សកម្មភាពលួចបាញ់សត្វព្រៃយកទៅជួញដូរខុសច្បាប់ កំពុងកើតមានយ៉ាងខ្លាំងនៅក្នុងតំបន់ព្រៃសហគមន៍កំពង់ស្រណោះ នៃឃុំកំពង់ស្រឡៅ១ ស្រុកឆែប ខេត្តព្រះវិហារ ដែលជាតំបន់ជាប់ព្រំដែនកម្ពុជា-ឡាវ។
សកម្មភាពលួចបាញ់សម្លាប់ និងដាក់អន្ទាក់ចាប់យកសត្វព្រៃនេះ កើនឡើងខ្លាំងក្នុងពេលដែលមានភ្លៀងធ្លាក់ជោកជាំដី ហើយសត្វព្រៃជាច្រើនប្រភេទបានចេញមកប្រមូលផ្ដុំគ្នាទាំងហ្វូងៗ។
សហគមន៍ការពារព្រៃឈើកំពង់ស្រណោះ នៅឃុំកំពង់ស្រឡៅ១ ជាប់ព្រំដែនកម្ពុជា-ឡាវ អំពាវនាវឲ្យអាជ្ញាធរពាក់ព័ន្ធ ដូចជាមន្ត្រីរដ្ឋបាលព្រៃឈើ ព្រមទាំងក្រុមឧទ្យានុរក្សបរិស្ថានជាដើម ជួយចាត់វិធានការជាបន្ទាន់ បង្ក្រាបក្រុមល្មើសដែលកំពុងតែលួចបរបាញ់សត្វព្រៃខុសច្បាប់នៅក្នុងតំបន់ដែលពួកគេការពារ។
គណៈកម្មការសហគមន៍ការពារព្រៃឈើកំពង់ស្រណោះ គឺលោក គឿង ផន។ លោកមានប្រសាសន៍នៅរសៀលថ្ងៃពុធ ទី៥ ខែមេសា ថា ជារៀងរាល់ថ្ងៃ មានសកម្មភាពលួចបរបាញ់ និងដាក់អន្ទាក់សត្វព្រៃជាច្រើននៅក្នុងតំបន់ព្រៃសហគមន៍របស់លោក។ ក្រុមជនល្មើសបានប្រើកាំភ្លើងឆ្នុក ដើម្បីបាញ់សម្លាប់សត្វព្រៃធំៗ ដូចជាឈ្លូស ប្រើស និងទន្សោង ជាដើម។ ចំណែកឯអន្ទាក់វិញ គឺពួកគេបានចាប់យកជ្រូកព្រៃ និងសត្វតូចៗជាប្រភេទទៀត៖ « ភ្លៀងដើមឆ្នាំនេះ សត្វចេញដើររកចំណី។ កាលពីរដូវប្រាំងមុនៗ មានការបាញ់តិចតួច ប៉ុន្តែឆ្នាំនេះបន្ទាប់ពីធ្លាក់ភ្លៀងជាច្រើនមេមក គឺបាញ់ខ្លាំង។ ក្រុមរបស់ពួកខ្ញុំដើរល្បាតឮសូរតែកាំភ្លើង »។
សហគមន៍ការពារព្រៃឈើកំពង់ស្រណោះ នៅឃុំកំពង់ស្រឡៅ១ នៃស្រុកឆែប ដែលនៅជាប់ព្រំដែនកម្ពុជា-ឡាវ បានទទួលការពារដីព្រៃឈើទំហំជាង ៣.១០០ហិកតារ កាលពីឆ្នាំ២០១៣។
រយៈពេល ២-៣ឆ្នាំមកនេះ គេបានប្រទះឃើញសត្វទន្សោងចំនួនប្រហែលជាង ២០ក្បាល ព្រមទាំងសត្វខ្ទីងដែលជាប្រភេទសត្វកម្រ បានរស់នៅក្នុងតំបន់ព្រៃការពារនោះ។
ប្រធានមន្ទីរបរិស្ថានខេត្តព្រះវិហារ លោក អ៊ា សុខា បានឆ្លើយតបនឹងកង្វល់សហគមន៍នោះថា ដោយសារតែតំបន់ព្រៃសហគមន៍នោះស្ថិតនៅក្រោមការគ្រប់គ្រងរបស់រដ្ឋបាលព្រៃឈើ គឺកម្លាំងឧទ្យានុរក្សបរិស្ថានរបស់លោក មិនអាចចូលទៅជួយអន្តរាគមន៍ក្នុងការបង្ក្រាបអំពើបរបាញ់សត្វព្រៃបានទេ។ លោកជំរុញឲ្យសហគមន៍ការពារព្រៃឈើកំពង់ស្រណោះ ទាក់ទងទៅផ្នែករដ្ឋបាលព្រៃឈើ៖ « ដោយឡែកបើសិនជាមានបញ្ហាអ៊ីចឹង គឺសហគមន៍ត្រូវស្នើសុំទៅរដ្ឋបាលព្រៃឈើឲ្យជួយការងារហ្នឹង »។
ទោះជាយ៉ាងណា អាស៊ីសេរី មិនអាចទាក់ទងមន្ត្រីរដ្ឋបាលព្រៃឈើប្រចាំតំបន់នោះ ដើម្បីអធិប្បាយបានថាយ៉ាងណានៅឡើយ នៅថ្ងៃទី៥ ខែមេសា។
ចំណែកមន្ត្រីផ្នែកតស៊ូមតិរបស់អង្គការពន្លកខ្មែរ ដែលតែងតែជួយជ្រោមជ្រែងចំពោះសហគមន៍ លោក ប៉ិក សោភ័ណ សម្ដែងការព្រួយបារម្ភទៅលើការបាត់បង់សត្វព្រៃដ៏កម្រនៅតំបន់នោះ។ លោកអំពាវនាវដល់សមត្ថកិច្ចរបស់រដ្ឋាភិបាល ឲ្យចូលរួមការពារពូជសត្វព្រៃដ៏កម្រទាំងនោះឲ្យបានទាន់ពេលវេលា ដើម្បីកុំឲ្យដាច់ពូជពីប្រទេសកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។