ផលិតករបរទេសដែលផលិតខ្សែភាពយន្តឯកសារស្ដីពីជីវិតរបស់អតីតអ្នកការពារធនធានធម្មជាតិ លោក ឈុត វុទ្ធី ដែលត្រូវបានឃាតកបាញ់សម្លាប់កាលពីឆ្នាំ២០១២ សម្ដែងការហួសចិត្តចំពោះក្រសួងវប្បធម៌ និងវិចិត្រសិល្បៈ ដែលមិនអនុញ្ញាតឲ្យពួកគេបញ្ចាំងខ្សែភាពយន្តនេះតាមការគ្រោងទុក នៅមជ្ឈមណ្ឌលមេត្តាហោស៍ (Meta House)។ ក្រសួងវប្បធម៌ និងវិចិត្រសិល្បៈ អះអាងថា មជ្ឈមណ្ឌលមេត្តាហោស៍ មិនបានសុំច្បាប់ពីក្រសួងជាមុនឡើយ។
ពលរដ្ឋខ្មែរ និងជនបរទេសដែលគ្រោងចូលរួមទស្សនាខ្សែភាពយន្តឯកសារ ស្ដីពីជីវិតរបស់ លោក ឈុត វុទ្ធី នៅថ្ងៃទី២០ មេសា នឹងមិនបានទស្សនាដូចបំណងឡើយ ដោយសារតែការហាមប្រាមមិនឲ្យបញ្ចាំងរបស់ក្រសួងវប្បធម៌ និងវិចិត្រសិល្បៈ។
អ្នកនាំពាក្យក្រសួងវប្បធម៌ និងវិចិត្រសិល្បៈ លោក ថៃ នរៈសត្យា ថ្លែងនៅថ្ងៃទី១៨ មេសា ថា មូលហេតុដែលក្រសួងមិនអនុញ្ញាតឲ្យមជ្ឈមណ្ឌលមេត្តាហោស៍ ដាក់បញ្ចាំងភាពយន្ត លោក ឈុត វុទ្ធី ដោយសារមេត្តាហោស៍ មិនបានសុំអនុញ្ញាតច្បាប់ពីក្រសួង។ លោកថា ទង្វើនេះ គឺផ្ទុយទៅនឹងច្បាប់របស់កម្ពុជា និងអនុស្សរណៈនៃការយោគយល់គ្នា (MOU) ចុះរវាងក្រសួងវប្បធម៌ និងមជ្ឈមណ្ឌលមេត្តាហោស៍ ក្នុងពេលកន្លងទៅ។
លោក ថៃ នរៈសត្យា បញ្ជាក់ថា ការមិនអនុញ្ញាតនេះ គឺមិនមានពាក់ព័ន្ធទៅនឹងរឿងអ្វីផ្សេង ក្រៅតែពីផ្លូវច្បាប់ឡើយ។ មានន័យថា វាមិនមែនដោយសារ លោក ឈុត វុទ្ធី គឺជាសកម្មជនការពារបរិស្ថាន ដែលធ្លាប់រិះគន់សកម្មភាពរបស់រដ្ឋាភិបាល ឬដោយសារជាប់ពាក់ព័ន្ធរឿងនយោបាយអ្វីនោះទេ៖ « ធម្មតាការបញ្ចាំងខ្សែភាពយន្តនីមួយៗ យើងមិនដែលមានការចង្អៀតចង្អល់ទេ។ យើងគ្រាន់តែចង់សុំឲ្យមានការត្រួតពិនិត្យនូវអ្វីដែលជាមូលដ្ឋានច្បាប់ ដែលបានចែងរួចហើយ។ យើងទៅធ្វើនៅស្រុកគេ អត់សុំអ្នកណា សូម្បីតែក្រសួងពាក់ព័ន្ធណាមួយ ក៏យើងមិនសុំដែរ ស្រាប់តែយើងយកទៅបញ្ចាំង។ សួរថា តើប្រទេសណាមួយដែលអនុញ្ញាតឲ្យបញ្ចាំង »។
វីដេអូឯកសារដែលមជ្ឈមណ្ឌលមេត្តាហោស៍ គ្រោងដាក់បញ្ចាំងនោះមានចំណងជើងជាភាសាអង់គ្លេសថា I am Chut Wutty ឬ ខ្ញុំ ឈុត វុទ្ធី គឺជាការផលិតរបស់ជនជាតិអង់គ្លេស ឈ្មោះ ហ្វ្រាន ឡាំប្រីកស៍ (Fran Lambricks)។ ខ្សែវីដេអូឯកសារនេះ បង្ហាញពីសកម្មភាពរបស់ លោក ឈុត វុទ្ធី មុនពេលលោកត្រូវបានឃាតកបាញ់សម្លាប់ ពីបទសម្ភាសន៍នានាជាមួយសកម្មជនការពារធនធានធម្មជាតិ និងគ្រួសារជនរងគ្រោះដែលរស់នៅពឹងផ្អែកលើអនុផលព្រៃឈើ។
