គោលនយោបាយផ្តល់សំណងជូនប្រជាពលរដ្ឋអ្នករងផលប៉ះពាល់ស្ដីពីគម្រោងសាងសង់ទំនប់វារីអគ្គិសនីសេសានក្រោម២ នៅខេត្តស្ទឹងត្រែង បន្តឋិតក្នុងភាពចម្រូងចម្រាសនៅឡើយ។ ប្រជាពលរដ្ឋខ្លះនៅតែបដិសេធមិនព្រមចាកចេញពីភូមិចាស់ ទៅតាំងទីលំនៅថ្មី។
ចំណែកប្រជាពលរដ្ឋខ្លះទៀតអះអាងថា ការរុះរើទីលំនៅ និងការជម្លៀសប្រជាពលរដ្ឋទៅទីតាំងថ្មី ធ្វើឲ្យប្រជាពលរដ្ឋជួបបញ្ហាប្រឈមច្រើនផ្នែក និងជាពិសេសប្រាក់សំណងចំណុចខ្លះអ្នកភូមិមិនអាចទទួលយកបាន។
ក្រុមការងារដោះស្រាយសំណងផលប៉ះពាល់ប្រជាពលរដ្ឋ នៃអាជ្ញាធរខេត្តស្ទឹងត្រែង មិនទទួលបានលទ្ធផលល្អទេក្នុងការជួបពិភាក្សាជាមួយប្រជាពលរដ្ឋជាង ១០០គ្រួសារ នៅភូមិក្បាលរមាស កាលពីថ្ងៃទី១១ ខែឧសភា កន្លងទៅ។
នៅក្នុងវេទិកាប្រជុំផ្សព្វផ្សាយស្ដីពីសំណងផលប៉ះពាល់ក្នុងវត្តក្បាលរមាស អ្នកភូមិភាគច្រើនបានធ្វើពហិការដើរចេញជាបន្តបន្ទាប់ ដោយសារតែគោលនយោបាយផ្តល់សំណងចាស់របស់អាជ្ញាធរ មិនបានបំពេញបន្ថែមចំណុចទាមទាររបស់ប្រជាពលរដ្ឋ។
តំណាងប្រជាពលរដ្ឋភូមិក្បាលរមាស លោក លី ប៉ិ រៀបរាប់ថា ផលប៉ះពាល់ទាក់ទិនផ្នូរកប់សពដូនតាប្រជាពលរដ្ឋ និងដីធ្លីស្រែចម្ការមានជីជាតិ និងដំណាំហូបផ្លែផ្តល់ផលរបស់អ្នកភូមិ គឺជាកត្តាសំខាន់ដែលអ្នកភូមិមិនព្រមចាកចេញទៅទីតាំងថ្មី។ លោកបន្តថា តម្លៃសំណងមួយចំនួនក៏ជាហេតុធ្វើឲ្យប្រជាពលរដ្ឋរួញរា និងធ្វើការតវ៉ាមិនព្រមទទួលយកគោលនយោបាយសំណងរបស់ក្រុមហ៊ុន ដើម្បីជម្លៀសប្រជាពលរដ្ឋចេញ។
លោក លី ប៉ិ៖ «គាត់មិនចង់បោះបង់ចោលទេដូនតាគាត់ ដែលត្រូវទឹកលិចលង់ចោលនៅកន្លែងហ្នឹងតែម្តង។ អ៊ីចឹងទេ យកឯកសារចាស់មកនិយាយថាថ្មីធ្វើម៉េច យកខោអាវចាស់ប្រាប់ថាថ្មី អ៊ីចឹងទេនាំឲ្យមានបញ្ហាហ្នឹង។ អត់មានដំណោះស្រាយអ្វីទេ សរុបក្រោយនៅប្រហែលតែ ១០ ទៅ ២០នាក់យ៉ាងច្រើនបំផុត»។
របាយការណ៍របស់អាជ្ញាធរឃុំក្បាលរមាស មានប្រជាពលរដ្ឋជាង ៣០០គ្រួសារ នៅភូមិច្រប់ ភូមិស្រែស្រណុក និងភូមិក្បាលរមាស នឹងត្រូវជម្លៀសទៅតាំងទីលំនៅថ្មី ដោយសារភូមិចាស់ក្លាយជាអាងស្តុកទឹកបន្ទាប់ពីសាងសង់ទំនប់រួច។
