោជន៍ផ្ទាល់ខ្លួន។ លោកបន្ថែមថា ប្រសិនបើក្រុមហ៊ុនមួយនេះនៅតែបន្តបិទទ្វារទឹកនោះទៀត នឹងប៉ះពាល់ធ្ងន់ធ្ងរដល់របរធ្វើស្រែចម្ការរបស់ពលរដ្ឋនៅតំបន់នោះ៖ «ក្រុមហ៊ុននេះធ្វើហាក់ដូចជាមានអំណាចខ្លាំង ហើយមិនគិតពីផលរស់រានមានជីវិតរបស់ពលរដ្ឋទេ។ អ៊ីចឹងខ្ញុំគិតថា អភិបាលខេត្តបន្ទាយមានជ័យ ប្រហែលជាលោកបានដឹងបញ្ហានេះ នឹងយកទៅដោះស្រាយឲ្យបានទាន់ពេលវេលាជូនប្រជាពលរដ្ឋ ព្រោះក្រុមហ៊ុនដើម្បីតែប្រយោជន៍មនុស្សម្នាក់ ប៉ុន្តែពលរដ្ឋក្រីក្ររាប់ម៉ឺននាក់ដែលត្រូវការទឹក គឺពួកគាត់នឹងក្លាយទៅជាអ្នកក្រកាន់តែខ្លាំង»។
របាយការណ៍របស់ចៅសង្កាត់និមិត្ត បង្ហាញថា ពលរដ្ឋចំនួន ៧ភូមិស្មើនឹងប្រមាណ ២ពាន់គ្រួសារ និងមានផ្ទៃដីសរុបជាង ៧ពាន់ហិកតារ ខ្វះទឹកដាក់ស្រែរៀងរាល់ឆ្នាំ ដោយសារក្រុមហ៊ុនបិទទ្វារបង្ហូរទឹកនៅទីនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