វិទ្យុអាស៊ីសេរី មិនអាចទាក់ទងមន្ត្រីនៃមជ្ឈមណ្ឌលមេត្តាហោស៍ ដើម្បីសុំការបំភ្លឺបន្ថែមបានទេចំពោះការមិនអនុញ្ញាតនេះ។
ទោះបីជាយ៉ាងណា ផលិតករខ្សែភាពយន្ត I am Chut Wutty អ្នកស្រី ហ្វ្រាន ឡាំប្រីកស៍ ឲ្យវិទ្យុអាស៊ីសេរី ដឹងតាមសារអេឡិចត្រូនិក ឬអ៊ីមែល (email) ថា អ្នកស្រីហួសចិត្តចំពោះការហាមប្រាមរបស់ក្រសួងវប្បធម៌ នៅពេលនេះ។ អ្នកស្រីថា ក្រសួងវប្បធម៌ ឬរដ្ឋាភិបាល គួរលើកកម្ពស់ការផលិតខ្សែភាពយន្តប្រភេទនេះ និងគួរចាត់ទុក លោក ឈុត វុទ្ធី ថាជាវីរបុរសគំរូមួយរូបនៅក្នុងការការពារព្រៃឈើ និងធនធានធម្មជាតិនៅកម្ពុជា។
អ្នកស្រី ហ្វ្រាន ឡាំប្រីកស៍ បច្ចុប្បន្នអាយុ ២៩ឆ្នាំ អះអាងថា អ្នកស្រីចាប់ផ្តើមផលិតភាពយន្តឯកសារជីវិត លោក ឈុត វុទ្ធី តាំងពីអ្នកស្រីមានអាយុ ២៥ឆ្នាំ។ អ្នកស្រីបញ្ជាក់ថា អ្នកស្រីបានជួប លោក ឈុត វុទ្ធី នៅក្នុងតំបន់ព្រៃឡង់ក្នុងឆ្នាំ២០១១ នៅពេលអ្នកស្រីធ្វើការសិក្សាស្រាវជ្រាវពីព្រៃឡង់ ដើម្បីសរសេរនិក្ខេបបទថ្នាក់បណ្ឌិត។ អ្នកស្រីចាត់ទុក លោក ឈុត វុទ្ធី ជាមនុស្សគំរូម្នាក់ក្នុងការការពារបរិស្ថានដែលអ្នកស្រីមានព្រេងសំណាងបានជួប។ អ្នកស្រីថា ការផលិតខ្សែភាពយន្តឯកសារនេះ គឺមានបំណងចែករំលែក និងផ្សព្វផ្សាយឲ្យមនុស្សទូទៅបានដឹងពីសកម្មភាព និងរឿងរ៉ាវជីវិតរបស់ លោក ឈុត វុទ្ធី បើទោះបីជាសកម្មជនការពារបរិស្ថានរូបនេះ ត្រូវបានគេផ្តាច់ផ្តិលជីវិតគាត់ហើយក្តី។
អ្នកស្រី ហ្វ្រាន ឡាំប្រីកស៍ សង្កត់ធ្ងន់ថា មានមនុស្សច្រើនណាស់ចង់ទស្សនាភាពយន្តឯកសារនេះ មិនគួរណាក្រសួងវប្បធម៌ ហាមប្រាមឡើយ។
ទោះបីជាយ៉ាងណា អ្នកស្រី ហ្វ្រាន ឡាំប្រីកស៍ បង្ហាញក្តីសង្ឃឹមថា ខ្សែភាពយន្តឯកសារនេះ នឹងត្រូវក្រសួងវប្បធម៌ អនុញ្ញាតឲ្យដាក់បញ្ចាំងនៅពេលខាងមុខ។ អ្នកស្រី ហ្វ្រាន ឡាំប្រីកស៍ ឲ្យដឹងដែរថា ភាពយន្តឯកសារជីវិត លោក ឈុត វុទ្ធី ត្រូវបានដាក់បញ្ចាំងចំនួន ៦លើកហើយនៅតាមរោងភាពយន្តមួយចំនួននៅសហរដ្ឋអាមេរិក និងសហភាពអឺរ៉ុប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។