ថ្នាក់ដឹកនាំស្ថាប័នពាក់ព័ន្ធនាខេត្តព្រះសីហនុ សហការគ្នាចុះជួយផ្តល់ទឹកប្រើប្រាស់ និងទឹកផឹកជូនប្រជាពលរដ្ឋដែលខ្វះទឹកប្រើប្រាស់ប្រចាំថ្ងៃ។ មន្ត្រីស្ថាប័នទាំងនោះអះអាងថា នឹងមិនទុកឲ្យពលរដ្ឋនៅតាមគ្រួសារណាមួយរងគ្រោះដោយខ្វះទឹកនោះទេ ហើយអំពាវនាវដល់សប្បុរសជន មានវិស័យឯកជន ចូលរួមសហការធ្វើការងារមនុស្សធម៌នេះជាមួយរដ្ឋាភិបាល។
ស្នងការនគរបាលខេត្តព្រះសីហនុ គឺលោកឧត្តមសេនីយ៍ទោ ជួន ណារិន្ទ ផ្តល់បទសម្ភាសន៍ដល់វិទ្យុអាស៊ីសេរី នៅថ្ងៃពុធ ទី២៧ ខែមេសា ថា កម្លាំងនគរបាលស្ថាប័ននេះកំពុងអនុវត្តតាមការណែនាំរបស់ថ្នាក់ដឹកនាំក្រសួងមហាផ្ទៃ និងប្រមុខដឹកនាំ ដោយរាល់ថ្ងៃនេះកំពុងមមាញឹកចុះផ្តល់ទឹកប្រើប្រាស់ និងទឹកទទួលទានជូនប្រជាពលរដ្ឋនៅតាមមូលដ្ឋាននានាដែលខ្វះទឹក។
លោកបន្តថា កម្លាំងក្រោមឱវាទស្នងការដ្ឋានទាំង ៤ក្រុង-ស្រុក បានបន្តការងារមនុស្សធម៌ដឹកទឹកចុះចែកជូនពលរដ្ឋដោយយកចិត្តទុកដាក់។
លោក ជួន ណារិន្ទ បញ្ជាក់ថា ក្នុងមួយសប្ដាហ៍នេះ កម្លាំងនគរបាលដឹកទឹកចែកជូនពលរដ្ឋបានរាប់សែនលីត្រ និងទឹកផឹករាប់ម៉ឺនយួរ។ ជាងនេះទៀត ក៏បានដឹកទឹកចាក់ស្តុកចូលទៅក្នុងអណ្ដូងរបស់ប្រជាពលរដ្ឋនៅតាមសហគមន៍នីមួយៗ បន្ថែមពីលើការផ្តល់ជូននៅតាមផ្ទះពលរដ្ឋ។ លោកបន្តថា នៅថ្ងៃទី២៧ ខែមេសា កម្លាំងនគរបាលរបស់លោក បានដឹកទឹកប្រើប្រាស់ជិត ២ម៉ឺនលីត្រ និងទឹកទទួលទានជាង ៥០០យួរ ឬកេះ យកទៅចែកជូនប្រជាពលរដ្ឋជាង ២០០គ្រួសារនៅភូមិកំពង់ស្មាច់តូច ឃុំទឹកល្អក់ ស្រុកព្រៃនប់ ដែលដង្ហោយរកការសង្គ្រោះពីអាជ្ញាធរ៖ « ថ្ងៃនេះទឹកប្រើប្រាស់ គឺយើងបានត្រៀម ៤ឡាន ដើម្បីយកទៅចែកជូនពលរដ្ឋនៅឃុំទឹកល្អក់ ស្រុកព្រៃនប់ ដែលខ្វះទឹក ហើយសំណូមពរដល់ស្នងការនគរបាលខេត្តព្រះសីហនុ ជួយសង្គ្រោះ។ ក្នុងនោះក៏បាននាំយកទឹកសុទ្ធជាង ៥០០យួរទៅចែកជូនពលរដ្ឋកំពុងជួបការខ្វះទឹកប្រើប្រាស់នេះថែមទៀត។ ក្រៅពីផ្តល់ទឹកកម្លាំង ស្នងការនគរបាលខេត្តនេះក៏បានផ្តល់ជាថវិកា និងគ្រឿងហូបចុកមួយចំនួនដល់ពលរដ្ឋថែមទៀត »។
