ប្រជាពលរដ្ឋប្រមាណជាង ១០០គ្រួសារ ក្នុងភូមិខ្វា និងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ កំពុងរងគ្រោះដោយសារទឹកជន់លិចភូមិផ្ទះសម្បែង ធ្វើឲ្យពួកគាត់គ្មានទីជម្រកស្នាក់នៅ និងប្រឈមនឹងការលំបាកជាច្រើនផ្សេងៗទៀត។ ក្រុមអ្នកភូមិ ទាមទារឲ្យអាជ្ញាធរទទួលខុសត្រូវក្នុងការរំដោះទឹកចេញពីតំបន់នោះឲ្យបានឆាប់។
រហូតមកដល់ចុងរដូវ ឬជិតផុតរដូវវស្សាទៅហើយ តំបន់មួយចំនួននៅក្នុងតំបន់ជាយក្រុង ឬតំបន់ដែលកំពុងអភិវឌ្ឍសំណង់ធំៗ នៅតែរងគ្រោះដោយសារទឹកជន់លិចនៅឡើយ។
ផ្ទះសម្បែងអ្នកភូមិក្នុងសហគមន៍ខ្វា សង្កាត់ដង្កោ ត្រូវទឹកភ្លៀង និងទឹកលូហូរពីតំបន់ខ្ពស់ជុំវិញនោះជន់លិចជាង ២ខែមកហើយ។ ផ្ទះនៅតំបន់នោះ ខ្លះសង់ពីឈើ ខ្លះសង់ពីថ្មពីរជាន់ ប៉ុន្តែត្រូវលិចមួយជាន់ក្រោមបាត់ ហើយផ្ទះខ្លះលិចនៅសល់តែដំបូលបន្តិចប៉ុណ្ណោះ។
ពលរដ្ឋខ្លះដែលនៅមានផ្ទះពីរជាន់ នៅតស៊ូរស់នៅប្រឈមនឹងការលំបាកផ្សេងៗ ដោយធ្វើទូកឆ្លង ខ្លះយកសំបកដបទឹកសុទ្ធច្នៃធ្វើក្បូនសម្រាប់ឆ្លងមករកទីទួល ឬថ្នល់ខ្ពស់។ ចំណែកខ្លះទៀត ត្រូវជម្លៀសខ្លួនមកនៅលើថ្នល់ជាប់នឹងរបងសាកលវិទ្យាល័យកសិកម្មចម្ការដូង។
ក្រុមអ្នកភូមិ តែងតែត្អូញត្អែរពីការលំបាកចំពោះបញ្ហាទឹកលិចផ្ទះ និងមិនសប្បាយចិត្តចំពោះអាជ្ញាធរពាក់ព័ន្ធ ថាហាក់មិនខ្វាយខ្វល់ចូលរួមដោះស្រាយ និងទទួលខុសត្រូវចំពោះការលំបាករបស់ពួកគាត់ ប្រាប់ទៅអ្នកធ្វើដំណើរកាត់តំបន់នោះ និងអ្នកសារព័ត៌មាន។
បុរសម្នាក់ជាអ្នកភូមិខ្វា ឈ្មោះ ចាន់ សុផល ជិះទូកអុំតូចមួយធ្វើពីធុងសាំងរាងឃ្លីងឃ្លោងស្ទើរលិចម្តងៗ។ លោកអុំទូកធុងសាំងបណ្ដើរ រៀបរាប់បង្ហាញពីទិដ្ឋភាពទឹកលិចផ្ទះ ពីការលំបាករបស់អ្នកភូមិ បញ្ហាប្រឈមនានា និងមូលហេតុមួយចំនួនដែលនាំឲ្យទឹកលិចតំបន់នេះធ្ងន់ធ្ងរ៖ «អត់ដែលលិចទេទើបពីរឆ្នាំហ្នឹង ដោយសារមានលូបង្ហូរធ្លាក់មករណ្ដៅ ព្រោះពីមុនរណ្ដៅជ្រៅកន្លែងហ្នឹង! ដល់ពេលអ៊ីចឹង គេចង់បំបិទអារណ្ដៅហ្នឹង គេថាធ្វើជាអាងស្តុកទឹកអីណា ហើយអ៊ីចឹងប្រជាពលរដ្ឋចង់ឲ្យធ្វើលូបណ្ដោះទឹកចេញ តែអាជ្ញាធរដែនដីថាទាល់តែថ្នាក់លើបានដោះស្រាយចេញ បើអ៊ីចឹងតើឲ្យប្រជាពលរដ្ឋរស់នៅម៉េចកើត»។
