ប្រជាពលរដ្ឋឃុំរាម ខេត្តព្រះសីហនុ ចោទក្រុមហ៊ុនវិនិយោគរបស់ចិន ឈ្មោះ យិះចៀ (Yee Jia) ដែលទទួលបានសិទ្ធិវិនិយោគសម្បទានសេដ្ឋកិច្ចនៅតំបន់ឧទ្យានជាតិព្រះសីហនុរាម ថាបានកាប់ឈើអនាធិបតេយ្យផ្ទុយពីកិច្ចសន្យា ដែលបានចុះកិច្ចព្រមព្រៀងជាមួយរដ្ឋាភិបាល។
បញ្ហានេះ អភិបាលខេត្តព្រះសីហនុ សន្យាពិនិត្យពីសកម្មភាពមិនប្រក្រតីនៃសកម្មភាពកាប់ឈើរបស់ក្រុមហ៊ុន យិះចៀ នៅក្នុងឧទ្យានជាតិរាម ដើម្បីមានវិធានការ។
សំឡេងម៉ាស៊ីនអារឈើ ឬរណាង៉ោង បានលាន់ឮរំពងចេញពីតំបន់ខ្លះនៃឧទ្យានជាតិព្រះសីហនុ ឬឧទ្យានជាតិរាម ដែលក្រុមហ៊ុន យិះចៀ របស់ប្រទេសចិន ទទួលបានសិទ្ធិវិនិយោគពីរាជរដ្ឋាភិបាលកម្ពុជា សម្រាប់អភិវឌ្ឍវិស័យទេសចរណ៍។
ប្រជាពលរដ្ឋរស់នៅឃុំរាម ស្រុកព្រៃនប់ ខេត្តព្រះសីហនុ និងជាបុគ្គលិកក្រុមហ៊ុន យិះចៀ បានប្រាប់វិទ្យុអាស៊ីសេរី ក្នុងលក្ខខណ្ឌមិនបញ្ចេញឈ្មោះថា រាល់ថ្ងៃនេះ ក្រុមហ៊ុន យិះចៀ បានកាប់ឈើអនាធិបតេយ្យនៅក្នុងឧទ្យានជាតិរាមពិតមែន។
កម្មករស៊ីឈ្នួលកាប់ឈើឲ្យក្រុមហ៊ុន យិះចៀ ឲ្យដឹងថា ក្រុមហ៊ុនបានផ្តល់លុយចំនួន ២០ម៉ឺនរៀល ក្នុងការផ្ដួលរំលំ ឬច្រៀកឈើ១ម៉ែត្រគូប។ ការពុះច្រៀកនោះ មិនមានឈើប្រណីតទេ ប៉ុន្តែជាប្រភេទឈើគគីរសាច់ ឬដើមចំបក់ ជាដើម។
បុគ្គលិកក្រុមហ៊ុន យិះចៀ ថ្លែងថា សកម្មភាពរបស់ក្រុមហ៊ុន យិះចៀ ហាក់មានភាពអាថ៌កំបាំង ព្រោះនៅក្នុងបរិវេណក្រុមហ៊ុននេះ គឺមិនអនុញ្ញាតឲ្យមនុស្សដើរឆ្លងកាត់ដោយសេរីទេ សូម្បីតែបុគ្គលិក ឬកម្មករក្រុមហ៊ុនក្តី។ ប្រជាពលរដ្ឋបញ្ជាក់ថា នៅតាមច្រកចេញចូលទៅកាន់ក្រុមហ៊ុន គឺបានពង្រាយសមត្ថកិច្ចប្រដាប់អាវុធឈរយាមកាមតឹងរ៉ឹង។ សូម្បីតែអាជ្ញាធរមូលដ្ឋាន ឬមន្ត្រីសង្គមស៊ីវិលជាដើម ក៏មិនអនុញ្ញាតឲ្យចូលទៅក្នុងបរិវេណក្រុមហ៊ុននោះទេ។
ទាក់ទិនបញ្ហានេះ កាលពីថ្ងៃទី១០ ខែតុលា ទាហានយាមប៉ុស្តិ៍ត្រួតពិនិត្យរបស់ក្រុមហ៊ុន យិះចៀ បានហាមមិនឲ្យសមាជិកក្រុមប្រឹក្សាឃុំរាម ដែលជូនដំណើរមន្ត្រីអង្គការលីកាដូ (Licadho) និងអាដហុក (Adhoc) ដើម្បីចូលជួបពលរដ្ឋរស់នៅតាមភូមិមួយចំនួនមានទីតាំងក្នុងបរិវេណក្រុមហ៊ុន យិះចៀ ទេ ព្រោះជាបទបញ្ជាមេ និងក្រុមហ៊ុន។
