ប្រជាពលរដ្ឋឈ្មោះ អ៊ឹម សាវី នៅឃុំជ្រៃ បញ្ជាក់ថា ស្រូវប្រាំងក្នុងប្រព័ន្ធជាច្រើនពាន់ហិកតារនៅឃុំជ្រៃ និងឃុំអូរតាគី ត្រូវខូចខាតទាំងស្រុង។ ស្រូវប្រាំងទាំងនោះទទួលបានទឹកស្រោចស្រព ដែលអាចទាញយកមកពីអាងទឹកកំពីងពួយ ប៉ុន្តែនៅពេលដំណាំស្រូវកំពុងល្អ ស្រាប់តែពុំមានទឹកស្រោចស្រពទៅវិញ៖ «បានទឹកត្រឹមតែពីរសា ទឹកវាអស់។ ស្រូវល្អយើងចង់ដាក់ជី ដាក់ទឹក ដល់បានទឹកមកហើយ ទឹកវាអត់គ្រប់គ្រាន់ បានតែកន្លែងខ្លះ។ ក្រៅប្រព័ន្ធវាបរិបូរទៅវិញ ក្នុងប្រព័ន្ធស្រែប្រាំងហ្នឹងវាអត់បើកមកទេ។ លើកមុនគេបង់សេវាថ្លៃទឹក គេថា ឲ្យបានបង់ថ្លៃទឹកឲ្យគេ ១ហិកតារ ៥ពាន់ គេបើកទឹកមកឲ្យហើយ ខ្ញុំក៏ឲ្យគេដែរ គេបើកឲ្យតែបីថ្ងៃទេ»។
ក្រុមកសិករអះអាងថា ស្រូវក្នុង ១ហិកតារត្រូវបង់លុយ ៥ពាន់រៀលទៅឲ្យមន្ត្រីជំនាញ និងអាជ្ញាធរពាក់ព័ន្ធដែលគ្រប់គ្រងអាងកំពីងពួយ ទើបគេបើកបង្ហូរទឹកយកទៅស្រោចស្រពបាន។ ក៏ប៉ុន្តែទឹកដែលគេបើកបង្ហូរចេញពីអាងកំពីងពួយនោះ មិនអាចមានគ្រប់គ្រាន់ដើម្បីយកទៅស្រោចស្រព ស្រែប្រាំងនៅឃុំជ្រៃ និងឃុំអូរតាគី នោះទេ។
ការបើកបង្ហូរយកទឹកពីអាងកំពីងពួយ យកទៅស្រោចស្រពស្រែប្រាំងនៅតាមឃុំចំនួន៥។ ក្នុងនោះមានឃុំភ្នំសំពៅ ឃុំអូរម៉ាល់ ឃុំតាគ្រាម ឃុំអូរតាគី និងឃុំជ្រៃ ប៉ុន្តែឃុំអូរតាគី ឃុំជ្រៃ ខ្វះខាតទឹកស្រោចស្រព ហើយស្រូវរងការខូចខាតស្ទើរទាំងស្រុង។ ឃុំទាំងនេះស្ថិតនៅស្រុកថ្មគោល ក្រុងបាត់ដំបង និងស្រុកបាណន់។
ក្រុមអាជ្ញាធរបញ្ជាក់ថា ការធ្វើស្រែប្រាំងខ្វះទឹក ដោយសារតែការធ្វើស្រូវប្រាំងនៅឆ្នាំនេះបានកើនលើសផែនការ។ តាមផែនការមានជិត ៥ពាន់ហិកតារ ប៉ុន្តែការធ្វើលើសផែនការ លើសរហូតទៅដល់ជាង ១ពាន់ហិកតារ។
