បណ្ដាញព្រះសង្ឃ ក្រុមយុវជន និងសហគមន៍ព្រៃឈើ នាំគ្នាធ្វើយុទ្ធនាការបំបួសដើមឈើ ចាប់រណាយន្ត នៅតំបន់ព្រៃឡង់ ក្នុងខេត្តព្រះវិហារ ដើម្បីថែរក្សាព្រៃឡង់ នៅសេសសល់។ ក្រោយទទួលបានលទ្ធផល និងចាប់បានវត្ថុតាងបទល្មើសជាក់ស្ដែងនៅនឹងកន្លែង បណ្ដាញព្រះសង្ឃហែក្បួនដាក់ញត្តិទៅស្ថាប័នរដ្ឋមួយចំនួន ប៉ុន្តែក្នុងចំណោមស្ថាប័នទាំងនោះ មានរដ្ឋបាលព្រៃឈើដែលចេញមកទទួលញត្តិ ដោយរដ្ឋសភា និងខុទ្ទកាល័យលោកនាយករដ្ឋមន្ត្រី ហ៊ុន សែន ពុំមានអ្នកចេញមកទទួលទេ។
សំឡេងសូត្រធម៌លាន់ឮទ្រហឹងពេញព្រៃ រំលេចដោយស្បង់ចីពរលឿងច្រាលឆ្អៅពេញក្នុងព្រៃរបស់ព្រះសង្ឃ ដែលប្រជុំគ្នាក្នុងធម្មយាត្រា បំបួសដើមឈើនៅក្នុងព្រៃឡង់៖ «»។
ព្រះធម៌ដែលព្រះសង្ឃស្វាធ្យាយនេះ មានន័យថា សូមឲ្យដើមឈើនេះក្លាយទៅជារបស់សាសនា ហើយនាំមកនូវសុខសន្តិភាពសម្រាប់មនុស្ស និងសត្វលើសកលលោក ហើយសុំឲ្យដើមឈើរស់នៅជាអមត។ ដើមឈើដែលត្រូវបានបំបួសទាំងនោះ ជាប្រភេទឈើធំ គ្មានម្ចាស់អាស្រ័យផល គឺមានន័យថា ប្រសិនបើឈើនេះមានមនុស្សចោះយកជ័រ ព្រះសង្ឃមិនបំបួសទេ។
ប្រជាសហគមន៍ការពារព្រៃឡង់ម្នាក់ក្នុងខេត្តព្រះវិហារ លោក ឈុន ជិន ដែលបានចុះល្បាតក្នុងធម្មយាត្រាជាមួយនឹងព្រះសង្ឃ ឲ្យដឹងថា ជាញឹកញាប់ក្រុមលោកតែងនាំគ្នាចុះល្បាតព្រៃ និងចាប់បានម៉ាស៊ីនអារឈើ។ ប្រជាសហគមន៍រូបនេះសម្ដែងការព្រួយបារម្ភថា ព្រៃឡង់នឹងវិនាសអស់នៅថ្ងៃណាមួយ ខណៈដែលបទល្មើសកើតឡើងពេញព្រៃ៖ «»។
ក្រុមអ្នកស្រលាញ់ព្រៃឡង់ នាំគ្នាចូលព្រៃកាលពីថ្ងៃទី៣ ខែកក្កដា និងចេញពីព្រៃវិញថ្ងៃទី៥ ខែកក្កដា ធ្វើដំណើរដោយគោយន្តដើម្បីល្បាតការពារព្រៃឈើក្នុងតំបន់នោះ ហើយបានប្រទះឃើញឈើខ្លះទៀតដួលដេកពេញដី ដោយស្នាដៃមនុស្សអារផ្ដួលរំលំ។ ទីនោះជាតំបន់ព្រៃជ្រៅពោរពេញដោយដើមឈើធំៗ ខ្ពស់ត្រង់ឡើងទៅលើ ដុះតាមប្រភេទរបស់វា។ ដើមខ្លះមនុស្សពីរនាក់អោបមិនជុំផង។
