ឯកអគ្គរដ្ឋទូតសហភាពអឺរ៉ុប ប្រចាំប្រទេសកម្ពុជា ព្រួយបារម្ភពីការបំផ្លិចបំផ្លាញព្រៃឡង់ដែលកំពុងតែកើតមានឥតឈប់ឈរ។ ទន្ទឹមគ្នានេះ សហភាពអឺរ៉ុប ជំរុញឲ្យរដ្ឋាភិបាលពង្រឹងច្បាប់គ្រប់គ្រងព្រៃឈើឲ្យមានប្រសិទ្ធភាព ដើម្បីទប់ស្កាត់ការកាប់បំផ្លាញព្រៃឈើដោយខុសច្បាប់នៅតំបន់ព្រៃឡង់។
សហភាពអឺរ៉ុប ប្រចាំប្រទេសកម្ពុជា ចាត់ទុកព្រៃឡង់ជាផ្នែកមួយយ៉ាងសំខាន់ ក្នុងការរួមចំណែកធ្វើឲ្យប្រសើរឡើងក្នុងការកាត់បន្ថយភាពក្រីក្រ ការពារបរិស្ថាន និងសន្តិសុខស្បៀងនៅកម្ពុជា និងពិភពលោក។
ការលើកឡើងរបស់សហភាពអឺរ៉ុប នៅពេលនេះ ធ្វើឡើងនៅក្នុងសិក្ខាសាលាស្ដីពីលទ្ធផលការការពារព្រៃឡង់ ដែលរៀបចំដោយតំណាងសហគមន៍ព្រៃឡង់ ៤ខេត្ត នារាជធានីភ្នំពេញនៅថ្ងៃទី២៩ ខែមិថុនា។
ឯកអគ្គរដ្ឋទូតសហភាពអឺរ៉ុប ប្រចាំប្រទេសកម្ពុជា លោក ច្សច អេដហ្គា (George EDGAR) សង្កេតឃើញថា រដ្ឋាភិបាលបានខិតខំប្រឹងប្រែងទប់ស្កាត់បទល្មើសព្រៃឈើ តាមរយៈការដាក់តំបន់ព្រៃមួយចំនួនជាតំបន់ការពារ ពិសេសទប់ស្កាត់រាល់ការនាំចេញឈើទៅក្រៅប្រទេស ដូចជាប្រទេសវៀតណាម ក្តី។ ប៉ុន្តែបន្ទាប់ពីលោកទៅទស្សនកិច្ចព្រៃឡង់កាលពីពេលថ្មីៗនេះ លោកឃើញស្ថានភាពកាប់ឈើ និងដឹកឈើរាប់រយដើម ត្រូវបានគេកាប់ផ្ដួលរំលំ និងកាត់ច្រៀកជាកំណាត់ៗនៅក្នុងតំបន់ព្រៃឡង់។
ឯកអគ្គរដ្ឋទូតសហភាពអឺរ៉ុប រូបនេះ ស្នើឲ្យរដ្ឋាភិបាលពង្រឹងច្បាប់គ្រប់គ្រងបទល្មើសព្រៃឈើឲ្យមានប្រសិទ្ធភាព ដើម្បីទាក់ទាញជំនួយ និងការគាំទ្រពីមជ្ឈដ្ឋានអន្តរជាតិលើកិច្ចការពារព្រៃឈើ៖ « ខ្ញុំយល់ថា ការទប់ស្កាត់រាល់បទល្មើសព្រៃឈើ ទាមទារឲ្យមានឆន្ទៈនយោបាយ ត្រូវមានការសហការពីគ្រប់មជ្ឈដ្ឋានទាំងអស់ ហើយខ្ញុំយល់ថា ប្រសិនបើរដ្ឋាភិបាលពង្រឹងការអនុវត្តច្បាប់កាន់តែមានប្រសិទ្ធភាព វានឹងជួយជំរុញសហគមន៍អន្តរជាតិផ្តល់ជំនួយផ្នែកហិរញ្ញវត្ថុលើការងារនេះ » ។
ទាក់ទិននឹងការលើកឡើងរបស់សហភាពអឺរ៉ុប នាយកវេទិកានៃអង្គការមិនមែនរដ្ឋាភិបាលស្ដីពីកម្ពុជា (NGO Forum) លោក តឹក វណ្ណារ៉ា គាំទ្រចំពោះការជំរុញរបស់សហភាពអឺរ៉ុប ទៅកាន់រដ្ឋាភិបាលក្នុងការអនុវត្តច្បាប់ គឺជារឿងសំខាន់ដែលលុបបំបាត់ការកាប់បំផ្លាញព្រៃឈើយ៉ាងអនាធិបតេយ្យនៅតំបន់ព្រៃឡង់ឲ្យមានប្រសិទ្ធភាព៖ « ការអនុវត្តច្បាប់ប្រកបដោយប្រសិទ្ធភាពត្រឹមត្រូវ គឺជាគន្លឹះ និងវិធានការដ៏សំខាន់ក្នុងកិច្ចការពារតំបន់ព្រៃឡង់ ពិសេសអាចបើកឱកាសឲ្យបណ្ដាញព្រៃឡង់គាត់មានលទ្ធភាពគ្រប់គ្រង និងប្រើប្រាស់ព្រៃឡង់ឲ្យមាននិរន្តរភាព » ។
