ប្រជាពលរដ្ឋរស់នៅក្នុងភូមិក្រងស្វាយ ឃុំស្វាយអំពារ ស្រុកមុខកំពូល ខេត្តកណ្ដាល ត្អូញត្អែរពីការខ្វះខាតទឹកប្រើប្រាស់ បន្ទាប់ពីទឹកព្រែកដែលនៅពីក្រោយផ្ទះអ្នកភូមិ ប្រែជាកខ្វក់ និងមានក្លិនស្អុយ។ អ្នកភូមិលើកឡើងទៀតថា ទឹកព្រែកនេះប្រែប្រួលនៅពេលអាជ្ញាធរមូលដ្ឋានបិទផ្លូវទឹកនេះ ដើម្បីសាងសង់ទ្វារទឹក ប្រយោជន៍ទប់ទឹកទុកឲ្យពលរដ្ឋប្រើប្រាស់នៅរដូវប្រាំង។
អ្នកភូមិក្រងស្វាយ ស្នើឲ្យអាជ្ញាធរពាក់ព័ន្ធបើកផ្លូវបង្ហូរទឹកកខ្វក់ចេញពីព្រែកក្រងស្វាយ ដែលពួកគាត់ធ្លាប់ប្រើប្រាស់។ ពួកគាត់អះអាងថា ការបិទទឹកដើម្បីធ្វើទ្វារទឹក បានធ្វើឲ្យទឹកក្នុងព្រែកនៅភូមិក្រងស្វាយ ប្រែជាកខ្វក់ មានក្លិនស្អុយ មិនអាចឲ្យពួកគាត់ប្រើប្រាស់បាន។
អ្នកភូមិក្រងស្វាយ លោកស្រី ម៉ៃ កេត ថ្លែងបណ្ដើរលើកដៃចង្អុលទៅទឹកព្រែកដែលមានសំរាមរលួយ និងកំប្លោកអណ្ដែតកកកុញថា រយៈពេលជិត ៣ខែហើយដែលទឹកក្នុងព្រែកក្រងស្វាយ ប្រែជាកខ្វក់ មិនអាចឲ្យអ្នកភូមិប្រើប្រាស់បាន។ លោកស្រីថា ក្រៅពីមានក្លិនស្អុយ ទឹកនោះនៅធ្វើឲ្យរោលរមាស់ស្បែកថែមទៀត។
លោកស្រី ម៉ៃ កេត បន្តថា អ្នកភូមិត្រូវបង្ខំចិត្តទិញទឹកទាំងទឹកទទួលទាន និងទឹកប្រើប្រាស់ ដែលជាបន្ទុកបន្ថែមទៀតទៅលើចំណាយប្រចាំថ្ងៃក្នុងគ្រួសារ៖ «សព្វថ្ងៃនេះបើថា អ្នកខ្លះបើគេមានប្រាក់ ព្រោះទឹកហ្នឹងអត់មានហូបកើតទេ អ៊ីចឹងគេប្រើតែទឹកឡាន គេទិញទឹក មានទឹកអណ្ដូងទឹកទន្លេ មួយឡាន ៤ម៉ឺន។ តែបានតែអ្នកដែលគ្នាធូរធារ ខ្លះទោះបីថាមិនធូរក៏ចេះតែស្រវាស្រទេញអោយតែបានទឹកយកមកប្រើ»។
ព្រែកក្រងស្វាយ ជាផ្លូវទឹកខ្លីមួយមានប្រវែងប្រហែល ២គីឡូម៉ែត្រ ឋិតនៅខាងក្រោយផ្ទះអ្នកភូមិ។ ព្រែកនេះតភ្ជាប់ព្រែកដែលជាដៃទន្លេចំនួន២ របស់ទន្លេមេគង្គ។ ព្រែកក្រងស្វាយ នេះ ជាប្រភពទឹកប្រើប្រាស់តែមួយគត់របស់អ្នកភូមិជាច្រើនជំនាន់មកហើយ ប៉ុន្តែព្រែកនេះចាប់ផ្ដើមរីងរាក់មិនអាចរក្សាទឹកបានឡើយនៅក្នុងរដូវប្រាំង។ ក្នុងរយៈពេល ៣ឆ្នាំចុងក្រោយនេះ ភូមិក្រងស្វាយ ជួបការលំបាកដោយសារភាពរាំងស្ងួតគ្មានទឹកប្រើប្រាស់។ នៅក្រោយគ្រោះរាំងស្ងួតក្នុងឆ្នាំ២០១៦ នេះ អ្នកភូមិ និងអាជ្ញាធរមូលដ្ឋាន បានស្នើសុំអាជ្ញាធរស្រុកឲ្យជួយសង់ទ្វារទឹក ដើម្បីទប់ទឹកសម្រាប់ឲ្យពលរដ្ឋប្រើប្រាស់។
អ្នកភូមិក្រងស្វាយ មួយរូបទៀត លោកស្រី វ៉ាន់ ថុន រៀបរាប់ថា ពេលមានភ្លៀងធ្លាក់នៅប៉ុន្មានថ្ងៃចុងក្រោយនេះ អ្នកភូមិមានទឹកខ្លះសម្រាប់ប្រើប្រាស់។ លោកស្រីថា មធ្យោបាយដែលពលរដ្ឋស្នើឲ្យអាជ្ញាធរដោះស្រាយបន្ទាន់នោះ គឺការបើកផ្លូវទឹកឲ្យទឹកកខ្វក់នោះហូរចេញពីព្រែក ដើម្បីទទួលទឹកថ្មីដែលល្អអាចប្រើប្រាស់បាន៖ «ទឹកទិញទឹកសុទ្ធទិញអីគេយកមកសម្រាប់ដាំបាយហូបអ៊ីចឹង ទៅជួនណាមានទឹកភ្លើងហ្នឹងក៏ចេះតែប្រើទឹកភ្លៀងហ្នឹងទៅវាអត់ទឹកព្រែក។ ទឹកទិញគេបូមគេទិញឡាន មួយឡានប្រើបានប្រហែលបួនទៅប្រាំថ្ងៃ យើងប្រើសន្សំសំចៃ»។