កសិករនៅឃុំជ្រៃ និងឃុំអូរតាគី ថ្លែងថា ស្រូវប្រាំងរបស់ពួកគាត់ខូចខាតទាំងស្រុងដោយសារខ្វះខាតទឹកស្រោចស្រព៖ «អាងកំពីងពួយ ដែលធ្លាក់មកហ្នឹង វាអត់គ្រប់គ្រាន់សម្រាប់ប្រជាពលរដ្ឋនៅភូមិដែលកំពុងរងគ្រោះភាពរាំងស្ងួតនៅរដូវប្រាំង វាអត់គ្រប់គ្រាន់ ប្រជាពលរដ្ឋត្រូវការទឹក អ៊ីចឹងទឹកដែលយើងខ្វះខាតនៅឃុំពីរ នៅឃុំជ្រៃ និងឃុំអូរតាគី វាខូចខាតស្រូវទាំងស្រុងតែម្ដង»។
ប្រភពទឹកសម្រាប់ស្រោចស្រពស្រែប្រាំង គឺកសិករទទួលបានពីអាងកំពីងពួយ។ ប៉ុន្តែបច្ចុប្បន្នទឹកនៅក្នុងអាងកំពីងពួយ ត្រូវបានគេបើកបង្ហូរយកទៅស្រោចស្រពស្រែប្រាំងនេះអស់រយៈពេលជាង ១ខែ បណ្ដាលឲ្យគោករាក់ដល់បាតបឹង ពុំមាននៅសល់ទឹកសម្រាប់ស្រោចស្រពបានទៀតទេ។
មេឃុំតាគ្រាម លោក អឹម ប៊ុនយូ បញ្ជាក់ថា កន្លងទៅនេះ អាជ្ញាធរមូលដ្ឋានឃុំតាគ្រាម ទទួលបានគោលការណ៍ពីខណ្ឌរដ្ឋបាលជលផល ឲ្យបិទលូសម្ងាត់ដើម្បីរក្សាទឹកនៅក្នុងអាងកំពីងពួយ កុំឲ្យបាត់បង់ពូជត្រីជាច្រើនប្រភេទដែលកំពុងរស់នៅក្នុងទឹងអាងនោះ៖ «ឥឡូវនេះយើងមានគោលការណ៍ណែនាំពីខាងជលផល ទាក់ទងពីការបិទលូសម្ងាត់វិញ ដើម្បីរក្សាទឹករក្សាពូជត្រីឲ្យនៅខ្លះ។ យើងបើកជាជំហានតាំងពីខែ២ យើងបើក ៦ ទៅ ៧ដង ដើម្បីសង្គ្រោះស្រូវប្រាំងហ្នឹង ស្រោចស្រពបានតែស្រូវនៅជិតក្នុងផែនការរបស់យើង»។
ទោះយ៉ាងណាក៏ដោយ ស្រូវប្រាំងរបស់កសិករជាង ១ពាន់ហិកតារ នៅឃុំជ្រៃ និងឃុំអូរតាគី ដែលរងការខូចខាតនោះ ទំនងមិនអាចជួយស្រោចស្រង់បានទេ ដោយសារគ្មានប្រភពទឹក។
វិទ្យុអាស៊ីសេរី បានព្យាយាមសុំសេចក្ដីបញ្ជាក់បញ្ហានេះពីលោក ឈឹម វិជ្ជរ៉ា ជាប្រធានមន្ទីរកសិកម្ម ប៉ុន្តែពុំអាចទាក់ទងតាមទូរស័ព្ទ។ ចំណែកលោក ឡុង ផលគុណ ប្រធានមន្ទីរធនធានទឹក និងឧតុនិយម ខេត្តបាត់ដំបង បានបដិសេធមិនធ្វើអត្ថាធិប្បាយ ដោយអះអាងថា កំពុងជាប់រវល់។
