អ្នកជំនាញខាងបរិស្ថានអន្តរជាតិ បានលើកឡើងថា ប្រទេសកម្ពុជា អភិវឌ្ឍប្រទេស រដ្ឋាភិបាលគិតពីបញ្ហាការបង្កើតមុខរបរ សហគ្រាសនានា ធ្វើយ៉ាងណាឲ្យមានផលប្រយោជន៍ពីគោលការណ៍អភិវឌ្ឍន៍នោះ រដ្ឋាភិបាលមិនសូវគិតពីបញ្ហាប៉ះពាល់បរិស្ថានប៉ុន្មានទេ។
បញ្ហានេះ ជារឿងគួរឲ្យព្រួយបារម្ភ ដែលទាមទារឲ្យរដ្ឋាភិបាល និងប្រជាពលរដ្ឋទាំងអស់ត្រូវចេះការពារបរិស្ថានឲ្យបានទាំងអស់គ្នា។
អ្នកជំនាញខាងបរិស្ថានអន្តរជាតិ បានឲ្យដឹងនៅថ្ងៃទី២៣ ឧសភា ថា ការអភិវឌ្ឍប្រទេសរបស់កម្ពុជា ដែលនឹងធ្វើឲ្យប៉ះពាល់បរិស្ថានខ្លាំងជាងគេ គឺការអភិវឌ្ឍលើវិស័យឧស្សាហកម្មនិស្សារណកម្ម ដែលបញ្ហានេះកំពុងកើតមាននៅក្នុងប្រទេសមួយចំនួនរួចហើយនៅលើសកលលោក។
អ្នកគ្រប់គ្រងកម្មវិធី និងអ្នកជំនាញជាន់ខ្ពស់ផ្នែកទឹក និងបរិស្ថាននៃអង្គការពិគ្រោះយោបល់អន្តរជាតិ នីរ៉ាស់ (Niras) លោកបណ្ឌិត ក្លាស់ សេនស្រ្តូម (Klas Sandstrom) មានប្រសាសន៍ថា ប្រទេសមួយចំនួននៅលើសកលលោកបានអភិវឌ្ឍប្រទេសគិតពីផលប្រយោជន៍ជាមុន មិនបានគិតពីផលប៉ះពាល់បរិស្ថានទេ។ លោកបញ្ជាក់ថា សម្រាប់ការអភិវឌ្ឍនៅកម្ពុជា ក៏មានលក្ខណៈស្រដៀងគ្នាដែរ។
បន្ថែមពីលើនេះទៀត លោកបញ្ជាក់ថា ផលប៉ះពាល់បរិស្ថានខ្លាំងជាងគេនៅកម្ពុជា ក្នុងពេលខាងមុខនោះ គឺការអភិវឌ្ឍលើធនធានរ៉ែ។
ការលើកឡើងដូច្នេះ នៅក្នុងកិច្ចពិភាក្សាមួយដែលមានយុវជនប្រមាណ ៥០នាក់ ចូលរួម ដែលរៀបចំឡើងដោយអង្គការអភិវឌ្ឍន៍ធនធានយុវជន (YRDP) នៅថ្ងៃទី២៣ ឧសភា នាទីក្រុងភ្នំពេញ។
វិទ្យុអាស៊ីសេរី មិនអាចទាក់ទងមន្ត្រីក្រសួងបរិស្ថាន ដើម្បីសុំបំភ្លឺអំពីបញ្ហានេះបាននៅឡើយទេ នៅថ្ងៃទី២៣ ឧសភា។
ទោះបីជាយ៉ាងណាក៏ដោយ ក្រុមយុវជនបានលើកឡើងថា រដ្ឋាភិបាលបានផ្ដល់សិទ្ធិវិនិយោគឲ្យទៅក្រុមហ៊ុនឯកជន លើវិស័យឧស្សាហកម្មនិស្សារណកម្ម រដ្ឋាភិបាល ឬក្រុមហ៊ុនទទួលសិទ្ធិវិនិយោគនោះមិនបានផ្ដល់ព័ត៌មានឲ្យទូលំទូលាយទេ។ ក្រុមយុវជនទាំងនោះបានលើកឡើងថា រដ្ឋាភិបាលធ្លាប់បានប្រកាសថា ក្រុមហ៊ុន ស៊ឺវរ៉ុន (Chevron) របស់សហរដ្ឋអាមេរិក នឹងបូមយកដំណក់ប្រេងដំបូងនៅថ្ងៃទី១២ ខែ១២ ឆ្នាំ២០១២ នៅវេលាម៉ោង១២ ប៉ុន្តែគម្រោងនេះត្រូវបានបរាជ័យទៅវិញ។
និស្សិតផ្នែកទំនាក់ទំនងអន្តរជាតិ និងវិទ្យាសាស្ត្រនយោបាយនៃសកលវិទ្យាល័យខេមរៈ ឈ្មោះ ម៉ី វុទ្ធី មានប្រសាសន៍ថា ជារឿងសំខាន់ណាស់ដែលរដ្ឋាភិបាលត្រូវបង្ហាញអំពីគម្រោងអភិវឌ្ឍន៍លើវិស័យឧស្សាហកម្មនិស្សារណកម្មនេះ ដើម្បីជៀសវាងពីរឿងប្រព្រឹត្តអំពើពុករលួយ និងការពារបរិស្ថាន។
និស្សិតនៃសកលវិទ្យាល័យភូមិន្ទភ្នំពេញ ឈ្មោះ ជា គីរ៉ា បានសម្ដែងការព្រួយបារម្ភថា ការអភិវឌ្ឍលើវិស័យឧស្សាហកម្ម និងនិស្សារណកម្មនេះ កម្ពុជា នឹងមានបញ្ហាច្រើនទៀតក្រៅពីបញ្ហាបរិស្ថាន ទោះបីជារដ្ឋាភិបាលកំពុងធ្វើសេចក្ដីព្រាងច្បាប់ស្ដីពីការគ្រប់គ្រងប្រេងកាត និងឧស្ម័ន និងច្បាប់ស្ដីពីការយកពន្ធលើប្រាក់ចំណូលប្រេងកាត និងឧស្ម័នក្ដី។
របាយការណ៍របស់អាជ្ញាធរប្រេងកាតកម្ពុជា បានឲ្យដឹងថា កម្ពុជា មានអាងសិលាកម្ទេចកំណចំនួន៨ ដែលអាចមានសក្ដានុពលប្រេងកាត។ ហើយកម្ពុជា បានខួងរុករកប្រេងកាតជាលើកដំបូងបង្អស់នៅឆ្នាំ១៩៧២។
ប្រទេសកម្ពុជា មាន ៦ប្លុក នៅដែនសមុទ្រ ១៩ប្លុកនៅដែនគោក និង ៤តំបន់នៅតំបន់ទាមទារដែនសមុទ្រត្រួតគ្នាកម្ពុជា-ថៃ។ ដែនគោកកម្ពុជា មានចំនួន ១៦ប្លុក ដែលមិនទាន់ផ្ដល់សិទ្ធិឲ្យក្រុមហ៊ុនស្វែងរុករកប្រេងកាតនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។