អង្គការសត្វព្រៃ និងរុក្ខជាតិអន្តរជាតិ ហៅកាត់ថា អេហ្វ.អេហ្វ.អាយ (FFI) ថ្ងៃទី១៦ មិថុនា បើកសិក្ខាសាលាបណ្ដុះបណ្ដាលមន្ត្រីរាជការ និងមន្ត្រីអង្គការពាក់ព័ន្ធបរិស្ថាននានា រយៈពេលពីរថ្ងៃ ស្ដីពីការគណនាសម្រាប់ការអភិវឌ្ឍបៃតងនៅកម្ពុជា។
មន្ត្រីសម្របសម្រួលអង្គការសត្វព្រៃ និងរុក្ខជាតិធម្មជាតិ លោក យស់ កាតង់ ឲ្យដឹងថា សិក្ខាសាលានេះធ្វើឡើងពីរថ្ងៃ គឺចាប់ពីថ្ងៃទី១៦ ដល់ទី១៧ មិថុនា ឆ្នាំ២០១៤ នៅសណ្ឋាគារសាន់វ៉េ រាជធានីភ្នំពេញ។
សិក្ខាសាលានេះ ធ្វើឡើងសំដៅលើកម្ពស់ការរក្សាតុល្យភាពបរិស្ថានឲ្យមាននិរន្តរភាព ក្នុងពេលទាញយកផលប្រយោជន៍ផ្សេងៗពីបរិស្ថាន ដើម្បីអភិវឌ្ឍសេដ្ឋកិច្ចឲ្យរីកចម្រើន។
លោកថា កម្ពុជាសព្វថ្ងៃកំពុងប្រឈមនឹងបញ្ហាបរិស្ថានយ៉ាងធ្ងន់ធ្ងរ ដោយសាររដ្ឋាភិបាលបានទាញយកផលប្រយោជន៍ពីព្រៃឈើ និងធនធានធម្មជាតិផ្សេងៗ ច្រើនហួសហេតុ ហើយមិនបានគិតគូរគ្រប់គ្រងការពារបរិស្ថានបានល្អ និងមិនបានគិតគូរអំពីតុល្យភាព និរន្តរភាពនៃបរិស្ថាន។
លោកថា ដើម្បីរក្សាការអភិវឌ្ឍសេដ្ឋកិច្ចឲ្យបានប្រសើរ ស្របពេលដែលរក្សាតុល្យភាពបរិស្ថានឲ្យមាននិរន្តរភាពផងនោះ រដ្ឋាភិបាលត្រូវតែគិតគូរអំពីនិរន្តរភាពលើមុំ៤ សំខាន់ គឺ៖ សេដ្ឋកិច្ច សង្គម បរិស្ថាន និងវប្បធម៌៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។