ប្រជាពលរដ្ឋនៅស្រុករមាសហែក ខេត្តស្វាយរៀង បង្ហាញថាក្រុមហ៊ុនដាំបង្គោលភ្លើង អគ្គិសនីតាមផ្លូវ នៅស្រុកនេះកំពុងធ្វើសកម្មភាពកាប់ដើមឈើធ្វើអាជីវកម្ម ទាំងបង្ខំដោយមិនបានផ្ដល់ដំណឹងជាមុនទេ ហើយប៉ះពាល់ផលដំណាំជាច្រើនរបស់អ្នកភូមិដោយគ្មានសំណង។ ពួកគាត់អំពាវនាវសុំឲ្យអាជ្ញាធរ ពាក់ព័ន្ធបញ្ហានេះចាត់វិធានការ ឲ្យក្រុមហ៊ុនផ្ដល់សំណងការខូចខាតដល់ប្រជាពលរដ្ឋ។
ក្រុមអ្នកភូមិទាំងនោះសម្ដែងការមិនពេញចិត្ត ទៅនិងសកម្មភាពរបស់ក្រុមហ៊ុនថាបានបំផ្លាញផលដំណាំដែលដាំដុះយូរឆ្នាំមិនរើសមុខ ហើយជាប្រាក់ចំណូលបន្ថែមរបស់ប្រជាពលរដ្ឋនៅឯជនបទ។
អ្នកភូមិម្នាក់ លោក នន់ ឈិន រស់នៅភូមិមុនីប្រឹក្សា ឃុំត្រស់ ស្រុករមាសហែក ថ្លែងនៅថ្ងៃទី ១១ មិថុនាថាផលដំណាំដាំដុះតូចធំនៅមុខផ្ទះរបស់អ្នកភូមិ ដូចជា ដើមដូង ត្នោត ឫស្សី ចេក និងស្វាយជាដើម ត្រូវក្រុមហ៊ុនដាំបង្គោលភ្លើងកាប់ផ្ដួល រំលំគ្មានសល់។ លោកបន្តថាប្រជាពលរដ្ឋ ដែលរស់នៅដងតាមដងផ្លូវ ដាំបង្គោលភ្លើងនោះ ខ្លះយំស្រែកសោកស្ដាយទ្រព្យសម្បត្តិរបស់ខ្លួន ហើយបានអង្វរទៅក្រុមអ្នកដាំបង្គោលភ្លើង ឲ្យបញ្ឈប់ធ្វើសកម្មភាព តែពួកគេទាំងនោះមិនបានយកចិត្តទុកដាក់ស្ដាប់ តាមការស្នើសុំរបស់អ្នកភូមិឡើយ៖ «ព្រៃឈើធំៗទៅកាប់បំផ្លាញអស់ហើយ ឥឡូវហ្នឹងគ្នាដាំតាមផ្ទះមកកាប់បំផ្លាញចោលទៀត ហើយអត់មានសំណងអីដល់ប្រជាពលរដ្ឋសោះ អត់មានទទេហ្មង។ វារាល់ថ្ងៃដោយអាស្រ័យផលនៅលើអាដំណាំអស់ហ្នឹងគ្រាន់លក់ដូរ ចិញ្ចឹមជីវិតលក្ខណៈគ្រួសារ ឥឡូវមកកាប់បំផ្លាញបោះគ្នាអស់ហើយ។ អត់មានសុំអត់មានស្នើអត់មាននិយាយអី បាទមកកាប់ព្រួសព្រះយកឡានដឹកកម្មករមកចាក់ ហើយសួរទៅកម្មករថាស៊ីឈ្នួលគេដែរ។ ហើយដល់ស៊ីឈ្នួលគេមិនមកសុំគ្នាផងមកដើរកាប់តែហ្មង ហើយអាមេការមេអីហ្នឹងដូចមិនមែនមកជួបប្រជាពលរដ្ឋមកជួបរដ្ឋអំណាចបង»។
អ្នកភូមិខ្លះទៀតក៏ត្អូញសោកស្ដាយផលដំណាំរបស់ខ្លួនដែលកាប់បំផ្លាញដូចគ្នានេះដែរ ហើយបាន អំពាវនាវសុំឲ្យក្រុមហ៊ុនផ្ដល់ប្រាក់សំណងដំណាំដែល ខូចខាតរបស់ប្រជាពលរដ្ឋវិញ។ អ្នកភូមិនៅស្រុករមាសហែកម្នាក់ទៀត អ្នកស្រី សោ ភា មានមតិថាក្រុមអ្នកដាំបង្គោលភ្លើង ដើរកាប់ដើមឈើរបស់អ្នកភូមិមិនសំចៃដៃ ដោយមិនគិតគួរពីផលប៉ះពាល់របស់ប្រជាពលរដ្ឋដែលជាម្ចាស់ទ្រព្យសម្បត្តិឡើយ។ អ្នកស្រីចាត់ទុកសកម្មភាពរបស់ក្រុមហ៊ុននេះថាជាទង្វើមួយគិតតែពីផលប្រយោជន៍របស់ខ្លួន