សហគមន៍ខ្មែរនៅក្រុងស្តុកថុន (Stockton) រដ្ឋកាលីហ្វ័រញ៉ា (California) រៀបចំពិធីជួបជុំអង្គាសថវិកាសម្រាប់ជួយដល់អង្គការមាតាធម្មជាតិ ដែលកំពុងការពារធនធានធម្មជាតិនៅតំបន់អារ៉ែង។
ប្រធានគណៈកម្មការចាត់ចែងរកថវិកាជួយដល់អង្គការមាតាធម្មជាតិ លោក ម៉ែន សុធាវុឌ្ឍន៍ មានប្រសាសន៍ប្រាប់វិទ្យុអាស៊ីសេរី តាមទូរស័ព្ទថា វត្តមាន លោក អាឡិកហាន់ដ្រូ ហ្គន់ហ្សាឡេស ដេវិតសឹន (Alejandro Gonzalez Davidson) មានសារសំខាន់ណាស់ដើម្បីឲ្យពលរដ្ឋខ្មែរបានដឹងពីបញ្ហានៅតំបន់អារ៉ែង និងចូលរួមគាំទ្រ៖ «បាទ! ពួកយើងខ្ញុំនៅស្តុកថុន នេះ គឺមានបំណងតែមួយគត់គឺការពារព្រៃអារ៉ែង ហ្នឹងឲ្យបានគង់វង្ស កុំឲ្យពួកអ្នកមានអំណាចមានលុយទៅបំផ្លិចបំផ្លាញ ជាពិសេសព្រៃអារ៉ែង គឺជាព្រៃចុងក្រោយបង្អស់របស់ប្រទេសកម្ពុជា យើង។ យើងធ្វើនេះដើម្បីជួយគាំទ្រ មិនមែនតែ អាឡិក ម្នាក់ឯងទេ ប៉ុន្តែជាទូទៅជាប្រជាជនខ្មែរ និងយុវជនខ្មែរទាំងអស់ដែលនៅស្រុកខ្មែរហ្នឹងគាត់ខំប្រឹងប្រែងខ្លាំងណាស់។ ដោយឡែក អាឡិក គាត់គឺជាតំណាង ដូច្នេះបានគាត់អញ្ជើញមកអ៊ីចឹងជាបច្ច័យមួយដ៏ល្អដើម្បីយើងអាចរៃអង្គាស (Raise fund) ខ្លះដើម្បីទៅជួយបងប្អូនយើងដែលកំពុងធ្វើការការពារនៅព្រៃអារ៉ែងហ្នឹងតែម្ដង»។
លោក ម៉ែន សុធាវុឌ្ឍន៍ បន្តថា ពិធីជួបជុំគ្នានេះ រៀបចំធ្វើឡើងនៅថ្ងៃសៅរ៍ ទី៩ ខែឧសភា ខាងមុខនៅភោជនីយដ្ឋានឈ្មោះ វិមានអាស៊ី (Asian Palace) ដែលរំពឹងថានឹងមានមនុស្សចូលរួមប្រមាណជា ៣០០នាក់។ លោកថា លោក អាឡិក នឹងឆ្លើយតបចំពោះសំណួរពលរដ្ឋដែលមានការងឿងឆ្ងល់ និងចង់ដឹងអំពីសកម្មភាពរបស់ក្រុមយុវជននៃអង្គការមាតាធម្មជាតិ ដែលកំពុងធ្វើសកម្មភាពការពារតំបន់អារ៉ែង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។