រដ្ឋាភិបាលរួមជាមួយអង្គការមិនមែនរដ្ឋាភិបាលចំនួន១២ អង្គការ និងអាជ្ញាធរខេត្តកំពត រៀបចំប្រារព្ធទិវាអាស៊ានគ្រប់គ្រងគ្រោះមហន្តរាយ និងទិវាអន្តរជាតិកាត់បន្ថយគ្រោះមហន្តរាយលើកទី១០ នៅថ្ងៃទី១៣ តុលា ក្រោមប្រធានបទ ការបោះជំហានរបស់សហគមន៍សម្រាប់ភាពធន់ទៅនឹងគ្រោះមហន្តរាយ។
មន្ត្រីជាន់ខ្ពស់រដ្ឋាភិបាលទទួលបន្ទុកគ្រប់គ្រងគ្រោះមហន្តរាយ បានអំពាវនាវក្នុងឱកាសទិវាអាស៊ានគ្រប់គ្រងគ្រោះមហន្តរាយ និងទិវាអន្តរជាតិកាត់បន្ថយគ្រោះមហន្តរាយលើកទី១០ ឲ្យប្រជាពលរដ្ឋទាំងអស់ចូលរួមទប់ស្កាត់គ្រោះមហន្តរាយដែលផ្ដល់ផលវិបាកជាច្រើនដល់ប្រជាពលរដ្ឋ និងសង្គមជាតិ។
ពិធីនេះប្រារព្ធធ្វើឡើងនៅកីឡាដ្ឋានខេត្តកំពត ដែលមានមន្ត្រីរដ្ឋាភិបាល អង្គការមិនមែនរដ្ឋាភិបាល សិស្សានុសិស្ស រួមទាំងតំណាងសហគមន៍មកពីខេត្តនានា ប្រមាណ ១.០០០ (មួយពាន់នាក់) ចូលរួម។
គោលបំណងនៃការប្រារព្ធពិធីទិវានេះឡើង ដើម្បីបង្កើនការយល់ដឹងអំពីការកាត់បន្ថយ និងគ្រប់គ្រងគ្រោះមហន្តរាយឲ្យបាលទូលាយដល់មូលដ្ឋានដោយផ្ដោតលើចំណុចសំខាន់៣ គឺបង្កើនកម្រិតយល់ដឹងក្នុងចំណោមសហគមន៍ ជាពិសេសស្ត្រីនិងកុមារ លើកកម្ពស់សហគមន៍ឲ្យមានភាពធននឹងគ្រោះមហន្តរាយ និងសុវត្ថិភាពឲ្យកាន់ប្រសើរ តាមរយៈតួនាទី ទទួលខុសត្រូវរបស់សហគមន៍ និងអាជ្ញាធរគ្រប់កម្រិត ដើម្បីកាត់បន្ថយហានិភ័យគ្រោះមហន្តរាយ និងចំណុចចុងក្រោយ ជំរុញកិច្ចប្រឹងប្រែង និងបង្កើនភាពមើលឃើញលើតួនាទីរបស់អាស៊ាន និងលើកកម្ពស់វិធីសាស្ត្រក្នុងការកាត់បន្ថយហានិភ័យគ្រោះមហន្តរាយ ចំពោះសាធារណជនទូទៅ។
ថ្លែងក្នុងពិធីនោះ អនុប្រធាននៃគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា ដែលចូលរួមជាគណៈអធិបតី បានចាត់ទុកថាការងារគ្រប់គ្រង និងកាត់បន្ថយគ្រោះមហន្តរាយគឺជាភារកិច្ចរបស់មនុស្សគ្រប់គ្នា៖ « ឥឡូវយើងត្រូវកសាងសមត្ថភាពយល់ដឹងទៀតផ្សព្វផ្សាយបញ្ហានឹង។ កាត់បន្ថយយ៉ាងម៉េច កាត់បន្ថយទំនប់មួយដែលទឹកវាហៀរឲ្យវាទាបទៅវិញ រឿងជាការកាត់បន្ថយមួយហើយ។ សំខាន់យល់ដឹងពីបញ្ហាគ្រោះមហន្តរាយនេះឲ្យបានស៊ីជម្រៅ ផ្សព្វផ្សាយទាំងធម្មជាតិ ទាំង មនុស្សទាំង ការប្រែប្រួលអាកាសធាតុឲ្យបានដល់លោកតាលោកយាយទាំងអស់ ប្រជាជន ជាពិសេសក្មេងៗ។ ក្រៅពីនោះកាត់បន្ថយជាក់ស្ដែងទៅទៀតទៅលើការបង្វែរទិសទឹក វាទៅត្រង់ណា ខ្យល់ព្យុះវាទៅត្រង់ណា យើងជ្រកពួនត្រង់ណា យើងត្រៀមទៅណា យើងគេចវេះទៅណា យើងជញ្ជូនអ្នកណាមុន ស្ត្រីនិងកុមារ ចាស់ជរា ចាស់មានអាយុច្រើន អ្នកពិការ និងមេមាយមេព្រៅ គ្រោះមហន្តរាយកើតឡើង អ្នកនឹងហើយរងគ្រោះជាងគេ » ។
លោកឲ្យដឹងថាចាប់តាំងពីឆ្នាំ២០០០ មកទល់ពេលនេះគ្រោះមហន្តរាយធម្មជាតិ នៅកម្ពុជាបានបំផ្លាញទ្រព្យសម្បត្តិខូចខាតគិតជាទឹកប្រាក់អស់ជិត ២ពាន់លានដុល្លារ និងមានមនុស្សស្លាប់ជិត ២ពាន់នាក់។
ក្នុងពិធីនេះក៏មានតំណាងសហគមន៍ សិស្សានុសិស្សមកពីខេត្តនានា ចូលរួមផ្ដល់យោបល់ និងផ្លាស់ប្ដូរបទពិសោធដែរ។ អ្នកស្រី យ៉ង សាង៉ាត់ តំណាងសហគមន៍ភូមិបូពឹង ស្រុកកំពង់ស្វាយ ខេត្តកំពង់ធំ ដែលខេត្តអ្នកស្រីធ្លាប់រងគ្រោះដោយសារខ្យល់ព្យុះកេតសានា (Ketsana) កន្លងមក បញ្ជាក់ថាការផ្សព្វផ្សាយរបៀបបង្ការគ្រោះថ្នាក់ មុនគ្រោះធម្មជាតិ អាចកាត់បន្ថយគ្រោះមហន្តរាយបានច្រើន ជាជាងការងារជួយសង្គ្រោះក្រោយគ្រោះធម្មជាតិ៖ «ទាក់ទងការគ្រោះថ្នាក់ ពួកយើងគិតថា ឲ្យពួកគាត់ពេលមានគ្រោះទឹកជំនន់អញ្ចឹង ពួកគាត់នឹងដូចថា មានការត្រៀមជាកាដុង សម្រាប់ការពារ បើផ្ទះមានក្មេងគឺយើងបាំងជារនាំងសម្រាប់កុំឲ្យក្មេងខែទឹកជំនន់ខ្លាចវាធ្លាក់ទឹក»។
ពិធីនេះធ្វើឡើងរយៈពេលពេញមួយថ្ងៃ ដោយមានសម្ដែងចម្រៀងរបស់កុមារស្ដីពីការអប់រំ និងត្រៀមបង្ការគ្រោះមហន្តរាយ រួមទាំងកម្មវិធីសំណួរចម្លើយស្ដីអំពី គ្រោះមហន្តរាយធម្មជាតិដើម្បីចាប់យករង្វាន់ ជាការកម្សាន្តផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។