គ្រោះទឹកជំនន់កំពុងជន់លិចបំផ្លាញផលដំណាំស្រូវរាប់ម៉ឺនហិកតារ លិចលំនៅឋានអ្នកស្រុកជាច្រើនពាន់ខ្នង និងបណ្ដាលឲ្យខូចខាតទ្រព្យសម្បត្តិរបស់អ្នកស្រុកយ៉ាងច្រើនថែមទៀត។ បច្ចុប្បន្នកម្លាំងទឹកដែលហូរចេញពីការបាក់ទំនប់អាងកំពីងពួយនោះ កំពុងបន្តជន់លិចកំណាត់ផ្លូវជាតិលេខ៥ អស់ប្រវែងជាច្រើនគីឡូម៉ែត្រក្នុងខេត្តបាត់ដំបង។
នៅព្រឹកថ្ងៃទី១០ ខែតុលា ឆ្នាំ២០១៣ ជំនន់នេះកំពុងហូរកាត់លើផ្លូវជាតិលេខ៥ បណ្ដាលឲ្យមានស្នាមប្រេះស្រាំ និងស្រុតដី ដាច់ថ្នល់ជាតិជាច្រើនកន្លែងចាប់ពីចំណុចគល់ស្ពានអូរតាគី រហូតដល់ស្រុកថ្មគោល។ បញ្ហានេះបានបង្ខំអោយអាជ្ញាធរខេត្តបាត់ដំបង ប្រកាសបិទមិនឲ្យរថយន្តធំៗធ្វើដំណើរឆ្លងកាត់មួយរយៈសិន ដើម្បីបញ្ចៀសផលប៉ះពាល់និងគ្រោះថ្នាក់ផ្សេងដែលអាចកើតមានឡើង។
ស្នងការនគរបាលខេត្តបាត់ដំបង លោកឧត្ដមសេនីយ៍ ស ថេត ថ្លែងប្រាប់វិទ្យុអាស៊ីសេរី នៅកន្លែងកើតហេតុនោះថា សមត្ថកិច្ចប៉ូលិសបានហាមឃាត់រថយន្តដឹកទំនិញធំៗ ដែលបើកបរឆ្លងកាត់លើកំណាត់ផ្លូវជាតិលេខ៥ មួយរយៈសិន រង់ចាំមើលសភាពការណ៍ទឹកជំនន់ស្រកចុះទៅវិញ។ វិធានការនេះបានធ្វើឡើងគឺដើម្បីការពារគ្រោះថ្នាក់ និងផលប៉ះពាល់ដែលអាចកើតមានឡើងនៅគ្រាដែលទឹកជំនន់ កំពុងហូរកាត់លើផ្លូវជាតិមានចម្ងាយច្រើនគីឡូម៉ែត្រក្នុងខេត្តបាត់ដំបង។
លោក ស ថេត៖ «ឥឡូវនេះគឺទាំងឡានតូចឡានធំគឺយើងបិទ ព្រោះថ្នល់នេះយើងឃើញស្រាប់ហើយ វាអាចផុសលូឡើង អាចគ្រោះថ្នាក់ ចាំមើលសភាពការណ៍មួយថ្ងៃនេះសិន បើសិនអ្នកក្នុងតំបន់នេះមិនអីទេ។ ប៉ុន្តែសុំឲ្យអ្នកមកពីឆ្ងាយឆ្លងកាត់ផ្លូវជាតិលេខ៥ សុំឲ្យផ្អាក និងសុំទោសដើម្បីយើងសម្រួលចរាចរណ៍កុំឲ្យមានការគ្រោះថ្នាក់ផលខូចខាតផ្លូវថ្នល់ផង»។
កងកម្លាំងប៉ូលិសប៉េអឹមនិងកងទាហានជាច្រើនរយនាក់ កំពុងចុះអន្តរាគមន៍នៅតាមបណ្ដោយផ្លូវជាតិលេខ៥។ ក្នុងនោះពួកគេបានធ្វើចរាចរណ៍ និងដាក់បារាសហាមឃាត់រថយន្តជាច្រើនកន្លែងមិនអោយរថយន្តធ្វើដំណើរឆ្លងកាត់។ ការធ្វើដំណើរឆ្លងកាតពីខេត្តបាត់ដំបង ទៅខេត្តបន្ទាយមានជ័យ ត្រូវបានកាត់ផ្ដាច់ទាំងស្រុកនៅថ្ងៃទី១០ ខែតុលា នេះ។
