នៅក្នុងពេលដែលមានការចែកអំណោយដោយស្ថាប័នរដ្ឋ ជូនចំពោះអ្នករងគ្រោះដោយសារទឹកជំនន់ មានសប្បុរសជនមួយចំនួនក៏បានប្រមូលគ្នា ដើម្បីរៃអង្គាសសម្ភារៈ និងប្រាក់កាសដើម្បីចូលរួមចំណែកជួយសម្រាលទុក្ខលំបាករបស់អ្នករងគ្រោះ ដោយសារទឹកជំនន់ដែរ។
តំណាងសប្បុរសជនម្នាក់ក្នុងចំណោម ៥នាក់ លោក ឡេង សំណាង មានប្រសាសន៍នៅថ្ងៃទី១៥ ខែតុលា ថា ពិធីចែកអំណោយ គឺធ្វើឡើងនៅភូមិបឹងក្រាញ់ ក្នុងឃុំកញ្ជរ ហើយនៅក្នុងសកម្មភាពចែកអំណោយនោះ ក៏មានការចូលរួមពីអាជ្ញាធរភូមិឃុំ មន្ត្រីគណបក្សសង្គ្រោះជាតិ និងលោកបណ្ឌិត ឡៅ ម៉ុងហៃ ផងដែរ៖ «ក្នុង១គ្រួសារ គឺអង្ករ ១០គីឡូ ក្រមា១ ឆៃប៉ូវផ្អែមហ្នឹង ១ថង់ ទឹកស៊ីអ៊ីវ ១ដប ហើយនិងថ្នាំពេទ្យ និងខោអាវមួយចំនួន។ ខាងខ្ញុំពិភាក្សាគ្នាថានឹងធ្វើបន្តទៅទៀត ប្រសិនបើយើងខ្ញុំមានលទ្ធភាពប្រមូលថវិកាបានដូចពេលហ្នឹងទៀត យើងខ្ញុំនឹងធ្វើតទៅទៀតក្នុងនាមខ្មែរជួយខ្មែរ»។
លោកបញ្ជាក់ថា តាមតួលេខដែលលោកទទួលបាន មានប្រជាពលរដ្ឋរងគ្រោះដោយសារទឹកជំនន់មកពីឃុំចំនួន២ គឺឃុំស្យា និងឃុំកញ្ជរ នៃស្រុកកណ្ដៀង ចំនួន ៦២០គ្រួសារ ក៏ប៉ុន្តែខាងលោកបានត្រៀមកញ្ចប់អំណោយលើសពីចំនួននេះ។
ប្រធានក្រុមការងារខេត្តពោធិ៍សាត់ នៃគណបក្សសង្គ្រោះជាតិ លោក យ៉ាន់ សេងហ៊ត មានប្រសាសន៍ថា សកម្មភាពចុះចែកនេះក៏មានបេក្ខជនជាប់ឆ្នោតជាតំណាងរាស្ត្រប្រចាំមណ្ឌលខេត្តពោធិ៍សាត់ លោក ងឹម ញ៉េង ព្រមទាំងមន្ត្រីថ្នាក់ខេត្ត និងស្រុកមួយចំនួនផងដែរ បានចូលរួមក្នុងសកម្មភាពចុះចែកនេះ ក៏ប៉ុន្តែលោកបញ្ជាក់ថា នេះមិនមែនជាអំណោយរបស់គណបក្សសង្គ្រោះជាតិ នោះទេ៖ «ទៅនេះ យើងអត់មានសម្ដែងចេញថាអំណោយរបស់គណបក្សអីទេ គឺសប្បុរសជន។ ប៉ុន្តែ តាមរយៈអ្នកស្គាល់តាមគណបក្សហ្នឹង ហើយការអញ្ជើញឈ្មោះហ្នឹង គឺយើងឲ្យក្រុមការងារនៅឃុំធ្វើអត់ឲ្យមានការរើសអើង គឺអ្នកដែលអត់ពិតប្រាកដ នៅក្នុងនោះក៏មានអ្នកគាំទ្រគណបក្សប្រជាជន មានដល់មេភូមិ មានអនុភូមិផង ប៉ុន្តែពីម្សិលមិញ គាត់បានប្រាប់មកថា គេមានការប្រជុំមិនឲ្យមកយក»។
