អង្គការសម្ព័ន្ធទន្លេកម្ពុជា បានអំពាវនាវសុំឲ្យរដ្ឋាភិបាលយកចិត្តទុកដាក់ថែរក្សាធនធានធម្មជាតិ និងចៀសវាងការជម្លៀសប្រជាពលរដ្ឋចេញពីភូមិដ្ឋានរបស់គាត់ ដើម្បីយកទីតាំងសាងសង់ទំនប់វារីអគ្គិសនីនៅខេត្តកោះកុង។
តំណាងអង្គការសម្ព័ន្ធទន្លេកម្ពុជា លោក យុក សេងឡុង ថ្លែងនៅថ្ងៃទី១៩ ខែវិច្ឆិកា ឆ្នាំ២០១៣ ថា ការចុះសិក្សា១សប្ដាហ៍នៅទំនប់វារីអគ្គិសនីអាតៃ ខេត្តពោធិ៍សាត់ និងការរស់នៅរបស់ជនជាតិជង ក្នុងតំបន់គ្រោងសង់ទំនប់វារីអគ្គិសនីស្ទឹងឆាយអារ៉ែង នៅស្រុកថ្មបាំង ខេត្តកោះកុង មក សមាជិកអង្គការសម្ព័ន្ធទន្លេកម្ពុជា ដែលមានជិត ៣០អង្គការជាតិ និងអន្តរជាតិ កំពុងប្រជុំដើម្បីរៀបចំយុទ្ធសាស្ត្រដាក់ជូនរាជរដ្ឋាភិបាលកម្ពុជា ឲ្យជួយការពារធនធានធម្មជាតិនៅតំបន់ស្ទឹងអារ៉ែង ដែលគ្រោងនឹងសាងសង់ទំនប់វារីអគ្គិសនីស្ទឹងឆាយអារ៉ែង។ យុទ្ធសាស្ត្រនោះ គឺធ្វើយ៉ាងណាឲ្យផលប៉ះពាល់ធនធានធម្មជាតិ និងការជម្លៀសពលរដ្ឋកាន់តែតិច។
លោកបន្តថា ទំនប់វារីអគ្គិសនីស្ទឹងឆាយអារ៉ែង នឹងធ្វើឲ្យធនធានធម្មជាតិដងភ្នំក្រវាញភាគកណ្ដាល បាត់បង់។ លោកបន្ថែមថា តំបន់ស្ទឹងអារ៉ែង គួរតែប្ដូរពីទំនប់វារីអគ្គិសនីទៅតំបន់ទេសចរណ៍ធម្មជាតិវិញ អាចមានប្រយោជន៍ដល់សហគមន៍ជនជាតិដើមជង ផង ហើយរដ្ឋាភិបាលនឹងរក្សាបានធនធានព្រៃធម្មជាតិផង៖ «ផលប៉ះពាល់ដែលនឹងត្រូវកើតមានដល់តំបន់ស្ទឹងឆាយអារ៉ែង ពិសេសជាងគេ គឺជីវចម្រុះធនធានធម្មជាតិប្រភេទសត្វកម្រ និងប្រជាជនដើមរបស់យើង ដែលរស់នៅក្នុងតំបន់ស្ទឹងឆាយអារ៉ែង ក្នុងស្រុកថ្មបាំង»។
ស្ថាបនិកនៃអង្គការមាតាធម្មជាតិ លោក អេឡិច ថ្លែងថា នៅសប្ដាហ៍ទី២ និងទី៣ ក្នុងខែធ្នូ អង្គការនេះនឹងមានការធ្វើដំណើរពីកន្លែងគ្រោងសង់ទំនប់វារីអគ្គិសនី ចាប់ពីភូមិចំណារ ជាភូមិចុងក្រោយនៃឃុំប្រឡាយ ស្រុកថ្មបាំង ខេត្តកោះកុង ឆ្ពោះទៅកាន់ទីក្រុងភ្នំពេញ ក្នុងរយៈពេលជាង ២សប្ដាហ៍ក្នុងដំណើរចម្ងាយផ្លូវប្រមាណ ៣០០គីឡូម៉ែត្រ។ ការធ្វើដំណើរដោយជើងនោះ ក្នុងបំណងដាក់ញត្តិទៅស្ថានទូតចិន និងទៅក្រសួងខ្លះក្នុងរាជរដ្ឋាភិបាលកម្ពុជា ដើម្បីទប់ស្កាត់ការបំផ្លាញព្រៃចុងក្រោយ និងធនធានរ៉ែក្នុងប្រទេសកម្ពុជា ដោយសារទំនប់វារីអគ្គិសនីស្ទឹងឆាយអារ៉ែង។
