សាលារាជធានីភ្នំពេញ នៅថ្ងៃទី៥ ខែមេសា បានចេញសេចក្ដីជូនដំណឹងមួយដល់ពលរដ្ឋក្នុងរាជធានីភ្នំពេញ ថា ការផ្ដល់សេវាសម្អាត ប្រមូល និងដឹកជញ្ជូនសំរាមនៅក្នុងរាជធានីភ្នំពេញ នឹងមានភាពរអាក់រអួលប្រមូលមិនបានពេញលេញចំនួន ៧ថ្ងៃ ចាប់ពីថ្ងៃទី១២ ដល់ថ្ងៃទី១៨ មេសា ឆ្នាំ២០១៣។
នាយករងរបស់ក្រុមហ៊ុនប្រមូលសំរាមស៊ីនទ្រី (CINTRI) លោក សេង ចំរើន បានថ្លែងនៅថ្ងៃទី៦ មេសា ថា ក្នុងរយៈពេល ៧ថ្ងៃនេះ លោកសុំឲ្យប្រជាពលរដ្ឋក្នុងរាជធានីវេចខ្ចប់ និងទុកដាក់សំរាមនៅក្នុងផ្ទះរៀងៗខ្លួនឲ្យបានត្រឹមត្រូវ កុំបញ្ចេញសំរាមមកខាងក្រៅផ្ទះ និងចោលតាមទីសាធារណៈដែលធ្វើឲ្យប៉ះពាល់ដល់សណ្ដាប់ធ្នាប់ ការធ្វើចរាចរណ៍ អនាម័យ សោភ័ណភាព និងបរិស្ថានទីក្រុង។
លោក សេង ចំរើន៖ «ខ្ញុំជាអ្នកធ្វើកិច្ចការនេះផ្ទាល់ សូមសំណូមពរដល់បងប្អូនប្រជាពលរដ្ឋយើងទាំងអស់ ចូលរួមនៅថ្ងៃបុណ្យចូលឆ្នាំ ដោយសារឈប់សម្រាកនៅថ្ងៃប្រពៃណីជាតិអ៊ីចឹង។ កម្មករយើងក៏ត្រូវឈប់សម្រាកដែរ ដូច្នេះយើងនឹងខ្វះបុគ្គលិកធ្វើការងារនៅថ្ងៃនេះឯង ដើម្បីចូលរួមឲ្យទីក្រុងយើងស្អាត សូមប្រជាពលរដ្ឋយើងទុកដាក់សំរាមវេចខ្ចប់ឲ្យបានត្រឹមត្រូវនៅក្នុងថង់ ទុកដាក់ក្នុងផ្ទះ ក្នុងធុងឲ្យបានល្អ ថែមទាំងកុំឲ្យមានក្លិននៅក្នុងការទុកដាក់ក្នុងផ្ទះខ្លួនឯង ដើម្បីរង់ចាំចប់ចូលឆ្នាំ សង្ឃឹមថាកម្មករនឹងវិលមកទាន់ពេលវេលា យើងនឹងធ្វើការដូចពេលដើមវិញ»។
ក្រុមហ៊ុនប្រមូលសំរាមស៊ីនទ្រី មានកម្មករបោស និងប្រមូលសំរាមក្នុងរាជធានីភ្នំពេញ ប្រមាណ ១ពាន់នាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។