សហគមន៍ជនជាតិដើមភាគតិចជង នៅតំបន់អារ៉ែង ស្រុកថ្មបាំង ខេត្តកោះកុង ២០នាក់ ធ្វើដំណើរមកភ្នំពេញ នៅថ្ងៃអាទិត្យ ទី៥ តុលា ដើម្បីត្រៀមស្នើសុំឲ្យលោកនាយករដ្ឋមន្ត្រី ហ៊ុន សែន ចេញលិខិតជាលាយលក្ខណ៍អក្សរលុបចោលគម្រោងសង់ទំនប់វារីអគ្គិសនីស្ទឹងអារ៉ែងចោល និងប្រែក្លាយអារ៉ែង ជាតំបន់អភិវឌ្ឍន៍អេកូទេសចរណ៍ធម្មជាតិ។
គម្រោងស្នើសុំនេះ ធ្វើឡើងបន្ទាប់ពីមេបក្សប្រឆាំង លោក សម រង្ស៊ី បញ្ជាក់ថា លោកនាយករដ្ឋមន្ត្រី ហ៊ុន សែន បានសន្យាថាមិនទាន់អនុវត្តគម្រោងទំនប់វារីអគ្គិសនីតំបន់អារ៉ែងទេ នៅក្នុងអាណត្តិទី៥នេះ។
ប្រធានសមាគមជនជាតិជង លោក វ៉ែន វ៉ន បញ្ជាក់ជំហរថា បើគ្មានការប្រកាសផ្លូវការពីលោក ហ៊ុន សែន នោះជនជាតិជងនៅអារ៉ែង នៅមិនទាន់ទុកចិត្តបានចំពោះផែនការលុបចោលគម្រោងទំនប់វារីអគ្គិសនីអារ៉ែងឡើយ៖ «មានគម្រោងចង់ឲ្យសម្ដេចនាយកធ្វើឯកសារប្រកាសជាផ្លូវការលុបគម្រោងសាងសង់ទំនប់វារីអគ្គិសនីជាផ្លូវការ។ ទី២ទៀតពួកខ្ញុំចង់សុំឯកសារសិក្សាពីក្រុមហ៊ុន SBK ពីដើមឆ្នាំ២០១៤ ត្រឡប់មកវិញ ទី៣ទៀតពួកខ្ញុំចង់ឲ្យស្ថាប័នរដ្ឋដែលពាក់ព័ន្ធជំរុញឲ្យតំបន់ហ្នឹងទៅជាតំបន់អេកូទេសចរណ៍ធម្មជាតិ»។
តាមផែនទីរបស់អង្គការ ស៊ី.អាយ (Conservation International) និងរដ្ឋបាលព្រៃឈើបង្ហាញថា តំបន់អារ៉ែងមានទំហំជាង ២ម៉ឺនហិកតារ ហើយសត្វកម្រ និងសត្វព្រៃចំនួនជាង ២០០ប្រភេទ នឹងរងផលប៉ះពាល់ពីការសាងសាងទំនប់វារីអគ្គិសនី។
លិខិតបំភ្លឺមួយរបស់ក្រសួងរ៉ែនិងថាមពលបានបង្ហាញថា ក្រសួងបានសិក្សាបឋមជាមួយអ្នកជំនាញពីផលប៉ះពាល់នានាពាក់ព័ន្ធនឹងបក្សី ថនិកសត្វ និងមច្ឆាជាតិ ដោយត្រួតពិនិត្យអំពីលក្ខខណ្ឌរស់នៅ និងចរាចរណ៍របស់សត្វទាំងនោះ ដើម្បីរកវិធីធ្វើការអភិរក្ស និងកាត់បន្ថយផលប៉ះពាល់ឲ្យនៅតិចបំផុត។ លិខិតនោះសរសេរទៀតថា គម្រោងនៃការអភិវឌ្ឍវារីអគ្គិសនីស្ទឹងអារ៉ែង ខេត្តកោះកុងនេះ គឺដើម្បីជំរុញកំណើនសេដ្ឋកិច្ច និងការកាត់បន្ថយភាពក្រីក្រ។
ប៉ុន្តែជនជាតិភាគតិចជងរស់នៅតំបន់នោះ និងអង្គការសង្គមស៊ីវិលរកឃើញថា ផែនការអភិវឌ្ឍន៍ដែលជាគោលនយោបាយកាត់បន្ថយភាពក្រីក្រនោះ ទំនងជាជំរុញឲ្យពួកគាត់វិលទៅរកភាពក្រីក្រទៅវិញ ដោយត្រូវបង្ខំឲ្យពួកគាត់ចាកចេញពីលំនៅឋានជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។