លោកបន្តថា ប្រទេសកម្ពុជា ពិតណាស់ត្រូវការអភិវឌ្ឍ និងកំពុងខ្វះភ្លើងអគ្គិសនីប្រើប្រាស់ ប៉ុន្តែមិនគួរសង់ទំនប់វារីអគ្គិសនីនៅតំបន់ព្រៃធម្មជាតិដែលសេសសល់ចុងក្រោយទេ៖ «ប្រសិនបើរដ្ឋាភិបាលចង់អភិវឌ្ឍក្នុងគោលបំណងកាត់បន្ថយភាពក្រីក្រតំបន់អារ៉ែង មាតាធម្មជាតិក៏ដូចជាសហគមន៍ចូលរួមដែរ ប៉ុន្តែយើងមិនមែនអភិវឌ្ឍធ្វើវារីអគ្គិសនី តែយើងអភិវឌ្ឍធ្វើជាកន្លែងទេសចរណ៍ធម្មជាតិ សម្រាប់ជាប្រយោជន៍សហគមន៍ ហើយនិងប្រយោជន៍ខេត្តកោះកុង ដែលអនាគតនឹងទទួលបានភ្ញៀវជាតិ និងអន្តរជាតិច្រើន ដើម្បីយើងកាត់បន្ថយភាពក្រីក្រ ហើយនិងអភិវឌ្ឍសេដ្ឋកិច្ច»។
ទំនប់វារីអគ្គិសនីស្ទឹងឆាយអារ៉ែង នឹងផលិតបានថាមពលអគ្គិសនីបាន ១០៨មេហ្គាវ៉ាត់ នៅក្នុងរដូវវស្សា។ តែបើនៅរដូវប្រាំង ថាមពលអគ្គិសនីផលិតបាន ៦០មេហ្គាវ៉ាត់ទេ។ គម្រោងទំនប់នោះបានសិក្សាផលប៉ះពាល់តាំងពីឆ្នាំ២០០៦ ដោយក្រុមហ៊ុនមកពីប្រទេសចិន ឈ្មោះ ឆាយណា ផៅវើ ហ្រ្គីដ (China Power Grid) បន្ទាប់មកក្រុមហ៊ុនចិន ឈ្មោះ ឆាយណា ហ្គ័ទៀន ហីដ្រូផៅវើ (China GOUDIAN Hydropower)។
ប្រភពពីមន្ត្រីក្រសួងឧស្សាហកម្ម រ៉ែ និងថាមពល ឲ្យដឹងកាលពីថ្ងៃទី១៨ ខែវិច្ឆិកា ថា ទំនប់វារីអគ្គិសនីស្ទឹងឆាយអារ៉ែង តាមការលើកគម្រោងសាងសង់ គ្រោងចំណាយថវិកាអស់ជាង ៤០០លានដុល្លារ គិតទាំងសំណង ការអូសខ្សែ និងផលប៉ះពាល់ផ្សេងទៀត។ លោកថា គម្រោងទំនប់វារីអគ្គិសនីស្ទឹងឆាយអារ៉ែង កំពុងសិក្សានាពេលបច្ចុប្បន្នដោយក្រុមហ៊ុនថ្មីមួយទៀតឈ្មោះ ស៊ីនណូហាយដ្រូ រីសស (Sinohydro Resources )។ ការសិក្សាថ្មីនេះ គឺឲ្យលម្អិត និងស៊ីជម្រៅពីផលប៉ះពាល់ធនធានព្រៃឈើ និងមនុស្សក្នុងតំបន់ឲ្យកាន់តែតិច។ ទើបរដ្ឋាភិបាលកម្ពុជា មិនទាន់ចុះហត្ថលេខាប្រគល់ឲ្យក្រុមហ៊ុនណាមួយចូលសង់ទំនប់វារីអគ្គិសនីនៅតំបន់ស្ទឹងអារ៉ែង នៅឡើយ។
អង្គការសម្ព័ន្ធទន្លេកម្ពុជា នឹងដាក់យុទ្ធសាស្ត្រការពារធនធានធម្មជាតិដងភ្នំក្រវាញភាគកណ្ដាល ជូនទៅរដ្ឋាភិបាលកម្ពុជា នៅចុងសប្ដាហ៍ទី៤ នៃខែវិច្ឆិកា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។