ក្រុមសហគមន៍ជនជាតិដើមភាគតិចព្នង នៅភូមិក្រងទេស ឃុំក្រងទេស ស្រុកពេជ្រាដា ខេត្តមណ្ឌលគិរី ចោទប្រកាន់នាយនគរបាលប៉ុស្តិ៍ក្រងទេស ថាបានកាប់យកឈើពីក្នុងព្រៃសហគមន៍ដោយគ្មានការអនុញ្ញាត។
ប្រជាសហគមន៍អះអាងថា ឈើដែលកាប់យកចេញពីព្រៃនោះ បានលក់ទៅឲ្យឈ្មួញដឹកជញ្ជូនឆ្លងដែនទៅប្រទេសវៀតណាម។
ការចោទប្រកាន់នេះ ធ្វើឡើងតាមរយៈពាក្យប្ដឹងរបស់សហគមន៍ភូមិក្រងទេស ដាក់ជូនអភិបាលខេត្តមណ្ឌលគិរី ឲ្យចាត់វិធានការស៊ើបអង្កេត និងចាត់វិធានការផ្លូវច្បាប់ទៅលើមន្ត្រីនគរបាល ដែលបានប្រព្រឹត្តអំពើល្មើសច្បាប់។
កាលពីថ្ងៃទី១៧ ខែតុលា អ្នកភូមិក្រងទេស ជាង ១២០នាក់ បានផ្ដិតមេដៃប្ដឹងមេប៉ុស្តិ៍ប៉ូលិសឃុំក្រងទេស គឺលោក យឹម បាន តាមរយៈមេភូមិមេឃុំ និងអាជ្ញាធរស្រុក ទាមទារឲ្យដកតំណែង និងដាក់វិន័យមន្ត្រីនគរបាលនេះ ក្រោមហេតុផលថាមន្ត្រីនគរបាលធ្វើអាជីវកម្មឈើខុសច្បាប់ឆ្លងដែន និងកាប់ឈើធ្វើជន្លង់ម្រេចអស់រាប់ពាន់ដើម រួមទាំងប្រើពាក្យប្រមាថសហគមន៍ដែលប្រទះឃើញសកម្មភាពដឹកជញ្ជូនឈើចេញពីព្រៃសហគមន៍។
តំណាងសហគមន៍ លោក គ្រិះ ផន នៅថ្ងៃទី១៣ ខែវិច្ឆិកា រៀបរាប់ថា អ្នកភូមិមានភស្តុតាងគ្រប់គ្រាន់ ទាក់ទិនសកម្មភាពប្រព្រឹត្តបទល្មើសរបស់មន្ត្រីនគរបាលនេះ ក៏ប៉ុន្តែពាក្យប្ដឹងរបស់អ្នកភូមិរហូតមកទល់នឹងបច្ចុប្បន្ន ឋិតនៅក្នុងដៃរបស់អាជ្ញាធរស្រុក ក៏ប៉ុន្តែអាជ្ញាធរស្រុកមិនទាន់ចាត់វិធានការបញ្ជូនបន្តទៅអាជ្ញាធរខេត្តនៅឡើយ។
លោកបន្តថា សហគមន៍បានធ្វើលិខិតសុំឲ្យសមាគមការពារសិទ្ធិមនុស្សអាដហុក (adhoc) ជួយអន្តរាគមន៍ទៅស្ថាប័នពាក់ព័ន្ធឲ្យជួយរកយុត្តិធម៌ ចំពោះសកម្មភាពរំលោភរបស់មន្ត្រីមូលដ្ឋាននេះ៖ «គាត់បទល្មើសខ្លាំងណាស់ ហើយគាត់គាបសង្កត់ប្រជាពលរដ្ឋខ្លាំងទៀត។ សម្រាប់គាត់លូកតាមចិត្ត ប្រពន្ធរកស៊ីឈើ កូនក៏ទិញឈើ។ ខ្លួនគាត់ទៀតបញ្ជាឲ្យកូនចៅនៅតំបន់ការពារត្រពាំងឈូក ហើយអូររង្ហែង អូរអង្រត់ កាត់ផ្ដួលលក់ឲ្យវៀតណាម អាត្រាក់វៀតណាម មកចូលយក។ ដល់គាត់នាំអ៊ីចឹង ប្រជាពលរដ្ឋគេចង់បានដែរ ដល់គេចូលរកដែរគាត់ចាប់»។