ស្ថាបនិកនៃបណ្ដាញព្រះសង្ឃឯករាជ្យ ព្រះតេជព្រះគុណ ប៊ុត ប៊ុនតិញ មានថេរដីកាឲ្យដឹងថា សកម្មភាពការពារធនធម្មជាតិនេះ ទទួលបានជោគជ័យ ព្រោះដើមឈើធំៗ ត្រូវបានបំបួស បទល្មើសព្រៃឈើក៏បង្ក្រាបបាន ព្រមទាំងមានការចូលរួមពីប្រជាពលរដ្ឋ និងក្រុមយុវជនទៀតផង។
ព្រះតេជព្រះគុណមានថេរដីកាបន្តថា ការបំបួសដើមឈើនេះ ជាការផ្សារភ្ជាប់រវាងព្រៃឈើ និងព្រះពុទ្ធសាសនា។ ទោះបែបនេះក្តី ព្រះតេជព្រះគុណកំពុងព្រួយបារម្ភ ខណៈដែលសំឡេងអារឈើកំពុងលាន់ឮពេញព្រៃ៖ «»។
លទ្ធផលនៃធម្មយាត្រា ព្រះសង្ឃបំបួសដើមឈើបាន ២០០ដើម វាស់ផ្ទៃតំបន់ព្រៃឡង់ បាន ១០ហិកតារ ក្នុងនោះរកឃើញឈើធំៗ ៩៨ដើម មានប្រភេទឈើសំខាន់មួយចំនួន គឺឈើទាល ឈើដូងចែម និងឈើបេងជាដើម។
ក្នុងពេលព្រះសង្ឃកំពុងសូត្រធម៌បំបួសដើមឈើក្នុងព្រៃ សំឡេងអារឈើក៏លាន់ឮតំណាលគ្នានឹងសំឡេងព្រះធម៌ដែរ។ ភ្លាមៗព្រះសង្ឃ ប្រជាសហគមន៍ និងយុវជន នាំគ្នាសម្រុកទៅរកកន្លែងដែលមានសំឡេងអារឈើនោះ៖ «»។
ព្រះតេជព្រះគុណ ឌឺត ឌុល ដែលតាមទាន់សកម្មភាពកាប់ឈើរៀបរាប់ពីសកម្មភាពបង្ក្រាបបទល្មើសថា ក្រុមអ្នកកាប់ឈើគ្រាន់តែឃើញព្រះសង្ឃ និងប្រជាសហគមន៍ ពួកគេនាំគ្នារត់ចោលម៉ាស៊ីនអារឈើដោយមិននិយាយអ្វីទាំងអស់៖ «»។
របាយការណ៍របស់តំណាងភ្នាក់ងារអាមេរិកដើម្បីអភិវឌ្ឍន៍អន្តរជាតិ (USAID) បង្ហាញថា ព្រៃឡង់ជាព្រៃដែលស្អាងជាងគេទី១០ ក្នុងសកលលោក សំបូរដោយជីវចម្រុះ។ របាយការណ៍ដដែលនេះ ក៏បង្ហាញការព្រួយបារម្ភដែរ ចំពោះតំបន់ព្រៃឈើដ៏កម្រមួយនេះ ដែលកំពុងរងការកាប់បំផ្លាញយ៉ាងធ្ងន់ធ្ងរ។ រីឯរបាយការណ៍របស់បណ្ដាញសហគមន៍ព្រៃឡង់វិញបង្ហាញថា ទំហំព្រៃឡង់បច្ចុប្បន្ននៅសល់តែប្រមាណ ៣៦ម៉ឺនហិកតារប៉ុណ្ណោះ ដែលពីមុននៅក្នុងអនុក្រឹត្យស្ដីពីការបង្កើតតំបន់ព្រៃការពារ និងអភិរក្សជីវចម្រុះព្រៃឡង់ គឺមានផ្ទៃដីទំហំជាង ៦១ម៉ឺនហិកតារ។
ក្រោយពីចប់ធម្មយាត្រាបំបួសឈើក្នុងព្រៃឡង់រួចមក បណ្ដាញព្រះសង្ឃបានដង្ហែញត្តិស្ដីពីលទ្ធផលនៃការបំបួសដើមឈើ និងវត្ថុតាង ជាម៉ាស៊ីនអារឈើប្រាំគ្រឿង យកទៅបង្ហាញស្ថាប័នជាតិធំៗ ដូចជារដ្ឋសភា ខុទ្ទកាល័យលោកនាយករដ្ឋមន្ត្រី ហ៊ុន សែន និងរដ្ឋបាលព្រៃឈើ កាលពីថ្ងៃទី៦ ខែកក្កដា។