លោកថា ដោយសារទឹកលិចផ្ទះនេះ ពលរដ្ឋមានការលំបាកយ៉ាងខ្លាំង ដូចជាប៉ះពាល់មុខរបររកស៊ីប្រចាំថ្ងៃ ខូចខាតផ្ទះសម្បែង សម្ភារៈប្រើប្រាស់ក្នុងផ្ទះ ពិបាកក្នុងការធ្វើដំណើរ ជាពិសេសក្មេងៗដែលត្រូវទៅរៀន ត្រូវឆ្លងកាត់ដោយជិះក្បូនតូចៗប្រឈមនឹងគ្រោះថ្នាក់ផ្សេងៗ ដូចជាធ្លាក់ទឹក លង់ទឹក ជាដើម៖ «មនុស្សយើងកាលណាលិចទឹក គឺវេទនាណាស់ មិនដូចយើងនៅលើគោកទេ យើងអាចទៅនេះទៅនោះបាន។ ដល់ពេលអ៊ីចឹង ខាតគ្រប់គ្នាទាំងអស់ខាតក្នុងការរកស៊ី មកផ្ទះលិចទឹកសព្វបែបយ៉ាងទាំងអស់! ខ្លះទៅជួលផ្ទះគេនៅវេទនាណាស់ ខ្លះរកអង្ករច្រកឆ្នាំងមិនបានផង»។
ស្ត្រីអ្នកភូមិម្នាក់ទៀតឈ្មោះ ចាន់ សុផា បានថ្លែងពីទុក្ខលំបាកដោយសារទឹកលិចផ្ទះគាត់ទាំងទឹកភ្នែកថា តំបន់ពួកគាត់រស់នៅជាដីទំនាប។ ក្រុមហ៊ុនអភិវឌ្ឍន៍ជុំវិញតំបន់នោះចាក់ដីខ្ពស់ៗ ហើយបង្ហូរទឹកចូលមកតំបន់ទំនាប។ ចំណែកអាជ្ញាធរ មិនបានទទួលខុសត្រូវដោះស្រាយបញ្ហានេះដោយរកមធ្យោបាយរំដោះទឹកចេញទេ។ ពេលទឹកលិចខ្លាំង ពលរដ្ឋតវ៉ាសុំដោះស្រាយ ទើបយកម៉ាស៊ីនមកបូម ហើយអត់មានប្រេងចាក់ទៀត៖ «ហើយពួកខ្ញុំទទូចអង្វរពួកគាត់ថា ប្រជាពលរដ្ឋរស់នៅទឹកស៊ីជើង ក្មេងលង់ទឹកក្នុងមួយថ្ងៃ ២ដង ម្តងក៏មានដែរ និយាយប្រាប់គាត់យ៉ាងម៉េច គាត់អត់មានគិតអាណិតប្រជាពលរដ្ឋដែលនៅក្នុងភូមិហ្នឹងទេ»។
ឆ្លើយតបនឹងការចោទប្រកាន់ពីពលរដ្ឋបែបនេះ ចៅសង្កាត់រងទី១ សង្កាត់ដង្កោ អ្នកស្រី សឿង សេរី មានប្រសាសន៍ថា អាជ្ញាធរពុំបានព្រងើយកន្តើយចំពោះទឹកលិចសហគមន៍ខ្វា នេះឡើយ។ អ្នកស្រីទទួលស្គាល់ថា តំបន់ភូមិខ្វា និងភូមិសំបួរ ឬហៅថាតំបន់បឹងតាម៉ាត នេះ ពីមុនមកមិនដែលមានទឹកលិចទេ ទើបតែពីរឆ្នាំចុងក្រោយនេះមានទឹកលិច ដោយមានអ្នកទិញដីតំបន់នោះជីកស្រះបូមទឹកទៅលក់ឲ្យខាងរោងចក្រ ប៉ុន្តែបច្ចុប្បន្ន ខាងរោងចក្រឈប់ទិញ ហើយក៏មានទឹកហូរមកពីគ្រប់ច្រកល្ហកហូរចាក់មក រហូតមានបាក់ផ្ទះប្រជាពលរដ្ឋមួយចំនួនទៀតផង។