អ្នកឃ្លាំមើលការរំលោភសិទ្ធិមនុស្សរបស់អង្គការលីកាដូ ប្រចាំខេត្តព្រះសីហនុ លោក ឃុន សារឿន ទទួលស្គាល់ថា ឆ្មាំយាមក្រុមហ៊ុន យិះចៀ មានឯកសណ្ឋានកងទ័ព ពិតជាបានដាក់បម្រាមតឹងរ៉ឹង គឺមិនឲ្យមនុស្សចេញចូលទៅក្នុងបរិវេណក្រុមហ៊ុន យិះចៀ តាមផ្លូវកៅស៊ូដែលក្រុមហ៊ុននេះស្ថាបនាពិតមែន។ បន្ថែមលើនេះ ក្រុមហ៊ុន យិះចៀ ពិតជាបានកាប់ឈើនៅក្នុងឧទ្យានជាតិរាម ដែលក្រុមហ៊ុននេះទទួលបានសិទ្ធិវិនិយោគ ដើម្បីសង់សំណង់ផ្សេងៗនៅក្នុងក្រុមហ៊ុនថែមទៀត។
មន្ត្រីសិទ្ធិមនុស្សរូបនេះបង្ហាញមន្ទិលសង្ស័យចំពោះសកម្មភាពរបស់ក្រុមហ៊ុន យិះចៀ ថាបានអនុវត្តផ្ទុយពីកិច្ចព្រមព្រៀងវិនិយោគជាមួយរដ្ឋាភិបាល។ លោកស្នើដល់អភិបាលខេត្តព្រះសីហនុ ពិសេសប្រមុខរាជរដ្ឋាភិបាល ជួយស៊ើបអង្កេតចំពោះសកម្មភាពក្រុមហ៊ុន យិះចៀ ដែលមានភាពអាថ៌កំបាំងឲ្យបានឆាប់។
ទាក់ទិនបញ្ហានេះ លោក ឈិត សុខុន អភិបាលខេត្តព្រះសីហនុ មានប្រសាសន៍ថា មិនបានដឹងរឿងនេះទេ ប៉ុន្តែលោកថានឹងបញ្ជូនមន្ត្រីចុះពិនិត្យសកម្មភាពរបស់ក្រុមហ៊ុន យិះចៀ ឲ្យដឹងការពិត។ លោកសង្កត់ធ្ងន់ថា បើសិនជាមានករណីកាប់បំផ្លាញព្រៃឈើដូចពលរដ្ឋលើកឡើងពិតមែន គឺក្រុមហ៊ុន យិះចៀ បានអនុវត្ត ឬធ្វើសកម្មភាពរំលោភលើកិច្ចសន្យាវិនិយោគជាមួយរដ្ឋាភិបាល។
វិទ្យុអាស៊ីសេរី មិនទាន់អាចសុំការអត្ថាធិប្បាយពីក្រុមហ៊ុន យិះចៀ របស់ប្រទេសចិន ជុំវិញបញ្ហាទាំងឡាយដែលប្រជាពលរដ្ឋបានចោទ និងមន្ទិលសង្ស័យរបស់មន្ត្រីសង្គមស៊ីវិលមួយចំនួនបានទេ។
ប៉ុន្តែ កម្លាំងទាហានដែលស្លៀកពាក់ប៉ារ៉ាប្រចាំការនៅប៉ុស្តិ៍ត្រួតពិនិត្យចេញចូលក្រុមហ៊ុន យិះចៀ ឲ្យដឹងថា ពួកគេបានទទួលបញ្ជាពីមេ និងថៅកែក្រុមហ៊ុន គឺមិនអនុញ្ញាតឲ្យមនុស្សមិនស្គាល់អត្តសញ្ញាណ ឆ្លងកាត់ចូលទៅក្នុងបរិវេណក្រុមហ៊ុនបានទេ លើកលែងតែពលរដ្ឋមានលំនៅឋាននៅក្នុងបរិវេណក្រុមហ៊ុន យិះចៀ ទើបអនុញ្ញាតឲ្យឆ្លងកាត់ជាធម្មតា។
ក្រុមហ៊ុន យិះចៀ ធូរីហ្សឹម ឌឹវេឡុបមេន របស់ប្រទេសចិន បានទទួលសិទ្ធិពីរាជរដ្ឋាភិបាលកម្ពុជា សម្រាប់វិនិយោគអភិវឌ្ឍវិស័យទេសចរណ៍ក្នុងឧទ្យានជាតិព្រះសីហនុរាម នៅថ្ងៃទី១៨ ខែវិច្ឆិកា ឆ្នាំ២០០៨ ដែលមានទំហំផ្ទៃដីសរុបចំនួន ៣.៣០០ហិកតារក្នុងរយៈពេល ៩៩ឆ្នាំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។