ទោះបីជាយ៉ាងណាក្តី ក្នុងចំណោមស្ថាប័នដែលព្រះសង្ឃដង្ហែក្បួនដាក់ញត្តិ មានតែរដ្ឋបាលព្រៃឈើទេដែលមានមន្ត្រីចេញមកទទួលញត្តិ។ ប៉ុន្តែមន្ត្រីរូបនេះបដិសេធមិនប្រាប់ឈ្មោះ ឬតួនាទីដល់សារព័ត៌មានទេ គ្រាន់តែបញ្ជាក់ថា នឹងយកញត្តិនោះទៅជូនមន្ត្រីប្រតិភូរដ្ឋាភិបាលទទួលបន្ទុកព្រៃឈើ៖ «»។
កត្តាទាំងនេះជំរុញឲ្យបណ្ដាញព្រះសង្ឃរិះគន់ស្ថាប័នទាំងនោះយ៉ាងខ្លាំង។ នៅពេលក្រុមក្បួនព្រះសង្ឃធ្វើធម្មយាត្រាមកដល់វិមានរដ្ឋសភា ពុំមានតំណាងរាស្ត្ររូបណាចេញមកទទួលញត្តិព្រះសង្ឃឡើយ ក្រៅពីមន្ត្រីរដ្ឋសភាចេញមកថតរូបភាពក្រុមព្រះសង្ឃ។
ប្រធានគណៈកម្មការទី៣នៃរដ្ឋសភា ទទួលបន្ទុកវិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក លោក ប៉ុល ហំម ឲ្យដឹងថា នៅពេលបណ្ដាញព្រះសង្ឃមកដាក់ញត្តិនៅរដ្ឋសភា លោកមិនបានដឹងពីការដាក់ញត្តិនេះទេ។ លោក ប៉ុល ហំម បញ្ជាក់ថា ធម្មតានៅពេលមានការដាក់ញត្តិដូចនេះ គណៈកម្មការទី១នៃរដ្ឋសភាទទួលបន្ទុកអង្កេត និងទទួលពាក្យបណ្ដឹងជាអ្នកចេញទទួលរួចហើយទើបចាត់ចែងទៅគណៈកម្មការផ្សេងៗតាមជំនាញ៖ «»។
អ្នកនាំពាក្យក្រសួងធម្មការនិងសាសនា លោក សុះ មុះសិន គាំទ្រសកម្មទាំងឡាយណាដែលធ្វើឡើងដើម្បីប្រយោជន៍សង្គម មិនមែនជាការបម្រើក្រុមណាមួយ។ អ្នកនាំពាក្យរូបនេះស្នើឲ្យបណ្ដាញព្រះសង្ឃធ្វើសកម្មភាពស្របតាមច្បាប់របស់រដ្ឋ៖ «»។
បណ្ដាញព្រះសង្ឃឯករាជ្យ បានប្រមូលម៉ាស៊ីនអារឈើទាំងនោះយកទៅទុកវិញ និងអះអាងថា នឹងរៀបចំឲ្យមានរូបភាពបំបួសដើមឈើតទៅទៀត នៅក្នុងខេត្តនៅតំបន់ព្រៃឡង់ ដូចជា ខេត្តក្រចេះ ស្ទឹងត្រែង និងខេត្តកំពង់ធំ។ ព្រះសង្ឃក៏មិនភ្លេចទៅពិនិត្យឡើងវិញនូវព្រៃឈើដែលបានបំបួសរួចហើយ ដើម្បីចង់ដឹងថា ឈើទាំងនោះនៅគង់វង្ស ឬត្រូវជនខិលខូចកាប់បំផ្លាញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។