អ្នកស្រីបន្តថា បញ្ហានេះ អាជ្ញាធរក៏បានដោះស្រាយឲ្យម្ចាស់ស្រះចាក់ដីទប់បានមួយចំនួនធំហើយ ហើយការរំដោះទឹកនេះជាបញ្ហាលំបាកធំមួយ ដែលត្រូវសិក្សារកលូចាស់ ឬអោយអ្នកបច្ចេកទេសជំនាញសិក្សាដាក់ប្រព័ន្ធលូបង្ហូរទឹកចេញដោយសុវត្ថិភាព មិនប៉ះពាល់ដល់អ្នកភូមិផ្សេងទៀត និងខូចខាតផ្លូវព័ទ្ធជុំវិញតំបន់នោះ ដែលទើបនឹងសាងសង់រួច៖ «បឹងតាម៉ាត ហ្នឹង វាធំធេងពេក បើសិនជាយើងព្យាយាមបូមអស់ប៉ុន្មានក៏តែទឹកពេញដែរ ពិសេសចំពោះមុខយើងនេះ ការកាយលូធ្វើផ្លូវ២១៧ នេះ បំបែកលូអស់ទៅ ដល់ពេលទឹកវាត្រូវតែបុកទៅខាងកើតហ្នឹងទាំងអស់ ធ្លាក់ទៅបឹងតាម៉ាតទាំងអស់ ទោះបីអត់ភ្លៀងក៏ទឹកនៅតែចូលទៅហ្នឹងទាំងអស់។ អ៊ីចឹងមីងគ្រាន់តែជម្រាបថាអាជ្ញាធរមិនព្រងើយកន្តើយពីបញ្ហានេះទេ»។
ទោះយ៉ាងណា អ្នកភូមិ គឺលោកស្រី ចាន់ សុផា បង្ហាញទស្សនៈថា ដំណាក់កាលនេះជាសម័យអភិវឌ្ឍន៍ ពលរដ្ឋខ្មែរមិនគួរណាទទួលទុក្ខលំបាកបែបនេះទេ ហើយក៏មិនគួរអភិវឌ្ឍកន្លែងមួយ ហើយទុកអោយកន្លែងមួយទៀតរងទុក្ខវេទនាអ៊ីចឹងឡើយ។
ចំណែកបុរសជាអ្នកភូមិឈ្មោះ ចាន់ សុផល មានប្រសាសន៍ដែរថា យ៉ាងណាក៏ដោយ អាជ្ញាធរត្រូវទទួលខុសត្រូវចំពោះទឹកលិចភូមិប្រជាពលរដ្ឋក្នុងសង្កាត់ដង្កោ ខណ្ឌដង្កោ ឲ្យបានឆាប់ ដោយមិនត្រូវអូសបន្លាយពេលវេលាឲ្យអ្នកភូមិរស់នៅត្រាំក្នុងទឹក ដោយគ្មានកាលកំណត់ ប្រឈមនឹងបញ្ហាសុខភាពចុះដុនដាបខ្លាំងពីមួយថ្ងៃទៅមួយថ្ងៃ ខូចខាតទ្រព្យសម្បត្តិដែលខំបង្ហូរញើសឈាមជាច្រើនឆ្នាំមកហើយ ឲ្យរលាយបាត់បង់ក្នុងមួយរយៈពេលខ្លីនោះទេ។
ក្រុមអ្នកភូមិព្រមានថា បើអាជ្ញាធរមូលដ្ឋានមានសង្កាត់ ខណ្ឌ មិនដោះស្រាយឲ្យបានឆាប់ទេ ពួកគាត់នឹងនាំគ្នាឡើងតវ៉ាដល់សាលារាជធានីភ្នំពេញនៅពេលឆាប់ៗខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។