ចំណែកឯសមាជិកបណ្ដាញយុវជនព្រៃឡង់ លោកស្រី ផន សុភ័ក្ត្រ និងជាស្ត្រីម្នាក់ដែលត្រូវជនមិនស្គាល់មុខលបកាប់ត្រូវជើង ខណៈនាងល្បាតព្រៃឡង់នោះ ឲ្យដឹងថា កន្លងមក សកម្មភាពកាប់បំផ្លាញព្រៃឡង់ក្នុង ៤ខេត្ត គឺខេត្តក្រចេះ ស្ទឹងត្រែង ព្រះវិហារ និងខេត្តកំពង់ធំ នៅមានសភាពធ្ងន់ធ្ងរនៅឡើយ កើតឡើងដោយសារកង្វះការសហការពីអាជ្ញាធរ និងការអនុវត្តច្បាប់ទប់ស្កាត់នៅធូររលុង៖ « កន្លងមកយើងមានសិទ្ធិ ហើយតែសិទ្ធិរបស់យើងត្រូវបានលុបបាន យើងមិនទាន់អាចគ្រប់គ្រងបានធំទូលាយ តែបើដូចការស្នើរបស់សហភាពអឺរ៉ុប ធ្វើឲ្យរដ្ឋាភិបាលអនុវត្តតាមសហគមន៍យើងទាំង ៤ខេត្ត មានឥទ្ធិពលក្នុងការការពារព្រៃឡង់ » ។
វិទ្យុអាស៊ីសេរី មិនអាចទាក់ទងអ្នកនាំពាក្យក្រសួងបរិស្ថាន លោក សៅ សុភាព ដើម្បីឆ្លើយតបទៅនឹងការស្នើរបស់សហភាពអឺរ៉ុប នេះបានឡើយ នៅថ្ងៃទី២៩ ខែមិថុនា។
ព្រៃឡង់ ត្រូវបានចាត់ទុកថាជាព្រៃធំចុងក្រោយមានទំហំ ៣.៦០០គីឡូម៉ែត្រក្រឡា មានព្រំប្រទល់ជាប់ខេត្តចំនួន៤ គឺខេត្តកំពង់ធំ ក្រចេះ ស្ទឹងត្រែង និងខេត្តព្រះវិហារ។ តំណាងបណ្ដាញការពារព្រៃឡង់បញ្ជាក់ថា មានសហគមន៍ចំនួនជិត ២០០ កំពុងចូលរួមការពារព្រៃនេះដោយចុះល្បាតការពារព្រៃជាប្រចាំ។ សហគមន៍ទាំងនេះ មានសកម្មជនដែលជាជនបង្គោលប្រមាណ ៤០០នាក់ និងសមាជិកជាច្រើនរយនាក់ផ្សេងទៀត កំពុងការពារព្រៃដោយស្ម័គ្រចិត្ត។
ក្រៅពីស្នើឲ្យរដ្ឋាភិបាលពង្រឹងច្បាប់គ្រប់គ្រងបទល្មើសព្រៃឈើនៅតំបន់ព្រៃឡង់ឲ្យមានប្រសិទ្ធភាព សហភាពអឺរ៉ុប សង្គមស៊ីវិល និងសហគមន៍ព្រៃឡង់ ក៏ទទូចឲ្យរដ្ឋាភិបាលចាត់វិធានការទប់ស្កាត់ការកាប់បំផ្លាញព្រៃឈើបន្ថែមទៀត ដោយដកហូតម៉ាស៊ីនរណារយន្តខុសច្បាប់ចេញពីភូមិ ឃុំ ស្រុក និងទីតាំងធ្វើអាជីវកម្មឈើនៅជុំវិញព្រៃឡង់ ព្រមទាំងចាត់វិធានការផ្លូវច្បាប់ចំពោះមន្ត្រី អាជ្ញាធរដែនដី និងមេឈ្មួញរកស៊ីខុសច្បាប់ ជាដើម៕
វីដេអូ៖ សហភាពអឺរ៉ុបជំរុញឲ្យរដ្ឋាភិបាលពង្រឹងច្បាប់គ្រប់គ្រង់ព្រៃឈើ
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។