ប្រជាពលរដ្ឋខ្លះរស់នៅភូមិដូនស្វា ឃុំចារឈូក នៃស្រុកអង្គរជុំ ខេត្តសៀមរាប នៅតែបន្តទាមទារឱ្យរោងម៉ាស៊ីនអគ្គិសនីជនបទមួយ ដែលដើរដោយថាមពលជីវម៉ាស ត្រូវតែផ្លាស់ប្ដូរចេញពីទីតាំងបច្ចុប្បន្ន។ ចាប់តាំងតែពីអំឡុងខែមករា ឆ្នាំ២០១៤ មកម្ល៉េះ តំណាងអ្នកភូមិដូនស្វា បានដាក់ពាក្យបណ្ដឹងថា រោងម៉ាស៊ីនអគ្គិសនីជីវម៉ាសនោះតែងបង្ហុយផេះ អង្កាម និងក្លិនឧស្ម័ន មកលើអ្នកភូមិ រួមទាំងសាលារៀន និងមន្ទីរពេទ្យជារៀងរាល់ថ្ងៃ ធ្វើឱ្យប៉ះពាល់សុខភាព ដូចជា បង្កឱ្យឈឺក្បាល និងវិលមុខ ជាដើម។
មន្ត្រីសាលាខេត្តសៀមរាប បានដឹកនាំគណៈកម្មការចម្រុះ និងក្រុមអ្នកជំនាញកិច្ចការបរិស្ថាន ចុះទៅត្រួតពិនិត្យមើលរោងម៉ាស៊ីនអគ្គិសនីជនបទមួយ ដែលដើរដោយថាមពលជីវម៉ាស កាលពីថ្ងៃព្រហស្បតិ៍ ទី២៧ ខែមីនា កន្លងទៅ។
ការចុះត្រួតពិនិត្យនេះ ដើម្បីស្វែងរកការពិតមួយថា តើរោងម៉ាស៊ីនអគ្គិសនីក្នុងស្រុកអង្គរជុំ នោះពិតជាបានធ្វើឱ្យប៉ះពាល់ដល់សុខភាពសាធារណៈ ដូចការចោទប្រកាន់ពីប្រជាពលរដ្ឋខ្លះមែន ឬក៏យ៉ាងណា?
ជំនួយការអភិបាលខេត្តសៀមរាប ដែលជាអ្នកដឹកនាំការចុះត្រួតពិនិត្យនោះ គឺលោក សុខ ថុល។ លោកបានមានប្រសាសន៍កាលពីរសៀលថ្ងៃសៅរ៍ ទី២៩ ខែមីនា ថា មានមន្ត្រីជាច្រើនផ្នែកបានចុះទៅពិនិត្យជាមួយរូបលោក ដូចជាមន្ត្រីខាងអន្តរវិស័យ និងមន្ទីរបរិស្ថាន ជាដើម។
លោក សុខ ថុល បានបញ្ជាក់ថា ការចុះត្រួតពិនិត្យ គឺលោកឃើញមានក្លិនឆួលចេញពីការដុតអង្កាម ធ្វើឱ្យប៉ះពាល់ប្រជាពលរដ្ឋ និងមន្ទីរពេទ្យ ដែលនៅជុំវិញនោះមែន។ ទោះយ៉ាងណា មន្ត្រីដដែលបានទទួលស្គាល់ថា ទីតាំងនៃរោងម៉ាស៊ីនអគ្គិសនីនោះ គឺមានការរៀបចំដោយគិតគូរទៅលើកិច្ចការពារបរិស្ថានដែរ៖ «កន្លែងទីតាំងហ្នឹង គឺថាគាត់បានរៀបចំស្រួលបួលដែរ ប៉ុន្តែវាមានក្លិនឆួលដែលប៉ះពាល់មន្ទីរពេទ្យនៅជិតគ្នា។ អ៊ីចឹងក្រុមការងារយើងបានចុះទៅជួបប្រជាពលរដ្ឋអ្នករស់នៅជុំវិញហ្នឹង រហូតដល់ចុះទៅជួបនាយកសាលាវិទ្យាល័យអង្គរជុំ។ យើង និងក្រុមការងារ ដឹកនាំប្រជុំរួមមួយ ដើម្បីពិភាក្សាសុំយោបល់ពីអាជ្ញាធរដែនដីមេភូមិ មេឃុំ ហើយនិងស្រុក។ គាត់បានសំណូមពរឱ្យអាជ្ញាធរខេត្តផ្លាស់ប្ដូរទីតាំងហ្នឹង»។
លោក សុខ ថុល បានបញ្ជាក់ថា ក្រុមការងាររបស់លោកមិនហ៊ានសម្រេចថានឹងត្រូវធ្វើការផ្លាស់ប្ដូរទីតាំងរោងម៉ាស៊ីនអគ្គិសនីជីវម៉ាសនោះ ឬយ៉ាងណាទេ គឺក្រុមការងារបានត្រឹមតែធ្វើរបាយការណ៍ដាក់ជូនអភិបាលខេត្តសៀមរាប ដើម្បីធ្វើការសម្រេច។
