រដ្ឋបាលខេត្តព្រះសីហនុ បានអះអាងថា ការបូមខ្សាច់សមុទ្ររបស់ក្រុមហ៊ុន អ៊ឹម.អេស.ខេ.អាយ (MSKl) ដើម្បីយកខ្សាច់មកអភិវឌ្ឍពង្រីកកំពង់ផែស្វយ័តខេត្តនេះ មិនប៉ះពាល់ដល់របរចិញ្ចឹមត្រី និងជីវចម្រុះនៅក្នុងបាតសមុទ្រដូចពលរដ្ឋព្រួយបារម្ភនោះទេ។ ប៉ុន្តែប្រជានេសាទស្រុកស្ទឹងហាវ បានឲ្យដឹងថា សកម្មភាពបូមខ្សាច់អភិវឌ្ឍកំពង់ផែ ខេត្តព្រះសីហនុ បានបំផ្លាញព្រៃកោងកាង ដុះតាមព្រែក និងប៉ះពាល់ដល់របរចិញ្ចឹមត្រីសមុទ្រ និងការធ្វើនេសាទជាលក្ខណៈគ្រួសាររបស់ពួកគេ។
អភិបាលខេត្តព្រះសីហនុ លោក យន្ត មីន ផ្ដល់សម្ភាសឲ្យអាស៊ីសេរី ដឹងតាមទូរស័ព្ទនៅថ្ងៃទី១៥ កុម្ភៈ ថា ផែនការអភិវឌ្ឍន៍ពង្រីកកំពង់ផែស្វយ័តខេត្តនេះ នឹងមិនប៉ះពាល់ដល់ការប្រកបរបរចិញ្ចឹមជីវិតរបស់ប្រជានេសាទ ឬប្រជាពលរដ្ឋដែលមានរបរចិញ្ចឹមត្រីសមុទ្រនោះទេ។
លោក យន្ត មីន សង្កត់ធ្ងន់ថា ការងារបូមខ្សាច់នេះ មុននឹងក្រសួង ឬស្ថាប័នពាក់ព័ន្ធអនុញ្ញាតច្បាប់ឲ្យក្រុមហ៊ុនបូមខ្សាច់នៅចំណុចព្រែក៣ ឃុំទំនប់រលក ស្រុកស្ទឹងហាវ ដើម្បីយកមកអភិវឌ្ឍពង្រីកកំពង់ផែខេត្តព្រះសីហនុ ឲ្យធំទូលាយ គឺមានការសិក្សាត្រឹមត្រូវជាមុន៖ «គួរតែសាមគ្គីគ្នាដើម្បីអភិវឌ្ឍខេត្តរបស់យើងទៅ។ បើងាប់ត្រីងាប់អីអាហ្នឹងយើងធានាសងតើ! ប៉ុន្តែបងប្អូនយើងមិនដឹងមាននរណាចេះតែចាក់រុក ឬឆ្កឹះឆ្កៀល។ ខ្ញុំក៏មិនជំទាស់អីដែរ យើងឲ្យមន្ត្រីយើងទៅ ហើយរាយការណ៍មកវិញ។ ខ្ញុំគាំទ្រ ប្រសិនបើប៉ះពាល់ធ្ងន់ធ្ងរ ក្រសួងរ៉ែ និងថាមពល គេមិនចេញអាជ្ញាប័ណ្ណឲ្យទេ»។
អភិបាលខេត្តព្រះសីហនុ លោក យន្ត មីន សន្យាថា បើការបូមខ្សាច់នៅចំណុចព្រែក៣ ស្រុកស្ទឹងហាវ សម្រាប់អភិវឌ្ឍពង្រីកកំពង់ផែខេត្តឲ្យបានទូលំទូលាយ ពិតជារកឃើញថា បាននាំឲ្យងាប់ត្រីចិញ្ចឹមរបស់ប្រជាពលរដ្ឋរស់នៅតំបន់នេះ ដូចការព្រួយបារម្ភមែននោះ សូមឲ្យប្រជាពលរដ្ឋរាប់ចំនួនត្រីដែលងាប់នោះផ្ដល់ព័ត៌មាន ឬរាយការណ៍មកកាន់ស្ថាប័នកំពង់ផែស្វយ័តខេត្តព្រះសីហនុ ដើម្បីឈានដល់ចេញថ្លៃខូចខាតតាមតម្លៃទីផ្សារលក់ត្រីជាក់ស្ដែង។
ការចេញមុខធានាអះអាងរបស់អភិបាលខេត្តព្រះសីហនុ ពេលនេះ កើតឡើងក្រោយពេលក្រុមប្រជាពលរដ្ឋសហគមន៍ចិញ្ចឹមត្រីសមុទ្រចំនួន ៣២គ្រួសារ រស់នៅក្នុងភូមិ១ ឃុំទំនប់រលក ស្រុកស្ទឹងហាវ បានលើកគ្នាតវ៉ាដល់ទីតាំងមានសាឡង់បូមខ្សាច់ នៅចំណុចព្រែក៣ កាលពីសប្ដាហ៍មុន និងត្រៀមប្រមូលផ្ដុំគ្នាដាក់ញត្តិតវ៉ាដល់មុខសាលាខេត្តព្រះសីហនុ នៅថ្ងៃខាងមុខ។
