ពលរដ្ឋនៅឃុំសំពៅពូន ស្រុកកោះធំ ខេត្តកណ្ដាល ត្អូញត្អែរអំពីការនេសាទខុសច្បាប់កើនឡើងនៅក្នុងរដូវវស្សានេះ។ ពួកគាត់បារម្ភថា ការប្រើឧបករណ៍នេសាទខុសច្បាប់ នឹងធ្វើហិនហោចត្រី។
ពលរដ្ឋនៅឃុំសំពៅពូន ស្រុកកោះធំ ខេត្តកណ្ដាល នៅក្នុងតំបន់ទឹកនៃឃុំនោះ ឱ្យដឹងមានការនេសាទខុសច្បាប់កាន់តែច្រើន ដែលអ្នកនេសាទទាំងនោះប្រើឧបករណ៍ស្បៃមុងក្រឡាល្អិត ឬវៀតណាមហៅថា សៃយ៉ឺន រាប់ពាន់ម៉ែត្រ។
អ្នកភូមិព្រែកសឹង្ហ ឃុំសំពៅពូនមួយរូប គឺលោក កែវ យឿង មានប្រសាសន៍ថា អ្នកនេសាទដែលប្រើមុងក្រឡាល្អិតទាំងនោះ ចាប់យកត្រីទាំងតូចៗសម្រាប់ជាចំណីត្រីឆ្ដោចិញ្ចឹម៖ «សៃយ៉ឺនដាក់ច្រើនណាស់ រាប់ពាន់ខ្សែ។ មួយខ្សែរាប់ពាន់ម៉ែត្រ ហើយរាប់រយកន្លែង។ ឥឡូវកូនត្រីច្រើន វាយកទៅចិញ្ចឹមត្រីឆ្ដោត្រីអី។ ខាងវៀតណាមយកទៅចិញ្ចឹម»។
មន្ត្រីសមាគមការពារសិទ្ធិមនុស្សអាដហុក ប្រចាំខេត្តកណ្ដាល លោក ប្រាក់ សារ៉ាន់ ថ្លែងបញ្ជាក់ថា បទល្មើសនេសាទកំពុងកើតឡើងច្រើនមែននៅក្នុងតំបន់ទឹកឃុំសំពៅពូន ស្រុកកោះធំនោះ៖ «ពួកខ្ញុំប៉ុន្មានបួនដប់នាក់គ្រាន់តែនាំចុះទៅថត ហើយទៅមើលល្មើសជាក់ស្ដែង ឃើញសកម្មភាពកំពុងពង្រាយដាក់បន្ថែម មានទូក មានបង្គោល ដែលគេចងស្បៃសៃយ៉ឺន ហើយណ ស្បៃមុងញឹកហ្នឹងដាក់ស្ទាក់ចាប់យកត្រីអស់ហើយ តាំងពីត្រីពងកូន ត្រីធំតូចអីចូលទាំងអស់ សត្វអីចូលទាំងអស់។ ប្រជាពលរដ្ឋនៅទីនោះ គាត់កំពុងកើតទុក្ខមិនសុខចិត្ត គាត់ខ្វល់»។
ទាក់ទងនឹងការកើនឡើងការនេសាទខុសច្បាប់ឃុំសំពៅពូន ស្រុកកោះធំនេះ ត្រូវបានប្រជាពលរដ្ឋចោទថា មានអាជ្ញាធរពាក់ព័ន្ធប្រព្រឹត្តអំពើពុករលួយស៊ីសំណូក ហើយបើកដៃឱ្យមានការនេសាទខុសច្បាប់។
មេឃុំសំពៅពូន លោក អ៊ុក ស៊្រន បដិសេធចំពោះការចោទប្រកាន់របស់ពលរដ្ឋទាំងនោះ៖ «អាជ្ញាធរឯណាទៅធ្វើបទល្មើសបំពានលេខ ០១ អ៊ីចឹង។ គាត់ចេះតែថាទេ។ អាជ្ញាធរណាប្រាប់ខ្ញុំចំ ខ្ញុំរាវរកឱ្យ។ អត់មានទេ ពួកខ្ញុំមិនធ្វើអ៊ីចឹងទេ។ ប៉ុន្តែបើសិនជាមានព័ត៌មាន ខ្ញុំឱ្យគេស្រាវជ្រាវ»។
លោកមានប្រសាសន៍ទទួលស្គាល់ថា ពិតជាមានករណីបទល្មើសនេសាទនៅតំបន់របស់លោកខ្លះមែន ហើយបញ្ហានេះតែកើតមានជារៀងរាល់ឆ្នាំ៖ «ខ្មែរយើងគ្មាននរណាអាចមានទៅធ្វើអាហ្នឹងទេ។ ប៉ុន្តែបើមានធំ យើងនឹងរៀបចំកម្លាំងទៅបង្ក្រាបហើយ មិនឱ្យធ្វើអីអ៊ីចឹងទេ។ បងប្អូនក្ដាប់ព័ត៌មានមកពីណាចាំខ្ញុំស្រាវជ្រាវជាបន្តទៀត»។
ប៉ុន្តែបញ្ជាក់ថា លោកបានប្រជុំពិភាក្សា និងដាក់វិធានការ ដើម្បីបង្ក្រាបបទល្មើសនេសាទខុសច្បាប់នោះហើយ៖ «ក្រុមការងារប្រជុំហើយ។ ដល់ខែដល់ឆ្នាំ យើងត្រូវចាត់វិធានការ។ ទោះបីជាយ៉ាងណាក៏ដោយ យើងត្រូវបង្ក្រាបឱ្យបាន។ តិចច្រើនអីមាន ប៉ុន្តែយើងបានធ្វើសកម្មភាពរាល់ឆ្នាំទៅ។ ឆ្នាំនេះយើងធ្វើសកម្មម៉ឺងម៉ាត់»។
ស្រុកកោះធំ ជាតំបន់ទំនាបមួយនៅផ្នែកខាងក្រោមទន្លេបាសាក់។ អ្នករស់នៅទីនោះឱ្យដឹងថា ជារៀងរាល់ឆ្នាំ ស្ថានភាពនៅតំបន់ទំនាបនោះជាច្រើន មានរយៈពេល ៦ខែគោក និង ៦ខែទៀតទឹកជន់លិច ដែលបង្កលក្ខណៈសម្រាប់ត្រីពងកូន។ ការកើតមានបញ្ហានេសាទខុសច្បាប់នេះ ធ្វើឱ្យពួកគាត់បារម្ភខ្លាចហិនហោចត្រី។ ពួកគាត់បន្ត ប្រសិនបើអាជ្ញាធរមិនចាត់វិធានការបង្ក្រាបបទល្មើសទេ ពួកគាត់នឹងប្រមូលផ្ដុំទៅបង្ក្រាបការនេសាទខុសច្បាបើទាំងនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។