នាយកដ្ឋាននគរបាលចរាចរណ៍ផ្លូវគោកនៃក្រសួងមហាផ្ទៃ ចាប់ផ្ដើមផាកពិន័យលើរថយន្តគ្រប់ប្រភេទនៅទូទាំងប្រទេសកម្ពុជា ដែលដឹកថ្ម ខ្សាច់ និងដឹកដីលើសការកំណត់តាមការណែនាំរបស់ក្រសួងរ៉ែ និងថាមពល។ ក្រសួងរ៉ែ និងថាមពលរកឃើញថា ការដឹកជញ្ជូនខុសបច្ចេកទេសនាំឲ្យប៉ះពាល់ដល់អ្នកធ្វើដំណើរ ខូចស្ពាន និងខូចផ្លូវ ទៀតផង។
មន្ត្រីជាន់ខ្ពស់ក្រសួងមហាផ្ទៃ ទទួលបន្ទុកការអនុវត្តច្បាប់ចរាចរណ៍ផ្លូវគោក ព្រមានថា ថ្ងៃទី៥ ខែមេសា គឺជាយុទ្ធនាការដ៏ក្ដៅគគុកថ្មីមួយជំហានទៀត ប្រឆាំងរថយន្តដឹករ៉ែសំណង់លើសចំណុះ ដូចជាប្រភេទរថយន្តដឹកដី ខ្សាច់ និង ថ្មជាដើម។
ប្រធាននាយកដ្ឋានចរាចរណ៍ផ្លូវគោក នៃក្រសួងមហាផ្ទៃ លោក រុន រ័ត្នវាសនា ឲ្យដឹងកាលពីថ្ងៃទី៤ ខែមេសា ថា ស្ថាប័នជំនាញក្រសួងមហាផ្ទៃ នឹងចាប់អនុវត្តផាកពិន័យទៅលើរថយន្តដែលដឹកសម្ភារៈផ្គត់ផ្គង់សំណង់ ក្នុងនោះមានរថយន្តដឹកដី ថ្ម និងខ្សាច់ ជាដើម។
លោកបន្តថា ការរឹតបន្តឹងនេះ ក្រៅតែពីដើម្បីលើកសោភណភាព និងថែរក្សាបរិស្ថានហើយ ថែមទាំងជាការបញ្ចៀសបញ្ហាប្រឈមនានា ដល់អ្នកដំណើរនៅតាមដងផ្លូវទៀតផង៖ «ខ្ញុំឃើញមួយរយៈកាលហ្នឹងឃើញថា ផលប៉ះពាល់ហ្នឹងច្រើន។ ច្រើនយ៉ាងម៉េច? យើងឃើញថា អ្នកបើកបរ ជាពិសេសឡានដឹកដី ដឹកខ្សាច់ និងដឹកក្រួសនេះតែងតែបង្កឲ្យបងប្អូនយើងមិនសប្បាយចិត្ត»។
កាលពីថ្ងៃទី៣១ ខែមីនា ក្រសួងរ៉ែ និងថាមពល បានកោះហៅម្ចាស់អាជីវកម្មរ៉ែសំណង់គ្រប់ប្រភេទមកណែនាំ និងដាក់ចេញនូវឱសានវាទ មុននឹងដាក់ចេញគោលការណ៍ផាកពិន័យនៅទូទាំងប្រទេស។ រដ្ឋលេខាធិការ នៃក្រសួងរ៉ែ និងថាមពល បញ្ជាក់ថា នេះពុំមែនជាលើកទី១ទេដែលម្ចាស់អាជីវកម្ម ត្រូវកោះហៅដើម្បីពិគ្រោះពិភាក្សា។ ម្យ៉ាងវិញទៀត មុននឹងសមត្ថកិច្ចកំណត់ផាកពិន័យនៅពេលនេះ គឺមុនមួយថ្ងៃនៃការចុះអនុវត្តច្បាប់ ក្រសួងរ៉ែ និងថាមពល សហការជាមួយនាយកដ្ឋាននគរបាលចរាចរណ៍ផ្លូវគោក នៃក្រសួងមហាផ្ទៃ បានចុះណែនាំរួចមកហើយ។
ប្រធាននាយកដ្ឋានចរាចរណ៍ផ្លូវគោក លោក រុន រ័ត្នវាសនា ឲ្យដឹងថា រថយន្តដែលល្មើសលក្ខណៈបច្ចេកទេស ធុនមធ្យម ក្នុងឡានមួយគ្រឿងត្រូវផាក ៧៥.០០០រៀល ចំណែករថយន្តធុនធំវិញ ត្រូវផាក ១២៥.០០០រៀល។
កាលពីថ្ងៃទី២០ ខែតុលា ឆ្នាំ២០១៥ ក្រសួងរ៉ែ និងថាមពល បានចេញសារចរណែនាំម្ដងរួចមកហើយ ស្ដីពីការដឹកជញ្ជូនលើផ្លូវសាធារណៈចំពោះរថយន្តធ្វើអាជីវកម្មខ្សាច់ ថ្ម និង ដី។ បម្រាមដែលបានដាក់ចេញ គឺអនុញ្ញាតឲ្យរថយន្តដឹកស្មើទ្រុង និងមិនឲ្យសំពីងសំពោង ហើយត្រូវគ្រប់តង់ឲ្យបានសមរម្យមុននឹងធ្វើដំណើរលើផ្លូវសាធារណៈ។