ទាក់ទិនការចោទប្រកាន់នេះ វិទ្យុអាស៊ីសេរី នៅថ្ងៃទី១៣ ខែវិច្ឆិកា មិនអាចទាក់ទង លោក យឹម បាន សុំបំភ្លឺករណីនេះបាននៅឡើយ។
ទោះជាយ៉ាងនេះក៏ដោយ អភិបាលរងស្រុកពេជ្រាដា លោក ខាំ ដារ៉ា អះអាងថា អាជ្ញាធរស្រុកគ្រោងអញ្ជើញសហគមន៍ និងអ្នកពាក់ព័ន្ធ មកដោះស្រាយបញ្ហានៅថ្ងៃទី១៧ ខែវិច្ឆិកា។ លោកកត់សម្គាល់ថា សហគមន៍បានប្ដឹងផ្ទាល់មាត់មកអាជ្ញាធរស្រុក និងមិនឃើញមានលិខិតប្ដឹងផ្លូវការអ្វីឡើយ៖ «បានដឹង ក៏ប៉ុន្តែបណ្ដឹងអត់មានលិខិតស្នាមអ្វីមកប្ដឹង ប្រជាពលរដ្ឋគាត់មកប្ដឹងនឹងមាត់ អភិបាលគាត់ថានឹងចូលរួមដោះស្រាយ»។
ទាក់ទិនករណីនេះដែរ ស្នងការប៉ូលិសខេត្តមណ្ឌលគិរី លោក ញ៉ែម វាន្នី មានប្រសាសន៍បញ្ជាក់ថា មន្ត្រីស្នងការដ្ឋាន មិនទាន់ឃើញពាក្យប្ដឹងរបស់សហគមន៍នៅឡើយ ក៏ប៉ុន្តែលោកទទួលបានព័ត៌មានថា សហគមន៍គ្រោងប្ដឹងមន្ត្រីប៉ូលិសមែន។ លោកអះអាងថា បានចាត់មន្ត្រីអង្កេតករណីនេះហើយ ប៉ុន្តែមិនទាន់ទទួលបានរបាយការណ៍នៅឡើយ៖ «វាប៉ះពារគ្នាអ្នករកស៊ីឈើហ្នឹង មិនសប្បាយចិត្តដោយសារតែកម្លាំងយើងអនុវត្តទៅវាធ្ងន់ធ្ងរ វាតឹងរ៉ឹងពេក ហើយខ្លួនឯងហ្នឹងក៏មានអ្វីប៉ះពាល់តិចតួចអ៊ីចឹងដែរ អ៊ីចឹងបានជាគេចោទប្រកាន់ហ្នឹង។ ព័ត៌មានក្រៅផ្លូវការទេ»។
ទោះជាយ៉ាងនេះក៏ដោយ មន្ត្រីសម្របសម្រួលសមាគមអាដហុក ខេត្តមណ្ឌលគិរី លោក សុក រដ្ឋា មានប្រសាសន៍បញ្ជាក់ថា លោកបានទទួលលិខិតសុំជួយអន្តរាគមន៍ពីតំណាងសហគមន៍រួចហើយ។ នៅរសៀលថ្ងៃទី១៣ ខែវិច្ឆិកា លោកបានធ្វើលិខិតអន្តរាគមន៍ពាក្យប្ដឹងរបស់សហគមន៍ ជូនអាជ្ញាធរខេត្ត ស្នងការប៉ូលិស និងស្ថាប័នអយ្យការតុលាការខេត្ត ដើម្បីដោះស្រាយបញ្ហាជូនពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។