លោកឧត្ដមសេនីយ៍ ស ថេត បញ្ជាក់ថា កងកម្លាំងសមត្ថកិច្ចចម្រុះច្រើនរយនាក់ កំពុងចាត់វិធានការចុះជួយសង្គ្រោះ និងជម្លៀសប្រជាពលរដ្ឋពីលំនៅឋានដែលលិចទឹកទៅកាន់ទីទួលសុវត្ថិភាព៖ «ជម្លៀសដើម្បីយកទៅដាក់នៅទីទួលសុវត្ថិភាពដូចជានៅវត្តថ្មគោល ប្រមូលផ្គុំឲ្យដឹងចំនួនប្រជាពលរដ្ឋមានប៉ុន្មានគ្រួសារដែលរងផលប៉ះពាល់ដើម្បីត្រៀមចែកសុវត្ថិភាពជូនពួកគាត់ស្រុកបាណន់ នៅវត្តជុំគិរី អាហ្នឹងបែកអ្នកនៅស្រុកបាណន់ ហើយនៅនេះ នៅវត្តជ្រោយម្ទេស និងវត្តថ្មគោល»។
នៅលើដងផ្លូវជាតិលេខ៥ ចាប់ពីចំណុចគល់ស្ពានអូរតាគី រហូតដល់ស្រុកថ្មគោល គេសង្កេតឃើញ ទឹកជំនន់កំពុងហូរកាត់លិចថ្នល់យ៉ាងធ្ងន់ធ្ងរ និងពិបាកក្នុងការធ្វើដំណើរ។ លំនៅឋានអ្នកភូមិនៅអបសងខាងផ្លូវកំពុងរកការលិចលង់អ្នកភូមិ បានជម្លៀសសត្វពាហនៈយកមកដាក់នៅលើចិញ្ចើមថ្នល់ ដែលមានទឹករាក់។ ទ្រព្យសម្បត្តិជាច្រើន ក្នុងនោះមានរោងម៉ាស៊ីនកិនស្រូវជាច្រើនកន្លែង កំពុងរងការជន់លិច និងខូចខាតថែមទៀត។ ក្រុមអ្នកភូមិអោយដឹងថា សន្ទុះទឹកដែលជន់លិចពីការបាក់អាងទឹកកំពីងពួយ បានចាប់ផ្ដើមហូរកាត់លើថ្នល់ជាតិលេខ៥ តាំងពីម៉ោង ២ ទៅ ៣ ទៀបភ្លឺ ថ្ងៃទី១០ ខែតុលា។
អភិបាលខេត្តបាត់ដំបង លោក ប្រាជ្ញ ចន្ទ ដែលដឹកនាំកម្លាំងចុះទៅពិនិត្យស្ថានភាពទឹកជំនន់នោះ គូសបញ្ជាក់ថា ស្ថានភាពជំនន់ទឹកភ្លៀងនៅក្នុងខេត្តបាត់ដំបង បានស្រកចុះទៅវិញហើយ ប៉ុន្តែនៅសល់ទឹកជំនន់ដែលហូរចេញពីអាងកំពីងពួយ។ តាមការប៉ាន់ស្មាន លោកថា កម្លាំងទឹកនេះមានរយៈពេលមួយថ្ងៃមួយយប់ ហើយកំពុងបង្កផលប៉ះពាល់ធ្ងន់ធ្ងរលើផ្លូវថ្នល់។
លោក ប្រាជ្ញ ចន្ទ៖ «ឥឡូវផលប៉ះពាល់ធ្ងន់តំបន់ផ្លូវជាតិលេខ៥ហ្នឹងតែម្ដង ទាំងលើទាំងក្រោម ពីកំណាត់ថ្មគោល រហូតដល់អូរតាគី។ ឥឡូវនេះអាជ្ញាធរកំពុងប្រឹងដឹកជញ្ជូនប្រជាពលរដ្ឋដាក់ទីទួលសុវត្ថិភាព មិនដឹងថា ប៉ុន្មានអីប៉ុន្មានទេ មុនដំបូងយើងដាក់នៅនេះបណ្ដោះអាសន្ន កន្លែងតូចៗ ឥឡូវកន្លែងតូចៗ ត្រូវដឹកជញ្ជូនទៅកន្លែងសុវត្ថិភាពជាងទៀត។ រាប់ពាន់គ្រួសារ ផលប៉ះពាល់ធ្ងន់ដំណាំស្រូវ វាលិចអស់ហើយ ទឹកស្រកទៅបានយើងដឹងថា វាខូចប៉ុន្មានអីប៉ុន្មាន ប៉ុន្តែទ្រព្យសម្បត្តិដែលនៅតាមផ្ទះនៅតាមរោងម៉ាស៊ីន ជាអង្ករប៉ះពាល់ធ្ងន់»។
