ព្រៃការពាររបស់សហគមន៍សំពង់ ក្នុងខេត្តក្រចេះ កំពុងរងការកាប់បំផ្លាញពីឈ្មួញ និងប្រជាពលរដ្ឋជារៀងរាល់ថ្ងៃ។ សកម្មភាពនេះកើតឡើងខ្លាំងខណៈប្រជាពលរដ្ឋដែលជាអ្នកការពារព្រៃសហគមន៍រវល់ប្រមូលផលស្រែចំការ និងគ្មានថវិកាធ្វើសកម្មភាពការពារព្រៃ។
តំណាងសហគមន៍បានទាមទារស្ថាប័នមានសមត្ថកិច្ចជួយអន្តរាគមន៍ក្នុងរឿងនេះ ប៉ុន្តែសមត្ថកិច្ចស្រុក ពុំទាន់មានសកម្មភាពបង្ក្រាបណាមួយដែលមានប្រសិទ្ធភាពនៅឡើយទេ។
ព្រៃការពារក្នុងដែនជម្រកសហគមន៍សំពង់ ស្ថិតនៅក្នុងភូមិកោះច្បារ ឃុំកោះខ្ញែរ ស្រុកសំបូរ ខេត្តក្រចេះ ជាង ៣៥ភាគនៃព្រៃសរុបលើផ្ទៃដីជាង ២.៤០០ហិកតារ ត្រូវបានក្រុមឈ្មួញ និងប្រជាពលរដ្ឋលួចធ្វើអាជីវកម្ម។
ប្រធានសហគមន៍ការពារព្រៃសហគមន៍សំពង់ លោក ឡេង លី ឲ្យដឹងថា ព្រៃដែលរងការកាប់បំផ្លាញជាប្រភេទឈើប្រណិត ឈើធ្នង់ ឈើផ្ចឹក និងឈើជន្លង់ម្រេចជាដើម។ លោកថា សកម្មភាពនេះកើតឡើងខ្លាំង គឺនៅពេលក្រុមសហគមន៍លោកមិនសូវបានចុះយាមល្បាតដោយរវល់នឹងប្រមូលផលស្រូវ និងគ្មានថវិកាធ្វើសកម្មភាពការពារ៖ «អូ! កាប់ច្រើនណាស់ វាឆ្លៀតឱកាសនៅពេលដែលយើងចូលដល់រដូវច្រូតកាត់ទៀត។ យើងមិនបានដើរទៀងទាត់ វានៅតែលួចឆ្មក់លួចអី ជួនកាលទៅគាត់មានរនុកក្នុងទៀត នៅពេលយើងរៀបចេញដំណើរទៅ គាត់ទាញម៉ូតូមកតាមផ្លូវ មកឃ្លាំមើលទៀត»។
ប្រជាពលរដ្ឋដែលស្ម័គ្រចិត្តការពារព្រៃសហគមន៍មានចំនួនទាំងអស់ ១១នាក់។ ពួកគេតែងតែដើរយាមល្បាតការពារព្រៃយ៉ាងហោចណាស់មួយអាទិត្យម្តង ប៉ុន្តែនៅរដូវប្រមូលផល និងគ្មានថវិកាដូចនេះ ពួកគេមិនសូវបានទៅយាមល្បាតទេ។ ព្រៃសហគមន៍នេះ ត្រូវបានអាជ្ញាធរខេត្តក្រចេះ ផ្តល់ជាព្រៃសហគមន៍កាលពីឆ្នាំ២០១១។
មេឃុំកោះខ្ញែរ ស្រុកសំបូរ ខេត្តក្រចេះ លោក អ៊ុក សាវី ដែលធ្លាប់ចុះយាមល្បាតជាមួយប្រជាពលរដ្ឋឲ្យដឹងថា លោកបានទាមទារឲ្យអាជ្ញាធរថ្នាក់ស្រុកចាត់វិធានការលើរឿងនេះ ប៉ុន្តែមិនឃើញមានប្រសិទ្ធភាពចំពោះរឿងនេះទេ។
លោកមេឃុំឲ្យដឹងទៀតថា កន្លងមកលោកបានធ្វើរបាយការណ៍ និងរាយការណ៍ផ្ទាល់ទៅថ្នាក់ស្រុក នៅតែមានមិនទាន់ឃើញមានចំណាត់ការណាមួយពីថ្នាក់ស្រុក៖ «ខ្ញុំលើក លើកពីបញ្ហាលំបាកហ្នឹង ប៉ុន្តែមិនមានការដោះស្រាយអីសោះ។ ខ្ញុំថា ដើម្បីឲ្យព្រៃគង់វង្ស គឺខាងលើជួយសហការគ្នា ជួយទប់ស្កាត់បទល្មើសហ្នឹង អាហ្នឹងបានធ្វើទៅបាន»។
កាលពីទើបបង្កើតព្រៃសហគមន៍នេះ មានអង្គការក្រៅរដ្ឋាភិបាលមួយបានផ្តល់ជាថវិកាឧបត្ថម្ភដល់ប្រជាសហគមន៍ការពារព្រៃឈើ ប៉ុន្តែគម្រោងនេះបានបញ្ចប់នៅឆ្នាំ២០១៤ ប្រជាពលរដ្ឋមិនសូវបានចុះទៅការពារជាប្រចាំទេ។
ឆ្លើយតបចំពោះបញ្ហានេះ អភិបាលស្រុកសំបូរ ខេត្តក្រចេះ លោក ហេង សុថា ឲ្យដឹងថា លោកបានទទួលរបាយការណ៍ម្តងរួចហើយ ហើយក៏ធ្លាប់ចុះអន្តរាគមន៍ និងក៏បានកំណត់មុខសញ្ញាជនល្មើសផងដែរ។ ទោះមិនបង្ហាញថា មុខសញ្ញានោះជាអ្នកណាក្តី ប៉ុន្តែលោកអភិបាលស្រុកបន្តថា អ្នកកាប់ឈើភាគច្រើនជាពលរដ្ឋក្នុងសហគមន៍នោះតែម្តង៖ «ខ្ញុំនឹងចាត់វិធានការបន្តទៀត។ ឥឡូវខ្ញុំកំពុងប្រជុំនៅសាលាខេត្ត។ ខ្ញុំត្រឡប់ទៅវិញ ខ្ញុំនឹងមានវិធានការ ហៅរដ្ឋបាលព្រៃឈើដើម្បីចុះទៅពិនិត្យជាក់ស្តែង ពិនិត្យមើលសាឡើងវិញទៀត»។
បន្ថែមពីការសុំអន្តរាគមន៍ពីសមត្ថកិច្ចអាជ្ញាធរឲ្យមានចំណាត់ការរឹងមាំនោះ ប្រជាសហគមន៍ក៏បានស្នើសុំឲ្យអង្គការការពារបរិស្ថាននានា ផ្តល់ជំនួយដើម្បីការពារព្រៃសហគមន៍សំពង់នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។