គណៈអភិបាលស្រុកកណ្ដៀង លោក សុខ លីមុត បានថ្លែងសាទរចំពោះសកម្មភាពចែកអំណោយនេះថា លោកមិនខ្វល់ពីការកេងចំណេញផ្នែកនយោបាយរបស់គណបក្សខាងណានោះទេ រឿងដែលសំខាន់ គឺប្រជាពលរដ្ឋរងគ្រោះបានទទួលអំណោយពីសប្បុរសជន៖ «ស្រកមួយចំនួន ហើយនៅសល់មួយចំនួន ទឹកទន្លេអត់ទាន់ថយ។ ឥឡូវ បងរដ្ឋមន្ត្រីគាត់ថាឲ្យធ្វើសំណើសុំស្រូវពូជ ដើម្បីនៅពេលដែលស្រកទៅ ប្រជាពលរដ្ឋលោកបង្កបង្កើនផលស្រូវរដូវប្រាំង»។
លោកបានរំលឹកថា កាលពីថ្ងៃទី១១ ខែតុលា ក្រុមសម្ព័ន្ធយុវជនកម្ពុជា ក៏ធ្លាប់បានចុះចែកអំណោយស្រដៀងគ្នានេះ ដល់ប្រជាពលរដ្ឋរងគ្រោះជាង ៦០០គ្រួសារ នៅក្នុងស្រុករបស់លោក។
អាជ្ញាធរស្រុកកណ្ដៀង បញ្ជាក់ថា នៅស្រុកកណ្ដៀង មានឃុំចំនួន៩ ក្នុងនោះមានឃុំចំនួន៦ គឺឃុំកញ្ជរ ឃុំស្យា កណ្ដៀង ស្រែស្ដុក អន្លង់វិល និងឃុំកោះជុំ បានលិចលង់ធ្ងន់ធ្ងរជាងគេ ហើយរហូតមកដល់ថ្ងៃនេះ ទឹកជំនន់នៅមិនទាន់ស្រកផុតពីលំនៅឋាន និងដីស្រែកសិកម្មរបស់ប្រជាពលរដ្ឋទាំងស្រុងនៅឡើយទេ ហើយទំហំនៃការខូចខាតទៅលើផ្ទៃដីកសិកម្មមានជាង ៧០០ហិកតារ ក្នុងនោះមានសាលារៀនចំនួន ៧កន្លែង និងមណ្ឌលសុខភាព១ ក៏ទទួលរងនូវផលប៉ះពាល់ផងដែរ។
ទាក់ទងទៅនឹងសកម្មភាពចែកអំណោយដល់ប្រជាពលរដ្ឋរងគ្រោះ ដោយសារទឹកជំនន់ក្នុងខេត្តពោធិ៍សាត់ នៅថ្ងៃទី១៥ ខែតុលា នេះដែរ មានក្រុមសប្បុរសធម៌ប្រទេសអាល្លឺម៉ង់ មួយក្រុមទៀត ដែលដឹកនាំដោយយុវតីអាយុ ២៣ឆ្នាំម្នាក់ ឈ្មោះ ទិត សុខហេង បាននាំយកអំណោយជាអង្ករចំនួន ២តោន និងមីចំនួន ២០០កេស ទៅចែកជូនប្រជាពលរដ្ឋក្រីក្រ និងរងគ្រោះដោយសារទឹកជំនន់ចំនួន ២០០គ្រួសារ នៅភូមិចំនួន៣ គឺភូមិចម្ការលើ ភូមិវត្តជ្រេ និងភូមិខ្នាចរមាស នៃឃុំបឹងខ្នារ ស្រុកក្រគរ ខេត្តពោធិ៍សាត់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។