ការងារមនុស្សធម៌នេះ លោកស្នងការ ជួន ណារិន្ទ អះអាងថា នឹងបន្តចុះអនុវត្តឲ្យបានជាប្រចាំ ដោយមិនទុកឲ្យពលរដ្ឋនៅតាមមូលដ្ឋានណាមួយរងគ្រោះបណ្ដាលមកពីការខ្វះទឹកនោះទេ ហើយស្នើដល់វិស័យឯកជន និងសប្បុរសជន ឲ្យចូលរួមការងារមនុស្សធម៌នេះជាមួយអាជ្ញាធរ។
បញ្ហាប្រឈមនៃការខ្វះទឹកនាមូលដ្ឋានខេត្តព្រះសីហនុ លោក ជួន ណារិន្ទ ក៏បានដាក់បទបញ្ជាទៅគ្រប់កម្លាំងសមត្ថកិច្ចនគរបាលនៅតាមឃុំ-សង្កាត់នានា ឲ្យយកចិត្តទុកដាក់ និងផ្តល់ព័ត៌មានពីការខ្វះទឹករបស់ប្រជាពលរដ្ឋ មកស្នងការឲ្យបានឆាប់ ដើម្បីមានវិធានការសង្គ្រោះពលរដ្ឋឲ្យបានទាន់ពេលវេលា៖ « នៅឃុំសំរុង គឺយើងបានចែកទឹកអស់ជាង ១ម៉ឺនលីត្រ។ នៅឃុំតានៃ អស់ទឹកជាង ១ម៉ឺនលីត្រ និងនៅឃុំអូរជ្រៅ អស់ទឹកជាង ៣ម៉ឺនលីត្រនាមូលដ្ឋានស្រុកព្រៃនប់ ដោយប្រើប្រាស់រថយន្តដឹកទឹកជិត ២០ជើង។ ហើយកាលពីថ្ងៃទី២៦ ខែមេសា នៅតំបន់ទំនប់រលកក្នុងសង្កាត់លេខ១ ក្រុងព្រះសីហនុ គឺយើងបានជាង ១ម៉ឺនលីត្រយកទៅចែកជូនពលរដ្ឋខ្វះទឹកនៅតំបន់នោះ »។
អភិបាលស្រុកព្រៃនប់ លោក ទិត្យ វុទ្ធី មានប្រសាសន៍ថា ពលរដ្ឋមូលដ្ឋាននេះពិតជាកំពុងប្រឈមការខ្វះទឹកប្រើប្រាស់ និងទឹកទទួលទានពិតមែន។ លោកថា បញ្ហាខ្វះខាតទឹកនេះ ទាំងថ្នាក់ដឹកនាំខេត្តព្រះសីហនុ និងថ្នាក់ដឹកនាំនៅតាមស្ថាប័នពាក់ព័ន្ធខេត្តនេះ មានកម្លាំងស្នងការដ្ឋាននគរបាល និងកម្លាំងកងរាជអាវុធហត្ថខេត្តព្រះសីហនុ ជាដើម កំពុងយកចិត្តទុកដាក់ជួយសង្គ្រោះពលរដ្ឋដោយបានដឹកទឹកចែកជូនពលរដ្ឋរាប់សែនលីត្រ សម្រាប់ចែកជូនពលរដ្ឋខ្វះទឹក។ លោក ទិត្យ វុទ្ធី បន្តថា ការងារមនុស្សធម៌ជួយដល់ពលរដ្ឋនៅតាមមូលដ្ឋានខ្វះទឹកប្រើប្រាស់ និងទឹកទទួលទាននេះ មានទាំងវិស័យឯកជនក៏បានចូលរួមដែរ ក្នុងនោះក៏មានអគ្គនាយកកំពង់ផែស្វយ័តខេត្តព្រះសីហនុ លោក លូ គឹមឈុន ក៏បានចូលរួមដែរ៖ « ការងារសង្គ្រោះទឹកពលរដ្ឋដែលខ្វះទឹក គឺត្រឹមថ្ងៃទី២៦ ខែមេសា មានជិត ៦សែនលីត្រ ដែលអាជ្ញាធរស្ថាប័នពាក់ព័ន្ធ បានដឹកទឹកយកទៅចែកជូនពលរដ្ឋខ្វះទឹកនៅតាមឃុំមួយចំនួននាស្រុកព្រៃនប់។ ចំនួននេះ គឺស្មើប្រមាណជិត ៣ . ៥០០គ្រួសារដែលអាជ្ញាធរបានផ្គត់ផ្គង់ទឹកបានទាន់ពេល។ ក្នុងនោះទឹកបរិសុទ្ធមានចំនួនជិត ៤ពាន់យួរ ឬកេះ យកទៅចែកជូនពលរដ្ឋខ្វះទឹកទទួលទាន និងបានចែកជូនប៊ីដុងទឹករាប់រយធុង »។