ឈរនៅលើទំនប់ខាងមុខការដ្ឋានសំណង់ទ្វារទឹក អ្នកភូមិម្នាក់ទៀត លោក នូ នាថ មានប្រសាសន៍ដែរថា បើអាជ្ញាធរពន្យារពេលតទៅទៀត អាចនឹងហួសពេលរដូវទឹកឡើង ដែលនឹងធ្វើឲ្យកម្ពស់ទឹកក្នុងព្រែកដែលជាប្រភពទឹកផ្ដល់មកព្រែកក្រងស្វាយ ស្រកចុះ មិនអាចផ្ដល់ទឹកថ្មីមកព្រែកនេះបាន។ លោកបន្តទៀតថា អ្នកភូមិប្រឈមនឹងគ្មានទឹកប្រើប្រាស់បន្តទៀត៖ «លុះត្រាតែយើងរំលោះ រំដោះទឹកស្អុយហ្នឹងចេញសិន បើសិនជាយើងទប់ហើយអាទឹកស្អុយវានៅហ្នុងដដែល គឺនៅតែស្អុយប្រើមិនកើតដដែល។ កាលណាវាហូរ ធ្វើម៉េចអោយបានហូរអាស្អុយមុនទឹកដែលមានសំរាមសឹកឈើស្លឹកព្រៃដែលវាងាប់ពេលទឹកឡើងហ្នឹងវាងាប់វាស្អុយជាប់នៅហ្នឹង។ ពេលទឹកស្អុយហ្នឹងមកពីទឹកដែលឡើងមកវាធ្វើអោយងាប់ស្មើ ស្លឹកឈើដែលដុះនៅបាតព្រែក វាបង្កជាស្អុយ»។
គម្រោងសាងសង់ទ្វារទឹកនៅក្នុងព្រែកក្រងស្វាយ នៅឃុំស្វាយអំពារ ស្រុកមុខកំពូល ខេត្តកណ្ដាល បានដំណើរការប្រមាណ ៣ខែមកហើយ។ ក្រុមកម្មករដែលកំពុងធ្វើការនៅទីនោះបញ្ជាក់ថា គម្រោងនេះអាចនឹងចប់នៅមុនថ្ងៃភ្ជុំបិណ្ឌ។ ប៉ុន្តែពួកគេក៏ព្រួយបារម្ភដែរចំពោះការរំខានដោយទឹកភ្លៀងជន់លិចការដ្ឋាន ដែលមិនអាចឲ្យការងារអាចបញ្ចប់បានឆាប់តាមការរំពឹងទុក។
មេឃុំស្វាយអំពារ អ្នកស្រី ជួន ស្រីពៅ មានប្រសាសន៍ថា គម្រោងសាងសង់ទ្វារទឹកនៅក្នុងព្រែកក្រងស្វាយ គឺជាការឆ្លើយតបនឹងតម្រូវការរបស់ពលរដ្ឋក្នុងភូមិមានចំនួនសរុបជិត ២ពាន់នាក់ ដែលខ្វះខាតទឹកប្រើប្រាស់ក្នុងរដូវប្រាំង។ អ្នកស្រីបន្តថា ការទប់ទឹកជាមធ្យោបាយចាំបាច់សម្រាប់ការកសាងទ្វារទឹក ហើយគេអាចបើកទឹកបាននៅពេលសំណង់ទ្វារទឹកសង់រួចរាល់។
អ្នកភូមិក្រងស្វាយ គឺលោកស្រី ម៉ៃ កេត លើកឡើងថា ពលរដ្ឋសាទរចំពោះការសាងសង់ទ្វារទឹកនេះ ប៉ុន្តែលោកស្រីក៏មិនខុសពីពលរដ្ឋផ្សេងទៀតនៅក្នុងភូមិដែរ នៅតែទទូចចង់ឲ្យអាជ្ញាធរបើកផ្លូវបង្ហូរទឹកកខ្វក់នោះឲ្យទាន់ពេលវេលា៖ «គេទប់ទឹកធ្វើអាងអោយយើងគឺអរគុណណាស់។ តែក្រែងទម្រាំវាធ្វើចប់ក្រែងទឹកវាស្រកចុះអស់ទៅ ពលរដ្ឋអត់មានទឹកប្រើ។ ពលរដ្ឋចង់បានថា ធ្វើម៉េចអោយទឹកហ្នឹងហូរចូលហូរចេញមកវិញអោយមានទឹកប្រើឡើងវិញ»។
បើទោះជាយ៉ាងណា មេឃុំស្វាយអំពារ ថ្លែងថា អ្នកស្រីនៅមិនទាន់ទទួលបានព័ត៌មានពីបញ្ហានេះនៅឡើយទេ ប៉ុន្តែអ្នកស្រីនឹងចុះពិនិត្យស្ថានភាព ដើម្បីរកមធ្យោបាយដោះស្រាយទៅតាមសំណើរបស់ពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។