មន្ត្រីក្រសួងធនធានទឹក និងឧតុនិយម បានឲ្យដឹងថា ស្ថានភាពទឹកជំនន់ទន្លេមេគង្គ និងជំនន់ស្ទឹងសែន នៅទន្លេមេគង្គ ខេត្តស្ទឹងត្រែង ក្រចេះ និងព្រះវិហារ បានស្រកចុះ ប៉ុន្តែទឹកបានហូរចុះមកលិចនៅផ្នែកខាងក្រោមនៃទន្លេបាសាក់ និងទន្លេសាបវិញ។
សេចក្ដីជូនដំណឹង ចុះថ្ងៃទី១១ ខែសីហា មានចុះហត្ថលេខា លោក លឹម គានហោ រដ្ឋមន្ត្រីក្រសួងធនធានទឹកបានបង្ហាញថា ទឹកទន្លេមេគង្គក្រោម និងទន្លេបាសាក់ កំពុងបន្តហូរចូលតាមតំបន់ទំនាបលិចទឹកនានា នៅខេត្តព្រៃវែង កណ្ដាល និងតាកែវ ហើយថា តំបន់ទំនាបទាំងនេះ នឹងប្រឈមការលិចលង់ក្នុងពេល ១សប្ដាហ៍ទៀត។ ចំណែកជំនន់ទឹកស្ទឹងសែន នៅខេត្តកំពង់ធំ នឹងបន្តឡើងខ្ពស់ហួសពីកម្រិតត្រូវប្រុងប្រយ័ត្ន។
លោក លឹម គានហោ បន្តថា ដោយសារទឹកបឹងទន្លេសាប បន្តកើនឡើងជារៀងរាល់ថ្ងៃ នាំឲ្យទឹកស្ទឹងសែន ហូរចុះនិងស្រកយឺតៗ ហើយរយៈពេលនៃការលិចលង់ នឹងបន្តអូសពេលចន្លោះពី ៧ ទៅ ១០ ថ្ងៃខាងមុខ។
ផ្តើមពីបញ្ហានេះ ក្រសួងធនធានទឹក បានអំពាវនាវដល់ក្រសួងស្ថាប័នពាក់ព័ន្ធ អាជ្ញាធរដែនដី និងប្រជាពលរដ្ឋ រស់នៅតាមដងទន្លេមេគង្គក្រោម ទន្លេសាប ទន្លេបាសាក់ និងស្ទឹងសែន ត្រូវបង្កើនការប្រុងប្រយ័ត្នខ្ពស់ ដើម្បីចៀសវាងគ្រោះបង្កឡើងដោយទឹកជំនន់។
អនុប្រធាននៃគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា ឲ្យដឹងថា ចំនួនមនុស្សស្លាប់ដោយគ្រោះទឹកជំនន់ទន្លេមេគង្គ មានចំនួន ២០នាក់ គិតត្រឹមថ្ងៃទី១០ ខែសីហា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។