គណៈកម្មាធិការជាតិគ្រប់គ្រងគ្រោះមហន្តរាយគ្រោងរៀបចំទិវាអន្តរជាតិកាត់បន្ថយគ្រោះមហន្តរាយ និងទិវាអាស៊ានគ្រប់គ្រងគ្រោះមហន្តរាយ នៅថ្ងៃទី១៣ តុលា នៅឯពហុកីឡាដ្ឋានខេត្តកំពត។
តាមគម្រោងទិវាអន្តរជាតិនោះ នឹងមានមនុស្សចូលរួមប្រមាណ ១ពាន់នាក់ មកពីអង្គការសង្គមស៊ីវិល ដែលធ្វើការពាក់ព័ន្ធនឹងការកាត់បន្ថយគ្រោះមហន្តរាយ និងមានតំណាងរដ្ឋាភិបាល គឺលោក ញឹម វណ្ណដា ជាទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយចូលរួមក្នុងពិធីនោះ។
ក្នុងលិខិតអញ្ជើញអ្នកសារព័ត៌មានមួយ ដែលវិទ្យុអាស៊ីសេរី ទទួលបានកាលពីថ្ងៃសៅរ៍ ទី១១ តុលា ឲ្យដឹងថា ទិវាអន្តរជាតិកាត់បន្ថយគ្រោះមហន្តរាយ និងទិវាអាស៊ានគ្រប់គ្រងគ្រោះមហន្តរាយនៅឆ្នាំនេះធ្វើឡើងក្រោមប្រធានបទ «ការបោះជំហានរបស់សហគមន៍សម្រាប់ភាពធន់ទៅនឹងគ្រោះមហន្តរាយ»។
គោលបំណងសំខាន់នៃព្រឹត្តិការណ៍នេះ ទី១ ដើម្បីបង្កើនកម្រិតនៃការយល់ដឹងក្នុងចំណោមពលរដ្ឋសហគមន៍ ពិសេសស្ត្រីនិងកុមារ អំពីសមាហរណកម្ម ការកាត់បន្ថយហានិភ័យគ្រោះមហន្តរាយ។ ទី២ លើកកម្ពស់សហគមន៍ឲ្យមានភាពធន់នឹងគ្រោះមហន្តរាយ និងសុវត្ថិភាពឲ្យកាន់តែប្រសើរឡើងតាមរយៈការពង្រឹងតួនាទី និងការទទួលខុសត្រូវរបស់សហគមន៍ និងអាជ្ញាធរគ្រប់កម្រិតនៅក្នុងការកាត់បន្ថយហានិភ័យនៃគ្រោះមហន្តរាយ និងទី៣ ជំរុញកិច្ចខិតខំប្រឹងប្រែង និងបង្កើនភាពមើលឃើញលើតួនាទីរបស់អាស៊ាន និងលើកកម្ពស់វិធីសាស្ត្រប្រជាជនមជ្ឈមណ្ឌល (People-Centered) ក្នុងការកាត់បន្ថយហានិភ័យគ្រោះមហន្តរាយចំពោះសាធារណជនទូទៅនៅគ្រប់កម្រិត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។