ក្រសួង​រ៉ែ​និង​ថាមពល​គ្រោង​ប្រមូល​ចំណូល​ពី​វិស័យ​រ៉ែ​ឲ្យ​បាន​២០​លាន​ដុល្លារ​នៅ​ឆ្នាំ​២០១៧

ដោយ យ៉ង ចាន់តារា
2017-03-19
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
អគ្គនាយក​រង​នៃ​អគ្គនាយកដ្ឋាន​ធនធាន​រ៉ែ នៃ​ក្រសួង​រ៉ែ និង​ថាមពល លោក អ៊ឹង ឌីប៉ូឡា ធ្វើ​បទ បង្ហាញ​អំពី​គោល​នយោបាយ​ជា​យុទ្ធសាស្ត្រ​គ្រប់គ្រង​វិស័យ​រ៉ែ ប្រេង និង​ឧស្ម័ន នៅ​ព្រឹក​ថ្ងៃ​ទី​១៩ ខែ​មីនា ឆ្នាំ​២០១៧។
អគ្គនាយក​រង​នៃ​អគ្គនាយកដ្ឋាន​ធនធាន​រ៉ែ នៃ​ក្រសួង​រ៉ែ និង​ថាមពល លោក អ៊ឹង ឌីប៉ូឡា ធ្វើ​បទ បង្ហាញ​អំពី​គោល​នយោបាយ​ជា​យុទ្ធសាស្ត្រ​គ្រប់គ្រង​វិស័យ​រ៉ែ ប្រេង និង​ឧស្ម័ន នៅ​ព្រឹក​ថ្ងៃ​ទី​១៩ ខែ​មីនា ឆ្នាំ​២០១៧។
RFA/Yang Chandara

ក្រសួង​រ៉ែ និង​ថាមពល គ្រោង​ប្រមូល​ចំណូល​ពី​វិស័យ​រ៉ែ​ឲ្យ​បាន ២០​លាន​ដុល្លារ​នៅ​ឆ្នាំ​២០១៧ នេះ។ តំណាង​ក្រសួង​រ៉ែ និង​ថាមពល លើក​ឡើង​បែប​នេះ​នៅ​ក្នុង​វេទិកា​យុវជន​ស្ដីពី “អភិបាលកិច្ច​ឧស្សាហកម្ម​និស្សារណកម្ម” ដែល​ត្រូវ​បាន​រៀបចំ​ឡើង​ដោយ​អង្គការ​កម្មវិធី​អភិវឌ្ឍន៍​ធនធាន​យុវជន (YRDP) នៅ​ព្រឹក​ថ្ងៃ​ទី​១៩ មីនា នៅ​រាជធានី​ភ្នំពេញ។

អគ្គនាយក​រង​នៃ​អគ្គនាយកដ្ឋាន​ធនធាន​រ៉ែ​នៃ​ក្រសួង​រ៉ែ និង​ថាមពល លោក អ៊ឹង ឌីប៉ូឡា បញ្ជាក់​ថា ក្រសួង​បាន​ដាក់​ចេញ​នូវ​យុទ្ធសាស្ត្រ ៣​សំខាន់ ដើម្បី​ប្រមូល​ចំណូល​ធនធាន​រ៉ែ​ឲ្យ​បាន ២០​លាន​ដុល្លារ​នៅ​ឆ្នាំ​២០១៧ នេះ។ នោះ​គឺ​ជា​ការ​ពង្រឹង​ការ​អនុវត្ត​ច្បាប់ ការ​ធ្វើ​អធិការកិច្ច ព្រម​ទាំង​ការ​ដាក់​ទោស​ទណ្ឌ និង​ការ​ពិន័យ​ចំពោះ​ក្រុមហ៊ុន​ណា​ដែល​ប្រព្រឹត្ត​ល្មើស​នឹង​លក្ខខណ្ឌ​ដែល​មាន​ចែង​ក្នុង​អាជ្ញាប័ណ្ណ និង​កិច្ចព្រមព្រៀង។

លោក​បញ្ជាក់​ទៀត​ថា ចាប់​ពី​ឆ្នាំ​២០១៧ នេះ​ទៅ ក្រសួង​នឹង​លែង​ឲ្យ​មាន​បំណុល​ធនធាន​រ៉ែ​ត​ទៅ​ទៀត​ហើយ ពោល​គឺ​រាល់​ក្រុមហ៊ុន​ដែល​ធ្វើ​អាជីវកម្ម​ទាំងអស់ ត្រូវ​តែ​បង់ ឬ​ទូទាត់​ថវិកា​ដែល​ជំពាក់​មក​ឲ្យ​រដ្ឋ​វិញ​ជា​ចាំបាច់។

