ប្រជាពលរដ្ឋមួយចំនួនដែលរស់នៅតាមដងស្ទឹងសែន នៃក្រុងព្រះវិហារ កំពុងជម្លៀសក្រុមគ្រួសារនិងសត្វពាហនៈចេញពីលំនៅឋានទៅរកទីទួលសុវត្ថិភាពជាបណ្ដោះអាសន្ន ស្របពេលដែលមានទឹកជំនន់រយៈពេល ៣ថ្ងៃមកនេះ។
អាជ្ញាធរខេត្តព្រះវិហារ ឱ្យដឹងថា ទឹកដែលចាប់ផ្ដើមឡើងតាំងពីថ្ងៃទី២ ខែសីហា បានលិចផ្ទះប្រជាពលរដ្ឋចំនួន ៨០ខ្នង ព្រមទាំងកំពុងគំរាមកំហែងដល់ស្រូវ និងដំណាំកសិកម្មខ្លះទៀត។
គណៈកម្មការគ្រប់គ្រងគ្រោះមហន្តរាយ និងមន្ត្រីជាច្រើនផ្នែកនៃខេត្តព្រះវិហារ កំពុងតាមដានស្ថានភាពទឹកជំនន់នៅក្នុងខេត្តនេះ ព្រមទាំងរៀបចំទីទួលសុវត្ថិភាព ស្បៀងអាហារ ថ្នាំពេទ្យ ដើម្បីជួយសង្គ្រោះដល់ពលរដ្ឋរងគ្រោះដោយទឹកជំនន់ទឹកភ្លៀង ដែលកំពុងកើតមានឡើង។
មន្ត្រីមន្ទីរកសិកម្មឱ្យដឹងថា ចាប់តាំងពីមានទឹកភ្លៀងហូរធ្លាក់ខ្លាំងពីជួរភ្នំដងរែក កាលពីថ្ងៃទី២ ខែសីហា រហូតមកដល់ពេលនេះ ទឹកជំនន់កំពុងលិចស្រូវចំនួនជាង ៥ពាន់ហិកតារ នៅក្នុងស្រុកចំនួន ៣ គឺស្រុកជាំក្សាន្ត ស្រុកគូលែន និងស្រុកឆែប។
ប្រធានមន្ទីរកសិកម្មខេត្តព្រះវិហារ គឺលោក ពឹង ទ្រីដា។ លោកមានប្រសាសន៍កាលពីព្រឹកថ្ងៃអង្គារ ទី៥ ខែសីហា ថា ខេត្តព្រះវិហារ ឆ្នាំនេះ គឺប្រជាកសិករបានធ្វើស្រែលើផ្ទៃដីប្រមាណ ៧ម៉ឺន ៥ពាន់ហិកតារ ក៏ប៉ុន្តែស្រូវចំនួនជាង ៥ពាន់ហិកតារ ក្នុងចំនួននោះកំពុងគំរាមកំហែងដោយទឹកជំនន់។
ចំណែកដំណាំសណ្ដែកសៀង និងអនុផលផ្សេងៗទៀត ប្រមាណជិត ៦ម៉ឺនហិកតារទៀត មិនទាន់ទទួលរងការប៉ះពាល់នៅឡើយទេ ដោយសារស្ថិតនៅតំបន់ខ្ពស់។
មន្ត្រីមន្ទីរកសិកម្មដដែលបញ្ជាក់ថា ស្រូវចំនួនជាង ៥ពាន់ហិកតារនោះ អាចនឹងខូចខាតប្រសិនបើទឹកនៅតែបន្តលិចរយៈពេលយូរ៖ «មកដល់ថ្ងៃ៤ នៅស្រុកជាំក្សាន្ត ទឹកស្រកហើយ នៅខេត្តព្រះវិហារ សង្ឃឹមថាថ្ងៃនេះ ប្រហែលជាស្រក ហើយនៅស្រុកឆែប ទឹកដែលលិចហ្នឹងយើងឃើញស្រកទៅវិញ ឯការប៉ះពាល់វាលិចតែ ១ថ្ងៃ ២ថ្ងៃ អ៊ីចឹងអត់មានប៉ះពាល់ផលស្រូវទេ លើកលែងតែនៅមុខលូ មុខអូរ ប្រហាក់ប្រហែល ២ហិកតារ គឺមានការដាច់ដោចខ្លះ»។
មន្ត្រីការិយាល័យឧតុនិយមនៃមន្ទីរធនធានទឹកខេត្តព្រះវិហារ លោក ខាត់ គឹមសុទ្ធ មានប្រសាសន៍ថា កាលពីថ្ងៃទី២ ខែសីហា ទឹកជំនន់ដោយសារទឹកភ្លៀងនៅក្នុងស្ទឹងសែន មានកម្ពស់ជាង ១២ម៉ែត្រ បណ្ដាលឱ្យភូមិឋានប្រជាពលរដ្ឋតាមតំបន់ទំនាបនៃដងស្ទឹងខ្លះត្រូវលិច។ ក៏ប៉ុន្តែនៅថ្ងៃទី៥ ខែសីហា កម្ពស់ទឹកបានថយចុះមកនៅត្រឹម ១២.០៧ម៉ែត្រវិញហើយ។ ទោះយ៉ាងណាមន្ត្រីឧតុនិយមដដែលមិនទាន់ហ៊ានព្យាករថា តើទឹកជំនន់នឹងបន្តកើនឡើង ឬក៏ថយចុះនៅឡើយទេ ពីព្រោះវាអាស្រ័យទៅលើអាកាសធាតុ មានភ្លៀងទៀតឬក៏អត់?
លោក ខាត់ គឹមសុទ្ធ៖ «ទឹកស្ទឹងសែនអត់ទាន់ហ៊ានថាវាយ៉ាងម៉េច? ប៉ុន្តែគ្រាន់មើលពីម្សិលមិញ មកប្រៀបធៀបជាមួយថ្ងៃនេះ វាថយចុះបន្តិច។ ខ្លាចតែមានសម្ពាធអីណាមកទៀតទៅវាអាចខ្លាំងមកទៀត ខ្ញុំក៏អត់ទាន់ហ៊ានសន្និដ្ឋាន»។
អាជ្ញាធរខេត្តព្រះវិហារ ឱ្យដឹងថា ទឹកជំនន់បណ្ដាលពីភ្លៀងខ្លាំងបានលិចតំបន់ខ្លះរបស់ស្រុកចំនួន ៦ ដូចជាស្រុកឆែប នៅជាប់ព្រំដែនឡាវ ស្រុកជាំក្សាន្ត ស្រុកគូលែន ស្រុករវៀង ស្រុកត្បែងមានជ័យ ស្រុកជ័យសែន និងក្រុងព្រះវិហារ តាំងតែពីថ្ងៃទី២ ខែសីហា មក។ ទឹកជំនន់នេះក្រៅតែពីលិចលង់ស្រូវជាង ៥ពាន់ហិកតារ គឺបានបំផ្លាញផ្លូវលំ និងផ្លូវកៅស៊ូ អស់មួយចំនួនទៀត ក៏ប៉ុន្តែមិនទាន់មានចំនួនមនុស្ស និងសត្វស្លាប់ដោយសារលង់ទឹកនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។