មេឃុំក្បាលរមាស លោក វឿន សម្បត្តិ ទទួលស្គាល់ថា វេទិកាពិភាក្សាជាមួយប្រជាពលរដ្ឋឋិតក្នុងភាពចម្រូងចម្រាស ហើយលោកកត់សម្គាល់ថា សូម្បីប្រជាពលរដ្ឋក្នុងភូមិតែមួយ ក៏មិនទាន់ឯកភាពគ្នាទាក់ទិននឹងការទទួលយកគោលនយោបាយសំណងនេះដែរ។ លោកបន្តថា នៅនៅភូមិចំនួនពីរផ្សេងទៀត បានឯកភាពទទួលយកគោលនយោបាយសំណងប្ដូរទីតាំងរួចហើយ៖ «លទ្ធផលមានតែក្បាលរមាស មួយទេដែលមានការចម្រូងចម្រាសបន្តិចតែច្រប់ និងស្រែស្រណុក អត់មានបញ្ហាអ្វីទេ។ ស្តាប់ចុងក្រោយទៅ អ្នកភូមិ និងអ្នកភូមិ អាចទាស់គ្នាដែរមួយថាចេញទៅតាមគោលនយោបាយសំណង ខ្លះថានៅក្រាញមិនចង់ចេញភាគតិច អ៊ីចឹងគេអាចជជែកគ្នា»។
កាលពីចុងឆ្នាំ២០១៣ ប្រជាពលរដ្ឋ ១៩គ្រួសារ នៅភូមិភ្លុក ដែលជាទីតាំងត្រូវការឈូសឆាយធ្វើការដ្ឋានសាងសង់ទំនប់ បានទទួលសំណងជាប្រាក់ទាក់ទងផលប៉ះពាល់ដីធ្លីផ្ទះសម្បែង ផលដំណាំពីក្រុមហ៊ុនសាងសង់ទំនប់លើកដំបូង បន្ទាប់ពីផ្ទុះចេញរឿងពុករលួយរបស់មន្ត្រីអនុគណៈកម្មការដោះស្រាយផលប៉ះពាល់ បានកាត់យកប្រាក់ពីប្រជាពលរដ្ឋអ្នកទទួលប្រាក់សំណងផលប៉ះពាល់នោះ។
មេឃុំស្រែគរ លោក សៀក មេគង្គ កាលពីខែធ្នូ ឆ្នាំ២០១៣ ក៏បានច្រានចោលគោលនយោបាយផ្តល់សំណងនេះ ដោយចាត់ទុកថា ក្រុមហ៊ុនមិនបានអនុវត្តគោលនយោបាយផ្តល់សំណងមានលក្ខណៈទូលាយ មិនច្បាស់លាស់ និងចំណុចខ្លះទៀតតម្លៃសំណងមិនសមស្របតាមតម្លៃទីផ្សារ ដែលប្រជាពលរដ្ឋឯកភាព។ លោកព្រមានថានឹងមិនចូលរួមក្នុងអនុគណៈកម្មការប្ដូរទីលំនៅថ្មីសម្រាប់ការជម្លៀសប្រជាពលរដ្ឋនោះឡើយ។
របាយការណ៍ពិសេសស្ដីពីសំណង និងនយោបាយកែតម្រូវនៃគម្រោងសាងសង់ទំនប់វារីអគ្គិសនីសេសានក្រោម២ ឆ្នាំ២០១១ បង្ហាញថា ភូមិចំនួន៧ ក្នុងឃុំចំនួន៤ រងផលប៉ះពាល់។ ក្នុងនោះប៉ះពាល់ផ្ទះប្រជាពលរដ្ឋជាង ៥០០ផ្ទះនេះ មិនទាន់រាប់បញ្ចូលផ្ទះប្រជាពលរដ្ឋ ៤៨ផ្ទះទៀតនៅភូមិក្របីជ្រំ និងភូមិខ្សាច់ថ្មី ដែលអាចនឹងរកផលប៉ះពាល់ដូចគ្នា។