លោកអភិបាលខេត្តបញ្ជាក់ថា ចំនួនអ្នកគ្រោះស្លាប់ដែលបណ្ដាលមកពីទឹកជំនន់ក្នុងខេត្តបាត់ដំបង មានចំនួនកើនឡើង ១១នាក់។ តាមការប៉ាន់ស្មាន កម្លាំងទឹកដែលហូរចេញពីអាងកំពីងពួយ ជន់លិចផ្លូវជាតិលេខ៥ អាចមានរយៈពេលមួយថ្ងៃមួយយប់ទៀត ទើបអាចស្រកចុះទៅវិញ។ បញ្ហាចំពោះមុខក្រុមអាជ្ញាធរកំពុងចាត់វិធានការជួយសង្គ្រោះអ្នកភូមិដែលមានលំនៅឋានលង់លិចទៅកាន់ទីទួលសុវត្ថិភាពអោយអស់ជាមុនសិន បន្ទាប់មកនឹងពិនិត្យទៅសេវាជំនួយមនុស្សធម៌ជូនពួកគាត់ថែមទៀត។
កាលពីថ្ងៃទី៨ ខែតុលា ក្រុមអាជ្ញាធរចម្រុះខេត្តបាត់ដំបង បានចុះទៅជួយសង្គ្រោះអ្នកភូមិក្មេងចាស់ប្រុសស្រីជាច្រើនរយគ្រួសារជាបន្ទាន់ចេញពីលំនៅឋានទៅកាន់ទីទួលសុវត្ថិភាព ក្រោយពីទឹកជំនន់ នៅក្នុងអាងកំពីងពួយ ហូរយ៉ាងគំហុកកាត់លើខ្នងទំនប់មិនអាចទប់ស្កាត់បាន។ បន្ទាប់មកទៀត ពួកគេបានសម្រេចយកគ្រឿងចក្រទៅកាយខ្នងទំនប់ទម្លាយទឹកចេញពីអាងដើម្បីកុំឲ្យមានការប៉ះពាល់ធ្ងន់ធ្ងរដល់សំណង់ទ្វារទឹក ប៉ុន្តែរហូតមកដល់ពេលនេះ ខ្នងទំនប់អាងកំពីងពួយ បានបាក់រីកធំឡើងៗ ដែលមានប្រវែងរាប់រយម៉ែត្រ។
ក្រុមអាជ្ញាធរបញ្ជាក់ថា ទោះយ៉ាងណា ផ្ទៃទឹកនៅក្នុងអាងកំពីងពួយ មានការស្រកចុះ ប៉ុន្តែកម្ពស់និងកម្លាំងទឹកដែលហូរចេញពីអាងនោះ កំពុងគំរាមកំហែងលំនៅឋាន ហេដ្ឋារចនាសម្ព័ន្ធផ្លូវថ្នល់ យ៉ាងធ្ងន់ធ្ងរនៅផ្នែកខាងក្រោម ក្នុងភូមិឃុំជាច្រើន ដូចជានៅក្នុងស្រុកថ្មគោល និងស្រុកបាណន់។
គ្រោះធម្មជាតិទឹកជំនន់ដោយសារទឹកភ្លៀងនៅឆ្នាំ២០១៣ នេះ មានស្ថានភាពធ្ងន់ធ្ងរជាងបណ្ដាឆ្នាំមុន។ បច្ចុប្បន្នផលដំណាំស្រូវជាច្រើនម៉ឺនហិកតារកំពុងលិចលង់ ហេដ្ឋារចនាសម្ព័ន្ធផ្លូវថ្នល់ ទាំងផ្លូវជាតិ និងផ្លូវលំនៅតាមភូមិ កំពុងប្រឈមទៅនឹងការខូចខាតធ្ងន់ធ្ងរ លំនៅឋានអ្នកស្រុកជាច្រើនម៉ឺនខ្នង បូករួមទាំងទ្រព្យសម្បត្តិជាច្រើនទៀត រងការខូចខាត ហើយប្រជាពលរដ្ឋរាប់ពាន់គ្រួសារនៅក្នុងខេត្តបាត់ដំបង ត្រូវបាត់បង់ទីជម្រក ក្រោយពីក្រុមអាជ្ញាធរជម្លៀសពួកគាត់ទៅកាន់ទីទួលសុវត្ថិភាពជាបណ្ដោះអាសន្ន។បច្ចុប្បន្នអ្នកភូមិទាំងនោះអាចប្រឈមទៅនឹងការដាច់ស្បៀង និងប៉ះពាល់សុខភាពធ្ងន់ធ្ងរថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។