ផ្ដើមពីកង្វល់នេះ អភិបាលស្រុកព្រៃនប់ លោក ទិត្យ វុទ្ធី ក៏អំពាវនាវដល់ដៃគូអភិវឌ្ឍន៍ ឬសប្បុរសជននានា ស្នើឲ្យចូលរួមការងារមនុស្សធម៌សង្គ្រោះពលរដ្ឋដែលកំពុងជួបប្រទះកង្វល់ខ្វះទឹកប្រើប្រាស់ និងទឹកទទួលទានជាមួយអាជ្ញាធរឲ្យបានស្រុះគ្នា។
ទាក់ទិនបញ្ហានេះ អភិបាលខេត្តព្រះសីហនុ លោក យន្ត មីន មានប្រសាសន៍ថា មូលដ្ឋាននេះពិតជាមានពលរដ្ឋនៅតាមតំបន់ឆ្ងាយពីទីប្រជុំជនភាគច្រើនខ្វះទឹកប្រើប្រាស់ និងទឹកទទួលទានពិតមែន។ ប៉ុន្តែកង្វះខាតនេះ លោកថា អាជ្ញាធរគ្រប់ស្ថាប័នក្រោមឱវាទខេត្ត បានយកចិត្តទុកដាក់ ហើយបានប្រើរថយន្តដឹកទឹកផ្គត់ផ្គង់ និងចែកជូនពលរដ្ឋដល់មូលដ្ឋានបានទាន់ពេល។
លោក យន្ត មីន អះអាងថា អាជ្ញាធរស្ថាប័នពាក់ព័ន្ធ កំពុងតាមដាន និងយកចិត្តទុកដាក់ការងារសង្គ្រោះពលរដ្ឋខ្វះទឹកនាមូលដ្ឋានជាប់សមុទ្រមួយនេះ ដោយមិនធ្វេសប្រហែសទេ។ ហើយបើមានព័ត៌មានទាក់ទងប្រជាពលរដ្ឋមូលដ្ឋានណាមួយខ្វះទឹកប្រើប្រាស់ ត្រូវផ្តល់ដំណឹងនេះមកអាជ្ញាធរដែលនៅជិតឲ្យបានឆាប់ ដើម្បីឈានដល់ជួយសង្គ្រោះ ឬផ្តល់ទឹកជូនពលរដ្ឋឲ្យបានទាន់ពេល៖ « នៅគ្រប់ក្រុង - ស្រុក ឬតាមសង្កាត់ - ឃុំ គឺយើងបានចាត់ចែងក្នុងការងារជួយសង្គ្រោះពលរដ្ឋខ្វះទឹកនេះឲ្យទទួលខុសត្រូវ និងរាយការណ៍ជូនថ្នាក់ដឹកនាំតាមក្រុង - ស្រុក ឲ្យបានឆាប់ និងដឹកទឹកទៅសង្គ្រោះពលរដ្ឋឲ្យបានទាន់ពេលវេលា។ បញ្ហាខ្វះទឹកនេះ មិនជាបញ្ហាអ្វីទេ គឺអាជ្ញាធរខេត្តព្រះសីហនុ គ្រប់គ្រងដោយការទទួលខុសត្រូវខ្ពស់ ដោយមិនទុកឲ្យពលរដ្ឋនៅតាមគ្រួសារនីមួយៗខ្វះទឹកប្រើប្រាស់ ឬខ្វះទឹកទទួលទាននោះទេ »។
ទាក់ទិនបញ្ហានេះ លោកស្នងការនគរបាលខេត្តព្រះសីហនុ លោក ជួន ណារិន្ទ បានអះអាងថា កម្លាំងជំនាញរបស់លោក បានត្រៀមទាំងកម្លាំង សម្ភារៈ និងមធ្យោបាយគ្រប់ចំនួន ដើម្បីចុះជួយពលរដ្ឋនៅតាមមូលដ្ឋាននានាដែលខ្វះទឹកឲ្យបានទាន់តម្រូវការ។ លោកឧត្តមសេនីយ៍ទោ ជួន ណារិន្ទ បញ្ជាក់ថា ចាប់ពីថ្ងៃទី២៣ ខែមេសា មក កម្លាំងនគរបាលស្ថាប័ននេះបានដឹកជញ្ជូនទឹកប្រើប្រាស់ និងទឹកទទួលទាន ទៅចែកជូនប្រជាពលរដ្ឋនៅតាមឃុំ-សង្កាត់មួយចំនួននាខេត្តព្រះសីហនុ ដែលខ្វះទឹកមានដូចជា សង្កាត់លេខ១ ឃុំសំរុង ឃុំជើងគោ ឃុំអូរជ្រៅ និងឃុំទឹកល្អក់ ជាដើម។ ក្រៅពីផ្តល់ទឹក អាជ្ញាធរក៏បានផ្តល់ជាថវិកា និងគ្រឿងឧបភោគបរិភោគមួយចំនួនដល់ប្រជាពលរដ្ឋទីទ័លក្រថែមទៀត៖ « សូមអំពាវនាវដល់សប្បុរសជនចូលរួមការងារមនុស្សធម៌នេះឲ្យបានទាំងអស់គ្នា ព្រោះជាកិច្ចការងាររបស់យើងទាំងអស់គ្នា។ បញ្ហានេះ ខ្ញុំក៏បានដាក់ផែនការដល់នគរបាលនៅតាមសង្កាត់ - ឃុំទាំង ៤ក្រុង - ស្រុកឲ្យយកចិត្តទុកដាក់ និងផ្តល់ព័ត៌មានពីតាមមូលដ្ឋានដែលខ្វះទឹកឲ្យជួយសង្គ្រោះបន្ទាន់ និងរាយការណ៍មកស្នងការ ដើម្បីដឹកទឹកទ្រង់ទ្រាយធំទៅចែកជូនពលរដ្ឋដល់មូលដ្ឋានឲ្យបានតាមតម្រូវការ »។
ទាក់ទងបញ្ហានេះ លោកនាយករដ្ឋមន្ត្រី ហ៊ុន សែន កាលពីថ្ងៃទី២៦ ខែមេសា បានបញ្ជាឲ្យអាជ្ញាធរគ្រប់ជាន់ថ្នាក់នៅទូទាំងប្រទេស ឲ្យរួមសហការគ្នាប្រើយុទ្ធនាការដឹកទឹកចែកជូនប្រជាពលរដ្ឋ ដោយមិនត្រូវទុកឲ្យប្រជាពលរដ្ឋណាម្នាក់ជួបគ្រោះថ្នាក់ដោយសារបញ្ហាខ្វះទឹកនោះទេ។ ប្រមុខរដ្ឋាភិបាល បានប្រកាសអាសន្នថា ឆ្នាំនេះបញ្ហាខ្វះទឹកកំពុងស្ថិតក្នុងស្ថានការណ៍គ្រោះមហន្តរាយដល់ប្រជាពលរដ្ឋនៅទូទាំងប្រទេស។
ប្រមុខដឹកនាំលើកឡើងដូច្នេះ នៅក្នុងពិធីសម្ពោធដាក់ឲ្យប្រើប្រាស់ផ្លូវជាតិលេខ៥៦ ចាប់ពីក្រុងសិរីសោភ័ណ ខេត្តបន្ទាយមានជ័យ ទៅក្រុងសំរោង ខេត្តឧត្តរមានជ័យ កាលពីថ្ងៃទី២៦ ខែមេសា។ ជាងនេះទៀត លោកនាយករដ្ឋមន្ត្រី ហ៊ុន សែន ក៏ប្រកាសមិនឲ្យក្រសួងនានាកោះហៅអភិបាលខេត្តនៅតាមខេត្តនីមួយៗ មកប្រជុំនៅភ្នំពេញទៀតទេ ដោយទុកពេលវេលាឲ្យអភិបាលតាមខេត្តទាំងនោះ បន្តប្រើយុទ្ធនាការដឹកទឹកចែកជូន ឬសង្គ្រោះប្រជាពលរដ្ឋខ្វះទឹកឲ្យទាន់តម្រូវការ។ បញ្ហាខ្វះទឹកនេះ ប្រមុខដឹកនាំរាជរដ្ឋាភិបាល ក៏បានអំពាវនាវឲ្យវិស័យឯកជន និងគណបក្សនយោបាយនានា ត្រូវចូលរួមបរិច្ចាគទាំងទឹក និងថវិកា ជួយសង្គ្រោះប្រជាពលរដ្ឋដែលកំពុងរងគ្រោះខ្វះទឹកឲ្យបានទាំងអស់គ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។