ប្រជានេសាទបានប្រតិកម្មថា សាឡង់បូមខ្សាច់ក្រុមហ៊ុន អ៊ឹម.អេស.ខេ.អាយ (MSKl) ដែលធ្វើសកម្មភាពនៅចំណុចព្រែក៣ ឃុំទំនប់រលក បានប៉ះពាល់ធ្ងន់ធ្ងរដល់របរចិញ្ចឹមត្រីសមុទ្ររបស់ពួកគាត់ ព្រោះពេលសាឡង់បូមខ្សាច់នៅតាមព្រែកនោះ ទឹកសមុទ្របានប្រែជាល្អក់ និងមានល្បាប់ភក់ផុសចេញពីបាតសមុទ្រ ដែលអាចនាំឲ្យត្រីងាប់។
ប្រជាពលរដ្ឋសហគមន៍ចិញ្ចឹមត្រីឆ្ពង់ ស្រុកស្ទឹងហាវ បានអំពាវដល់ថ្នាក់ដឹកនាំនៅតាមក្រសួងស្ថាប័នពាក់ព័ន្ធ ពិសេសអភិបាលខេត្តព្រះសីហនុ លោក យន្ត មីន ជួយដោះស្រាយកង្វល់នៃសកម្មភាពបូមខ្សាច់សមុទ្រ នៅចំណុចព្រែក៣ ឲ្យបានឆាប់ ឬសុំឲ្យប្ដូរទៅបូមនៅទីតាំងផ្សេងជំនួសវិញ៖ «ខ្ញុំសំណូមពរដល់អាជ្ញាធរជួយកូនចៅផង កូនចៅក្រីក្រណាស់ បានទៅចងការប្រាក់គេដើម្បីយកមកចិញ្ចឹមត្រី ប៉ុន្តែឥឡូវក្រុមហ៊ុនសាឡង់បូមខ្សាច់ បានជីកកាយធ្វើឲ្យល្អក់ទឹកងាប់ត្រី។ កូនចៅក្រីក្រណាស់ សូមអាជ្ញាធរជួយដល់កូនចៅផង»។
ប្រជាពលរដ្ឋម្នាក់ទៀតឲ្យដឹងថា សកម្មភាពបូមខ្សាច់នេះមិនត្រឹមតែប៉ះពាល់ដល់មុខរបរចិញ្ចឹមត្រីនោះទេ ប៉ុន្តែក៏បានប៉ះពាល់ដល់ប្រជាពលរដ្ឋក្រីក្រធ្វើរបរនេសាទជាលក្ខណៈគ្រួសារដើម្បីចិញ្ចឹមឆ្នាំងប្រចាំថ្ងៃ ដោយប្រើឧបករណ៍ដាក់លបក្ដាម និងដាក់មងត្រីជាដើម ត្រូវប្រឈមបាត់បង់មុខរបរដែរ៖ «សូមអាជ្ញាធរកុំឲ្យក្រុមហ៊ុនយកសាឡង់បូមខ្សាច់មកជីកកាយអីនៅព្រែក៣ នេះ ព្រោះបានប៉ះពាល់ដល់របរនេសាទ មានក្ដាម ងាវ និងការចិញ្ចឹមត្រីរបស់ប្រជាពលរដ្ឋនេះ ងាប់អស់ហើយ។ សូមឲ្យរាជរដ្ឋាភិបាលជួយពលរដ្ឋផង ព្រោះពលរដ្ឋនៅតំបន់ព្រែក៣ គ្មានដីធ្វើស្រែចម្ការទេ គឺរស់នៅពឹងផ្អែកតែទៅលើរបរចិញ្ចឹមត្រី និងធ្វើនេសាទសមុទ្រ រកងាវ រកខ្ចង ដើម្បីយកមកដោះដូរចិញ្ចឹមជីវិតតែប៉ុណ្ណោះ»។
អគ្គនាយកកំពង់ផែស្វយ័តខេត្តព្រះសីហនុ លោក លូ គឹមឈុន មានប្រសាសន៍ថា គម្រោងអភិវឌ្ឍន៍ពង្រីកកំពង់ផែថ្មីបន្ថែមនេះ គឺមានទំហំផ្ទៃដីសរុបជាង ១៦ហិកតារ ហើយចាប់ផ្ដើមស្ថាបនានៅចុងឆ្នាំ២០១៨ នឹងរួចរាល់ជាស្ថាពរនៅចុងឆ្នាំ២០២២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។