គម្រោងប្រើប្រាស់ថាមពលស្អាតនោះ ធ្វើឡើងនៅគ្រាដែលអ្នកជំនាញបរិស្ថានអន្តរជាតិ បានប្រកាសអាសន្នអំពីការប្រែប្រួលអាកាសធាតុនៅលើពិភពលោក។ មន្ត្រីជំនាញទាំងនោះបានមកផ្ទេរបច្ចេកវិទ្យាដល់ប្រទេសកម្ពុជា ឲ្យប្រើប្រាស់កាកសំណល់ជីវម៉ាសកសិកម្មសម្រាប់ផលិតថាមពលដែលមានចិរភាព និងមិនបំផ្លាញបរិស្ថាន។
គម្រោងប្រើប្រាស់ថាមពលស្អាត និងថាមពលបង្កើតឡើងវិញនោះ មានដូចជាអង្កាម និងកាកសំណល់កសិកម្មមួយចំនួនទៀត ដើម្បីកាត់បន្ថយជាតិកាបូន និងឧស្ម័នកាបូនិក ឲ្យនៅចំនួនតិចបំផុតក្នុងបរិយាកាសនៅប្រទេសកម្ពុជា និងកាត់បន្ថយការប្រើប្រាស់ប្រេងឥន្ធនៈឲ្យនៅចំនួនតិចបំផុតដែរ។
ការចាប់ផ្ដើមអនុវត្តគម្រោងនេះ នៅគ្រាដែលប្រជាពលរដ្ឋកម្ពុជា កំពុងតែត្រូវការថាមពលកាន់តែច្រើនៗឡើងក្នុងមួយឆ្នាំៗសម្រាប់ការអភិវឌ្ឍនានា។
ក្រសួងឧស្សាហកម្ម រ៉ែ និងថាមពល បានប្រកាសអនុវត្តគម្រោងជាគំរូនេះចំនួន ៣ ដែលក្នុងនោះមានរោងម៉ាស៊ីនកិនស្រូវចំនួន ២ និងរោងចក្រកៅស៊ូចំនួន ១។ រោងចក្រនីមួយៗអាចផលិតថាមពលពីកាកសំណល់ជីវម៉ាសរវាង ១ ដល់ ៤ មេហ្គាវ៉ាត់។
រដ្ឋមន្ត្រីក្រសួងឧស្សាហកម្ម រ៉ែ និងថាមពល លោក ស៊ុយ សែម បានមានប្រសាសន៍ថា គម្រោងនេះកំពុងតែត្រូវបានអនុវត្តន៍នៅប្រទេសវៀតណាម ឡាវ និងប្រទេស ភូមា ឬ មីយ៉ាន់ម៉ា ដែលសមស្របសម្រាប់ប្រទេសកម្ពុជាដែរ។
លោក ស៊ុយ សែម៖ «បច្ចុប្បន្ននេះតម្រូវការថាមពលកំពុងតែកើនឡើងយ៉ាងខ្លាំងក្នុងវិស័យឧស្សាហកម្ម ដែលជាវិស័យមួយកំពុងតែរួមចំណែកយ៉ាងសំខាន់ក្នុងការអភិវឌ្ឍប្រទេសជាតិ ហើយក៏វិស័យមួយដែលបានរួមចំណែកយ៉ាងខ្លាំងផងដែរ ក្នុងការបញ្ចេញឧស្ម័នផ្ទះកញ្ចក់។ ប្រទេសកម្ពុជា ក្នុងនាមជាប្រទេសអភិវឌ្ឍន៍តិចតួច ចូលរួមចំណែកក្នុងការកាត់បន្ថយឧស្ម័នផ្ទះកញ្ចក់តាមរយៈការអនុវត្តគម្រោងជាច្រើន ដូចជាគម្រោងប្រសិទ្ធភាពថាមពល ការប្រើប្រាស់ថាមពលកកើតឡើងវិញ ផលិតកម្មស្អាត យន្តការអភិវឌ្ឍន៍ស្អាត ការគ្រប់គ្រងសំណល់ ការកាត់បន្ថយការបញ្ចេញឧស្ម័នក្នុងវិស័យព្រៃឈើជាដើម»។
ជាមួយគ្នានេះ មន្ត្រីតំណាងអង្គការអភិវឌ្ឍន៍ឧស្សាហកម្មនៃអង្គការសហប្រជាជាតិ លោក ជិន ប៉េនជួរ (Chin Pen Chua) បានមានប្រសាសន៍ថា៖ «ការអនុវត្តគម្រោងនេះ គឺធ្វើឡើងនៅប្រទេសកម្ពុជា និងប្រទេសមួយចំនួនទៀតនៅអនុតំបន់ទន្លេមេគង្គ ដែលគម្រោងនេះបានគាំទ្រដោយរដ្ឋាភិបាលប្រទេសកូរ៉េខាងត្បូង»។
កន្លងមករដ្ឋមន្ត្រីក្រសួងឧស្សាហកម្ម រ៉ែ និងថាមពល លោក ស៊ុយ សែម បានប្រកាសឲ្យដឹងកាលពីថ្ងៃទី១៣ ខែធ្នូ ឆ្នាំ២០១២ ថា ក្រសួងឧស្សាហកម្ម រ៉ែ និងថាមពល មានផែនការអភិវឌ្ឍន៍វិស័យអគ្គិសនីដល់ប្រជាពលរដ្ឋនៅតាមជនបទនៅឆ្នាំ២០២០ ខាងមុខ។ ផែនការនោះគឺឲ្យប្រជាពលរដ្ឋចំនួន ៨០% នៃប្រជាជនសរុបជាង ១៤លាននាក់ នៅតាមជនបទ មានថាមពលប្រើប្រាស់ពីប្រភពផ្សេងៗ រាប់ទាំងអគ្គិសនី និងអាគុយជាដើម។
របាយការណ៍សិក្សាស្រាវជ្រាវមួយបានឲ្យដឹងថា ប្រជាជននៅលើពិភពលោកចំនួន ១.៤០០លាននាក់ គ្មានអគ្គិសនីប្រើប្រាស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។