អ្នកបើកបរឲ្យរថយន្តដឹកខ្សាច់ លោក ឡុញ វឌ្ឍនៈ ដែលត្រូវកម្លាំងសមត្ថកិច្ចហៅណែនាំបានផ្ដល់បទសម្ភាសន៍ថា មូលហេតុដែលមិនអាចអនុវត្តបានគោលការណ៍ដែលក្រសួងដាក់ចេញនេះ ដោយសារក្រុមហ៊ុនចង់បំពេញតម្រូវការរបស់អ្នកបញ្ជាទិញ ដែលចង់បានដីខ្សាច់ ឬ ថ្ម ហៀរឡាន។ផ្ទុយទៅវិញ បើឡានដែលដឹកដូចអ្វីដែលក្រសួងបានកំណត់ដឹកស្មើទ្រុងនោះ គឺអ្នកបញ្ជាទិញតែងប្រតិកម្ម និងមិនពេញចិត្ត៖ «កន្លងមកយើងធ្វើខ្លះមិនធ្វើខ្លះ។ វាមិនមែនយើងថា ប្រចាំគ្នាទេ ដោយសារតម្រូវការរបស់អតិថិជន តម្រូវការអតិថិជនគេចង់បានច្រើន ដល់អ៊ីចឹងយើងមិនអាចដាក់តិចបានទេ»។
ទាក់ទិនរឿងនេះ ម្ចាស់អាជីវកម្មដីលោក ស្រឺន ស្រឿន បញ្ជាក់ថា លោកចង់ឃើញការអនុវត្តច្បាប់នេះ ឲ្យបានស្មើភាពចំពោះគ្រប់ការដ្ឋាន ដី ខ្សាច់ និង ថ្ម។ លោក ស្រឺន ស្រឿន ហាក់បន្ទោសលើអ្នកបើកបរថា ការធ្វេសប្រហែសក្នុងការគ្របតង់នៅពេលដឹកដីចេញ វាជាកំហុសរបស់អ្នកបើករថយន្ត។
លោកថា ចំពោះម្ចាស់ការដ្ឋានគឺតែងណែនាំជានិច្ច រាល់ពេលដឹកចេញម្ដងៗ៖ «និយាយទៅពេលចេញពីរណ្ដៅការដ្ឋានគាត់មក គាត់ឲ្យគ្រប និងបិទឲ្យជិត កុំឲ្យធ្លាក់ដីនៅតាមដងផ្លូវ។ ប៉ុន្តែណាស់តែកូនចៅ និងតៃកុងឡាន ពេលណាគាត់គ្របៗទៅ ពេលណាគាត់ខ្ជិលគ្រប គាត់មកហួសអ៊ីចឹងទៅ»។
របាយការណ៍របស់ក្រសួងរ៉ែ និងថាមពលឲ្យដឹងថា ការចុះអនុវត្តច្បាប់ចរាចរផ្លូវគោកនេះ គឺចំនួនរថយន្តល្មើសច្បាប់ បានថយចុះពី ៩៦គ្រឿង កាលពីថ្ងៃទី៤ មេសា មកនៅត្រឹម ២២គ្រឿង សម្រាប់ថ្ងៃទី៥ មេសា។ ទន្ទឹមនឹងនោះ មានរថយន្តខ្វះលក្ខណៈបច្ចេកទេស ដូចជាកង់សឹក និងផ្នែកដទៃទៀត នៃតួរថយន្តជាដើម គឺសមត្ថកិច្ចចាប់ផាកពិន័យចំនួន ២៧គ្រឿង និង ២គ្រឿងផ្សេងទៀត ត្រូវឃាត់ទុក ដោយសារល្មើសច្បាប់ក្នុងកម្រិតធ្ងន់។
ពលរដ្ឋដែលរស់នៅអមសង្ខាងផ្លូវជាតិលេខ២ នៃសង្កាត់ព្រែកហូរ ក្រុងតាខ្មៅ ខេត្តកណ្ដាល លោក សួន សុខា សាទរចំពោះចំណាត់ការរបស់សមត្ថកិច្ចនៅពេលនេះ។ លោកបន្តថា ការរឹតបន្តឹងច្បាប់ចំពោះការដឹកលើសចំណុះ និងសំពីងសំពោងនេះ នឹងជួយឲ្យបរិស្ថានបានប្រសើរ ជាពិសេសអាចជួយពង្រឹងគុណភាពផ្លូវបានយូរអង្វែងថែមទៀតផង៖ «ខ្ញុំថាល្អ ព្រោះកាលណាគាត់ដឹកដីលើសចំណុះ ហើយមិនគ្របនាំឲ្យដីហុយប៉ះពាល់អ្នកដំណើរតាមផ្លូវ»។
រដ្ឋលេខាធិការនៃក្រសួងរ៉ែ និងថាមពល លោក ឌិត ទីណា អះអាងថា ការអនុវត្ត និងរឹតបន្តឹងការដឹកជញ្ជូននេះ គឺត្រូវធ្វើឡើងនៅទូទាំងប្រទេស ហើយធ្វើជាប្រចាំ។ លើសពីនេះ រថយន្តដែលល្មើសគោលការណ៍នេះ នឹងត្រូវផាកពិន័យមិនយោគយល់ទៀតនោះទេ។
គោលបំណងចម្បងគឺដើម្បីជួយកាត់បន្ថយបញ្ហាប្រឈមនានា ដែលបណ្ដាលពីការដឹកលើសកំណត់ ហើយដីហុយ ដែលប៉ះពាល់ចំពោះអ្នកធ្វើដំណើរ នៅតាមដងផ្លូវសាធារណៈ ជាពិសេសគឺដល់ពេលដែលកម្ពុជា ត្រូវពង្រឹងច្បាប់ចរាចរណ៍ផ្លូវគោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។