អភិបាលរងខេត្តស្ទឹងត្រែង និងជាប្រធានអនុគណៈកម្មការដោះស្រាយផលប៉ះពាល់ប្រជាពលរដ្ឋ លោក យ៊ូ បាសិទ្ធ មានប្រសាសន៍បញ្ជាក់ថា តួលេខប្រជាពលរដ្ឋអ្នករងផលប៉ះពាល់អាចកើនឡើងនៅពេលបច្ចុប្បន្ន ក៏ប៉ុន្តែគោលនយោបាយផ្តល់សំណង ជាពិសេសការប្ដូរទីតាំងរស់នៅរបស់ប្រជាពលរដ្ឋទទួលបានលទ្ធផល ៨០ ទៅ ៩០ភាគរយហើយ។ លោកកត់សម្គាល់ថា ការផ្តល់សំណងដទៃទៀតកំពុងឋិតក្នុងគម្រោងផ្សព្វផ្សាយ និងពិភាក្សាជាមួយពលរដ្ឋនៅឡើយ។ លោករំពឹងថា អ្វីៗអាចពិភាក្សាកែសម្រួល ដើម្បីរកដំណោះស្រាយបញ្ចប់បញ្ហាស្ដីពីសំណងជូនប្រជាពលរដ្ឋឲ្យបានសមស្រប។
លោក យ៊ូ បាសិទ្ធ៖ «យ៉ាងណាៗយើងនៅមានពេលគ្រប់គ្រាន់ ព្រោះបញ្ហាដំបូងយើងគិតពីទីតាំង ហើយទីតាំងពីដំបូងមកចម្រូងចម្រាសណាស់ ទើបខ្ញុំបានចុះទៅរហូតមកឃើញថា បានការឯកភាពគ្នាស្រុះស្រួលគ្នាហើយ។ ខ្ញុំគិតថា រឿងនេះវាបត់បែនបានយ៉ាងណាៗ ចាំមើលឲ្យមានអ្វីជាដុំកំភួន ចាំឯកឧត្តមអភិបាលខេត្តកោះប្រជុំរួម យ៉ាងណាជាសិទ្ធិសម្រេចរបស់គាត់»។
ទាក់ទិនករណីនេះដែរ មន្ត្រីសម្របសម្រួលអង្គការបណ្ដាញទន្លេបី លោក មៀច មាន ផ្តល់យោបល់ថា ការពិគ្រោះយោបល់ជាមួយប្រជាពលរដ្ឋអ្នករងផលប៉ះពាល់ជាប្រការចាំបាច់ គឺធ្វើឡើងតាមគោលការណ៍ស្ម័គ្រចិត្ត ដើម្បីចែករំលែកព័ត៌មានជាក់លាក់ស្ដីពីបញ្ហាសំណងនេះ។ លោកបន្តថា ក្រុមហ៊ុន និងរាជរដ្ឋាភិបាល គួរពិចារណាទៅលើតម្លៃទីផ្សារបច្ចុប្បន្ន និងការឯកភាពរបស់ពលរដ្ឋទាក់ទិនសំណងនេះ៖ «អាជ្ញាធរគួរកុំប្រើនូវអំណាច កុំប្រើនូវអ្វីដែលទៅដាក់ការគាបសង្កត់ថា សហគមន៍ត្រូវតែព្រមត្រូវតែស្អី ព្រោះនេះជាគម្រោងផែនការអភិវឌ្ឍន៍ជាតិ យើងមិនគួរប្រើអ៊ីចឹងទេ ដោយសារគម្រោងអភិវឌ្ឍន៍ គឺអភិវឌ្ឍនៅពេលបច្ចុប្បន្នជាអ្នកទទួលផល អ្នកទទួលរ៉ាប់រងទៅនឹងគម្រោងអភិវឌ្ឍន៍ហ្នឹង»។
យ៉ាងណាក្តី លោកនាយករដ្ឋមន្ត្រី ហ៊ុន សែន ធ្លាប់បានបញ្ជាក់ប្រាប់ប្រធានក្រុមហ៊ុនចិន ឡាង ឆាង (Lan chang) សាងសង់ទំនប់វារីអគ្គិសនីសេសានក្រោម២ ឲ្យដោះស្រាយសំណងផលប៉ះពាល់ប្រជាពលរដ្ឋជាមុនសិន មុននឹងចាប់ផ្ដើមសាងសង់ទំនប់។
ទំនប់វារីអគ្គិសនីសេសានក្រោម២ គ្រោងចំណាយថវិកាសាងសង់ប្រមាណជាង ៨ពាន់លានដុល្លារអាមេរិក ប៉ុន្តែការចំណាយនេះអាចកើនឡើងដល់ទៅជិត ១ពាន់លានដុល្លារអាមេរិក។ ប្រសិនដំណើរការសាងសង់បានល្អ គម្រោងនេះនឹងបញ្ចប់នៅឆ្នាំ២០១៧៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។