មិនបានគិតគួរពីទុក្ខលំបាករបស់អ្នកដទៃទេ៖ «ប៉ះពាល់មួយគ្រួសារៗច្រើនណាស់អ៊ុំអើយ ប្រាំ ប្រាំមួយដើម ហើយបើនិយាយពីរឿងឫស្សី ទៀតទាំងគុម្ពហ្មង។ ចាប់កាប់យកៗហើយបើម្ចាស់ផ្ទះអត់បាននៅ ក៏ម្ចាស់អត់ដឹងដែរស្រាប់តែមកដួលពេញផ្ទះហ្មង។ ជីវភាពវាអ្នកស្រែមានតែដំណាំអស់ហ្នឹងហើយបើកាប់ចោលអស់អញ្ចឹងទៅ គ្មានអីលក់ដូរតទៅទៀត ហើយចង់បានផលសំណងអីខ្លះទៅវាកាប់ចោលទទេៗអ៊ីចឹង»។
ទាក់ទងនិងបញ្ហានេះអភិបាលស្រុករមាសហែក លោក ពេញ ជា មានប្រសាសន៍បញ្ជាក់ថា លោកទើបតែទទួលព័ត៌មានពីប្រជាពលរដ្ឋពាក់ពន្ធ និងក្រុមហ៊ុនដាំបង្គោលភ្លើងកាប់ដើមឈើប៉ះពាល់ផលដំណាំរបស់អ្នកភូមិថ្មីៗនេះដែរ ប៉ុន្តែពុំដឹងថាការកាប់នោះប៉ះពាល់យ៉ាងណានៅឡើយទេ។ លោកបញ្ជាក់ថាក្រុមហ៊ុនកាប់ដើមឈើប៉ះពាល់ផលដំណាំរបស់ប្រជាពលរដ្ឋនោះ ជារឿងមិនត្រឹមត្រូវឡើយ ហើយបញ្ហានេះ លោកថានឹងកោះហៅក្រុមហ៊ុនដាំបង្គោលភ្លើងមកសម្របសម្រួល ដើម្បីបញ្ចៀសមិនឲ្យប៉ះពាល់អត្ថប្រយោជន៍របស់អ្នកភូមិ៖ «អត់ទេគាត់ផ្ដល់ដែរ គាត់ផ្ដល់អារឿងគាត់កាត់រំលំដើមរំលំអីគាត់និយាយអ៊ីចឹងដែរ។ ប៉ុន្តែស្រុកបានចុះទៅពិនិត្យហើយ ក្រុមហ៊ុនមកសម្របសម្រួលប៉ុន្តែខ្ញុំអត់ទាន់បានធ្វើការនេះទេ ទើបហ្នឹងបានទទួលថ្ងៃនេះខ្ញុំហ្នឹងហៅក្រុមហ៊ុនខាងអគ្គិសនីហ្នឹងមកធ្វើការសម្របសម្រួលឡើងវិញ។ តែដល់កាប់ទៅអ៊ីចឹងខ្ញុំវាមិនបានដឹងថាក្រុមហ៊ុនហ្នឹងយ៉ាងម៉េចដែរ អញ្ចឹងខ្ញុំអឺ ! ស្អែកឬខាងស្អែកខ្ញុំហ្នឹងធ្វើការសម្របសម្រួលក្រុមហ៊ុនហ្នឹងបាទ !»។
លោក ពេញ ជា មានប្រសាសន៍ថាក្រុមហ៊ុនដាំបង្គោលភ្លើង នោះជារបស់អគ្គិសនីកម្ពុជាមានអាជ្ញាប័ណ្ណពីរដ្ឋាភិបាលដោយស្របច្បាប់ ហើយភ្ជាប់ចរន្តអគ្គិសនី ពីទីរួមខេត្តស្វាយរៀង ឆ្លងកាត់ស្រុករមាសហែកឆ្ពោះទៅស្រុកកំចាយមារ ខេត្តព្រៃវែង។ ក្នុងនោះការតភ្ជាប់បណ្ដាញអគ្គិសនី ឆ្លងកាត់ឃុំក្នុងស្រុករមាសហែកចំនួន៣ គឺ ឃុំអំពិល ឃុំត្រស់ និងឃុំអណ្ដូងត្របែក។ ប្រជាពលរដ្ឋដែលរស់នៅតាមដងផ្លូវនៅស្រុករមាសហែក បង្ហាញថាក្រុមហ៊ុនដាំបង្គោលភ្លើងកាប់ដើមឈើ ប៉ះពាល់ផលដំណាំអ្នកភូមិ តាមដងផ្លូវជាបន្តបន្ទាប់ ហើយភូមិដែលប៉ះពាល់ធ្ងន់ធ្ងរជាងគេមានភូមិ ត្រពាំងបន្ទាយ ភូមិមុនីប្រឹក្សា និងភូមិត្រពាំងស្មាច់ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។