ចំណែកនាយកវិទ្យាល័យអង្គរជុំ លោក ស ក្រិត្យ បានអះអាងប្រហាក់ប្រហែលគ្នាថា រោងម៉ាស៊ីនអគ្គិសនីជនបទដើរដោយថាមពលជីវម៉ាសនោះ ពិតជាបានភាយក្លិនដែលដុតអង្កាមទៅលើសាលារៀនមែន នៅពេលណាដែលខ្យល់បក់ចំទិសម្ដងៗ។
ទោះយ៉ាងណា នាយកគ្រប់គ្រងក្នុងស្រុករបស់ក្រុមហ៊ុន អាយ.អ៊ី.ឌី អ៊ីនវែសមេន (IED Invest Cambodia) គឺលោក គី ចាន់ថន បានប្រតិកម្មថា លោកមិនអាចទទួលយកបានទេ ចំពោះការចោទប្រកាន់លើរោងម៉ាស៊ីនអគ្គិសនីដើរដោយថាមពលជីវម៉ាសដុតអង្កាម នាស្រុកអង្គរជុំ ដែលថាបានបង្ហុយផេះ និងភាយក្លិនឧស្ម័ន ធ្វើឱ្យប៉ះពាល់ដល់ប្រជាពលរដ្ឋនោះ។ លោក គី ចាន់ថន បានអះអាងថា ទាំងក្រុមការងារ ចុះត្រួតពិនិត្យទាំងអ្នកធ្វើកំណត់ហេតុ និងប្រជាពលរដ្ឋដែលចូលរួមប្រជុំកាលពីពេលថ្មីៗ គឺសុទ្ធតែត្រូវគ្នាក្នុងបំណងរករឿងរោងម៉ាស៊ីនអគ្គិសនីទាំងអស់។ អ្នកគ្រប់គ្រងដដែលបញ្ជាក់ថា នៅក្នុងកិច្ចប្រជុំនោះ គឺទាំងគណៈកម្មការ និងអ្នកធ្វើកំណត់ហេតុ មិនបានស្ដាប់ការពន្យល់ពីភាគីរបស់ក្រុមហ៊ុនទេ៖ «ធ្វើអ្វី គឺអត់មានមូលដ្ឋានអ្វីមួយ ក៏ប៉ុន្តែគ្រាន់តែថា យើងរស់នៅប្រទេសហ្នឹងក្រោមដំបូលផ្ទះគេ ក៏យើងត្រូវតែគោរពដែរ បើសិនជាគេថាយ៉ាងម៉េចនោះ។ ប៉ុន្តែគ្រាន់ថា ក្នុងនាមយើងជាអ្នកវិនិយោគទុនឯកជនក្រៅប្រទេស យើងមានការអន់ចិត្តបន្តិចដែរ ពីព្រោះគម្រោងនេះមិនមែនយើងចេះតែធ្វើៗដូចអ្នកដទៃទេ»។
រោងម៉ាស៊ីនថាមពលជីវម៉ាសសម្រាប់ផ្គត់ផ្គង់អគ្គិសនីជនបទ នៅស្រុកអង្គរជុំ នេះបានចាប់ដំណើរការកាលពីអំឡុងឆ្នាំ២០១១ ក្រោមជំនួយគាំទ្រ និងវិនិយោគពីក្រសួងឧស្សាហកម្ម រ៉ែ និងថាមពល រួមនិងអង្គការសហប្រជាជាតិ ដើម្បីអភិវឌ្ឍឧស្សាហកម្ម (UNDO) ដើម្បីលើកកម្ពស់លើកិច្ចការពារបរិស្ថាន និងកាត់បន្ថយការឡើងកម្ដៅផែនដីផង។
កន្លងទៅ រោងម៉ាស៊ីនអគ្គិសនីមួយនេះធ្លាប់បានជួយប្រជាពលរដ្ឋមួយកម្រិត ដោយបញ្ចុះតម្លៃភ្លើងដែលធ្លាប់តែថ្លៃ ៣.៤០០រៀលក្នុង១គីឡូវ៉ាត់ម៉ោង ឱ្យចុះមកនៅត្រឹម ១.៧០០រៀល។
ទោះយ៉ាងណា អ្នកស៊ើបអង្កេតរបស់សមាគមការពារសិទ្ធិមនុស្សអាដហុក លោក សួស ណារិន ដែលបានចុះពិនិត្យដែរ បានរកឃើញថា រោងម៉ាស៊ីនដើរដោយថាមពលជីវម៉ាសនោះ គឺពិតជាបានភាយក្លិនមិនល្អ និងឮសំឡេងខ្លាំង ព្រមទាំងកម្ទេចផេះដែលដុតអង្កាម ពិតជារសាត់អណ្ដែតទៅប៉ះពាល់សុខភាពសាធារណៈមែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។