លោក អ៊ឹង ឌីប៉ូឡា ទទួល​ស្គាល់​ថា ចំណូល​ពី​វិស័យ​រ៉ែ​ដែល​ប្រមូល​បាន​កាល​ពី​រយៈពេល​ប៉ុន្មាន​ឆ្នាំ​មុន​មាន​ចំនួន​តិច ដោយសារ​មាន​ចន្លោះ​ខ្វះខាត​ច្រើន​ទាក់ទង​នឹង​ការ​ប្រមូល​ចំណូល​នេះ។ ក៏ប៉ុន្តែ​លោក​ថា ចំណូល​ពី​វិស័យ​រ៉ែ​បាន​កើន​ឡើង​ខ្លាំង​ចាប់​តាំង​ពី​ឆ្នាំ​២០១៥ ពោល​គឺ​នៅ​ក្រោយ​ពេល​រដ្ឋាភិបាល​ដាក់​ចេញ​នូវ​កំណែ​ទម្រង់​ក្នុង​វិស័យ​មួយ​នេះ«ក្នុង​ឆ្នាំ​២០១៧ នេះ គឺ​ចំណូល​នឹង​អាច​ឡើង​ដល់ ២០​លាន​ដុល្លារ។ នេះ​ជា​គោលការណ៍​របស់​យើង។ យើង​ធ្វើ​ម៉េច​ជំរុញ​ឲ្យ​ចំណូល​នេះ​កាន់​តែ​ច្រើន។ យើង​ត្រូវ​តែ​ធ្វើ​ការ​តាមដាន​ឲ្យ​អស់​ពី​សក្ដានុពល​នៃ​ការ​ធ្វើ​អាជីវកម្ម​រ៉ែ​ហ្នឹង។ មក​ដល់​ថ្ងៃ​នេះ មិន​ត្រឹម​តែ​ការ​ចុះ ៣​ខែ និង​ចុះ​រៀង​រាល់​ខែ​ប៉ុណ្ណោះ​ទេ យើង​មាន​ក្រុម​អធិការកិច្ច​ដែល​ជា​ក្រុម​ពិសេស​ឲ្យ​តែ​មាន​ការ​ប្ដឹង​ពី​ប្រជាពលរដ្ឋ​ថា អាច​មាន​មន្ទិល​សង្ស័យ​ថា ការ​ធ្វើ​អាជីវកម្ម​រ៉ែ​នោះ​អាច​ខុស​ច្បាប់ អាច​គាត់​មាន​អាជ្ញាប័ណ្ណ​ហើយ ក៏ប៉ុន្តែ​គាត់​មិន​អនុលោម គឺ​យើង​ចុះ​ទៅ​ត្រួត​ពិនិត្យ​ផ្ទាល់​ដល់​ការដ្ឋាន​នោះ​តែ​ម្តង»

តួលេខ​របស់​ក្រសួង​រ៉ែ និង​ថាមពល បង្ហាញ​ថា ក្រសួង​ប្រមូល​ចំណូល​ពី​វិស័យ​រ៉ែ​បាន​ចំនួន ២​លាន​ដុល្លារ​នៅ​ឆ្នាំ​២០១៣ និង ៣​លាន​ដុល្លារ​នៅ​ឆ្នាំ​២០១៤។ តួលេខ​នៃ​ចំណូល​ពី​វិស័យ​នេះ បាន​កើន​ឡើង​ដល់ ១០​លាន​ដុល្លារ​នៅ​ឆ្នាំ​២០១៥ និង ១៣​លាន​ដុល្លារ​នៅ​ឆ្នាំ​២០១៦។ ចំណូល​ធនធាន​រ៉ែ​នេះ​បាន​មក​ពី​រ៉ែ​ខ្សាច់ ថ្ម​សំណង់ សេវាកម្ម​សាធារណៈ ឧស្សាហកម្ម​អាជីវកម្ម​រ៉ែ ដូចជា រ៉ែ​លោហៈ និង​រ៉ែ​មាស ជាដើម និង​ការ​ផ្តល់​អាជ្ញាប័ណ្ណ​ចំពោះ​អាជីវកម្ម​រ៉ែ​តូចៗ។