ទឹកនៅក្នុងអាងកំពីងពួយ ត្រូវគេដឹងថា គ្រប់គ្រងដោយមន្ទីរធនធានទឹក និងឧតុនិយម។ គេកត់សម្គាល់ឃើញថា ការបើកបង្ហូរទឹកពីអាងយកទៅស្រោចស្រូវប្រាំង ប្រៀបបានទៅនឹងការបូមទឹកចេញពីអាង។ នៅពេលទឹកនៅក្នុងអាងរីងរាក់ ហើយក៏នាំគ្នាចាប់យកត្រីតែម្ដង ហើយបញ្ហាកើតមានខុសពីបណ្ដាឆ្នាំកន្លងទៅ។
ប្រជាពលរដ្ឋឈ្មោះ ជន វណ្ណៈ ថ្លែងថា ជាក់ស្ដែងត្រីពូជជាច្រើនប្រភេទដែលរស់នៅក្នុងអាងកំពីងពួយ កំពុងហិនហោចដោយសារតែការចូលទៅនេសាទរបស់ប្រជាពលរដ្ឋនៅពេលថ្ងៃ និងលួចឆក់នៅពេលយប់៖ «ខ្ញុំមិនសោកស្ដាយទេនូវការខូចខាតស្រូវរបស់ប្រជាពលរដ្ឋ ប៉ុន្តែសុំសំណូមពរទៅខាងរដ្ឋាភិបាល ជាពិសេសអាជ្ញាធរខេត្ត ឲ្យគាត់រក្សាមច្ឆាជាតិ ដែលនៅក្នុងអាងកំពីងពួយហ្នឹង កុំឲ្យមានពួកជនឆ្លៀតឱកាសនិយមចូលទៅឆក់រាល់យប់ ឃុបឃិតជាមួយអាជ្ញាធរដែនដី។ ផលស្រូវដែលខូចខាតហ្នឹង វាគ្រោះធម្មជាតិ ទោះបីស្ដេច ទេវតា ក៏មិនអាចជួយបានដែរ។ យើងមិនបន្ទោសរដ្ឋាភិបាលទេ ប៉ុន្តែយើងសង្កត់ធ្ងន់លើមច្ឆាជាតិ សុំឲ្យអាជ្ញាធររក្សាមច្ឆាជាតិហ្នឹងឡើងវិញ ព្រោះគាត់នាំគ្នាឆក់យកមកលក់ឲ្យខ្ញុំ ធំណាស់ ប្រហែល ៤គីឡូ គាត់លក់ឲ្យខ្ញុំ ៣ម៉ឺនរៀល»។
យ៉ាងណាក៏ដោយគេកត់សម្គាល់ឃើញថា ការបើកបង្ហូរទឹកចេញពីអាងកំពីងពួយ យកទៅស្រោចស្រពស្រូវប្រាំងជាច្រើនពាន់ហិកតារ រហូតដល់ស្ទើរអស់ទឹកពីអាងនេះ គឺធ្វើឡើងដោយមានការកុងកាច់គ្នា រវាងស្ថាប័នជំនាញពីរ។ ក្នុងនោះមានខណ្ឌរដ្ឋបាលជលផល ដែលជាអ្នកអភិរក្សពូជនៅក្នុងអាង និងមន្ទីរធនធានទឹកនិង ឧតុនិយម ដែលជាអ្នកគ្រប់គ្រងទឹកនៅក្នុងអាង។ មតិប្រជាពលរដ្ឋខ្លះលើកឡើងថា ការខ្វះខាតទឹក ស្រោចស្រពស្រូវប្រាំងជាច្រើនពាន់ហិកតារ គឺកើតឡើងដោយសារមេឃគ្មានភ្លៀង និងការខ្វះខាតប្រព័ន្ធធារាសាស្ត្រនៅក្នុងខេត្តតែប៉ុណ្ណោះ ហើយបញ្ហានេះអាជ្ញាធរគួររិះរកមធ្យោបាយដោះស្រាយ មិនគួរកុងកាច់គ្នារហូតបើកបង្ហូរទឹកអស់ពីអាងកំពីងពួយ បំផ្លាញពូជត្រីដូច្នេះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។