លំនៅឋានអ្នកភូមិជាច្រើនគ្រួសារ នៅស្រុកម៉ាឡៃ និងនៅក្រុងប៉ោយប៉ែត ខេត្តបន្ទាយមានជ័យ ត្រូវបានទឹកជន់លិចជាបន្តបន្ទាប់ក្នុងរយៈពេលប៉ុន្មានថ្ងៃជាប់គ្នា។ ទឹកជន់នេះ កើតឡើងដោយសារទឹកភ្លៀង។ ចំណែកឯអាជ្ញាធរខេត្ត និងមន្ត្រីជំនាញនៃក្រសួងធនធានទឹក និងឧតុនិយម នៅពុំទាន់មានវិធានការជាក់លាក់ណាក្នុងការរំដោះទឹកជំនន់នោះចេញនៅឡើយ។
មេប៉ុស្តិ៍នគរបាលឃុំទួលពង្រ ស្រុកម៉ាឡៃ ខេត្តបន្ទាយមានជ័យ លោក ឃឹម សាលឿន ថ្លែងនៅថ្ងៃទី៩ ខែសីហា ថា លំនៅឋានអ្នកភូមិសន្តិភាព ក្នុងឃុំទួលពង្រ ចំនួន ១៥៨គ្រួសារ កំពុងជន់លិចអស់រយៈពេលជាច្រើនថ្ងៃ។ នៅថ្ងៃទី៩ សីហា នេះ ជំនន់ទឹកភ្លៀងនេះនៅតែមានកម្ពស់កើនឡើងថែមទៀត៖ «ឥឡូវហ្នឹងវាចេះតែលិចបន្តៗ មិនដឹងថាយ៉ាងម៉េច បើតាមព័ត៌មានពីប្រជាពលរដ្ឋនៅសន្តិភាព ថា ខាងធារាសាស្ត្ររបស់ខេត្តហ្នឹង មានវិធានការប្រុងបើកទឹកទំនប់អូរខៃដន ដើម្បីឲ្យប្រជាពលរដ្ឋបានធូរស្រាលខ្លះ»។
ទឹកជំនន់ក៏បានជន់លិចដំណាំស្រូវប្រជាពលរដ្ឋនៅឃុំទួលពង្រ អស់ចំនួន ៦៧ហិកតារ។ ជំនន់ទឹកភ្លៀងពីប្រទេសថៃ បានជន់លិចលំនៅឋានអ្នកភូមិច្រើនខ្នងទៀតនៅភូមិចំនួនបី ក្នុងសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ។ ក្រុមអ្នកភូមិបានបញ្ជាក់ថា ជំនន់ទឹកភ្លៀងហូរពីប្រទេសថៃ មកជន់លិចលំនៅឋានអ្នកភូមិនៅតំបន់ជាយដែននោះ គឺដោយសារក្រុមហ៊ុនផលិតទឹកស្អាតមួយរបស់លោកឧកញ៉ា កុក អាន បានសង់ទំនប់ស្តុកទឹកស្ទះមុខទឹក ទើបបណ្ដាលឲ្យកើតមានជំនន់លិចលំនៅឋានអ្នកភូមិ។
អ្នកភូមិ៖ «អាជ្ញាធរអត់មានចំណាត់ការអីទេ បើចង់ឲ្យមានចំណាត់ការទាល់តែកាយទំនប់អូរខៃដន ចោល ប៉ុន្តែពួកគេឃុបឃិតជាមួយឈ្មួញខិលខូច បង្កភាពមហន្តរាយដល់ប្រជាពលរដ្ឋ ហើយយកអំណោយមកជួយបន្តិចបន្តួច ប្រៀបដូចជាវ៉ៃក្បាលគេបែកអ៊ីចឹង ហើយឲ្យលុយទិញថ្នាំពេទ្យសម្រាប់ប្រជាពលរដ្ឋគាត់ចេះដឹង ហើយមិនអាចទទួលយកបានទេ»។
វិទ្យុអាស៊ីសេរី បានព្យាយាមសុំការបញ្ជាក់បញ្ហានេះពីអភិបាលខេត្តបន្ទាយមានជ័យ លោក ទ្រី ណារិន និងមន្ត្រីជំនាញមន្ទីរធនធានទឹក និងឧតុនិយម ប៉ុន្តែពួកគេបានបដិសេធពុំបានផ្ដល់អត្ថាធិប្បាយជុំវិញរឿងនេះឡើយ។
ក្រុមអ្នកភូមិ អះអាងថា កន្លងទៅនេះ ក្រុមអាជ្ញាធរមូលដ្ឋានបាននាំអំណោយចុះចែកជូនពួកគាត់នៅក្រុងប៉ោយប៉ែត ក៏ពិតមែន ប៉ុន្តែពួកគាត់ចង់ឲ្យមានការកាយទម្លាយទំនប់អាងស្តុកទឹករបស់ក្រុមហ៊ុន លោកឧកញ៉ា កុក អាន នោះចេញ ដើម្បីរំដោះទឹកកុំឲ្យជន់លិចលំនៅឋានរបស់អ្នកភូមិ។
តាមតួលេខគ្រោះថ្នាក់កាលពីបណ្ដាឆ្នាំមុនៗ ដូចជានៅឆ្នាំ២០១១ ទឹកជំនន់បានឆក់យកជីវិតមនុស្ស ៣៤នាក់ នៅខេត្តបន្ទាយមានជ័យ។ បន្ទាប់មក នៅឆ្នាំ២០១២ ជំនន់ទឹកភ្លៀងបានសម្លាប់មនុស្សអស់ចំនួន ១២នាក់ទៀត នៅខេត្តបន្ទាយមានជ័យ។ ជនរងគ្រោះស្លាប់ដោយទឹកជំនន់នោះ ត្រូវគេរាយការណ៍ថា បណ្ដាលមកពីការធ្វេសប្រហែស។ ទោះជាយ៉ាងណា នៅឆ្នាំ២០១៣ នេះ ពុំមានសេចក្ដីរាយការណ៍ថាមានមនុស្សស្លាប់ដោយសារជំនន់ទឹកភ្លៀងពីប្រទេសថៃ នេះនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។