នាយក​ប្រតិបត្តិ​នៃ​អង្គការ​សម្ព័ន្ធ​គណនេយ្យ​ភាព​សង្គម​កម្ពុជា លោក សន ជ័យ យល់​ឃើញ​ថា ចំណូល​ត្រឹម ២០​លាន​ដុល្លារ​ដែល​ក្រសួង​រ៉ែ និង​ថាមពល គ្រោង​ប្រមូល​ឲ្យ​បាន​នៅ​ឆ្នាំ​២០១៧ នេះ ហាក់​នៅ​មាន​កម្រិត​ទាប​នៅ​ឡើយ បើ​ប្រៀបធៀប​ទៅ​នឹង​អាជីវកម្ម​រ៉ែ​គ្រប់​ប្រភេទ​ដែល​កំពុង​កើត​មាន​នៅ​ទូទាំង​ប្រទេស«សូចនាករ ២០​លាន​ដុល្លារ​ក្នុង​មួយ​ឆ្នាំ​នេះ​នៅ​ទាប​នៅ​ឡើយ។ យើង​ចង់​ឲ្យ​ការ​កំណត់​សូចនាករ​មួយ​ធំ​ជាង​នេះ ខណៈ​ដែល​យើង​មើល​ឃើញ​ថា ការ​រុក​រក​រ៉ែ និង​ការ​វិនិយោគ​ខាង​វិស័យ​រ៉ែ​មាន​ទំហំ​ធំ មាន​ព្រៃ​ព្រឹក្សា មាន​ភ្នំ​មួយ​ចំនួន​ហ្នឹង​ស្ទើរ​តែ​ខ្ទេចខ្ទី​អស់​ហើយ។ អ៊ីចឹង​រឿង​ដែល​សំខាន់​ហ្នឹង គឺ​ឲ្យ​ចំណូល​ជាតិ​បាន​មក​ឲ្យ​វា​ធំ​ជាង​អ្វី​ដែល​បាត់បង់​ទៅ»

លោក សន ជ័យ លើក​ឡើង​ពី​ក្តី​បារម្ភ​មួយ​ទៀត​ទាក់ទង​នឹង​ការ​ប្រមូល​ចំណូល​ពី​ធនធាន​រ៉ែ គឺ​ការ​គេច​មិន​បង់​ពន្ធ ដែល​លោក​ហៅ​ថា​ជា​ការ​រំលោភ​អំណាច ប្រព្រឹត្ត​ដោយ​ក្រុម​អ្នក​មាន​លុយ និង​មាន​អំណាច​ដែល​ជា​ម្ចាស់​ក្រុមហ៊ុន​ធ្វើ​អាជីវកម្ម​រ៉ែ«ខ្ញុំ​គិត​ថា​ក្រសួង​គួរ​តែ​កុំ​ផ្សងព្រេង បើ​សិន​ជា​សមត្ថភាព​នៃ​ការ​គ្រប់គ្រង​នៅ​ជា​ចំណុច​សង្ស័យ​របស់​ខ្លួន ថា​ដូចជា​ពិបាក​គ្រប់គ្រង មើល​ទៅ​ដូចជា​អត់​មាន​ធនធាន​មនុស្ស​គ្រប់គ្រាន់។ អ៊ីចឹង​រ៉ែ​ណា​ដែល​ខ្វះ​ធនធាន​មនុស្ស​ក្នុង​ការ​គ្រប់គ្រង ឬ​ក៏​ខ្វះ​អំណាច​ក្នុង​ការ​គ្រប់គ្រង ខ្ញុំ​គិត​ថា​គួរ​តែ​ពិចារណា​កុំ​ឲ្យ​មាន​ការ​ផ្តល់​អាជ្ញាប័ណ្ណ។ យើង​គ្រាន់​តែ​មើល​រឿង​ខ្សាច់​មួយ​មាន​បញ្ហា​ច្រើន​គួរសម។ រឿង​អាស្រូវ​បាត់​ខ្សាច់​ទៅ​ក្រៅ​ប្រទេស​ផង និង​ភាព​មិន​ប្រក្រតី​នៃ​ការ​បូម​ខ្សាច់​ក្រៅ​តំបន់​អាជ្ញាប័ណ្ណ សុទ្ធសឹងតែ​ជា​មេរៀន​ដែល​ក្រសួង​គួរ​តែ​ពិចារណា មុន​នឹង​ឲ្យ​អាជ្ញាប័ណ្ណ​រុក​រក​រ៉ែ​ផ្សេង​ទៀត»

កាល​ពី​ឆ្នាំ​២០១៦ កន្លង​ទៅ ក្រសួង​ផ្ដល់​អាជ្ញាប័ណ្ណ​អណ្ដូង​រ៉ែ និង​ការដ្ឋាន​វាយ​ថ្ម​ចំនួន ៤០១​អាជ្ញាប័ណ្ណ ស្វែង​រុករក​ចំនួន ៦១​អាជ្ញាប័ណ្ណ ឧស្សាហកម្ម​អាជីវកម្ម​ធនធាន​រ៉ែ​ចំនួន ២៣ និង​អាជ្ញាប័ណ្ណ​សិប្បកម្ម​ចំនួន ៣២៦។ ធនធាន​រ៉ែ​ដែល​ក្រសួង​ផ្ដល់​អាជ្ញាប័ណ្ណ រួម​មាន​រ៉ែ​ថ្ម​កំបោរ រ៉ែ​ធ្យូង​ថ្ម និង​រ៉ែ​លោហៈ ដែល​មាន​នៅ​ខេត្ត​កំពត បាត់ដំបង ព្រះវិហារ មណ្ឌលគិរី និង​ខេត្ត​រតនគិរី៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល