មន្ត្រីអាជ្ញាធរ ឲ្យដឹងថា គិតមកទល់ថ្ងៃទី៥ សីហា មានមនុស្ស ៤នាក់ បានស្លាប់ក្នុងគ្រាមានទឹកជំនន់នៅខេត្តស្ទឹងត្រែង និងខេត្តរតនគិរី។
ជនរងគ្រោះដែលស្លាប់ក្នុងទឹកជំនន់នៅខេត្តស្ទឹងត្រែង មាន ៣នាក់ ក្នុងនោះក្មេង ២នាក់ និងមនុស្សចាស់ម្នាក់។ ចំណែកនៅខេត្តរតនគិរី ជនរងគ្រោះដែលលង់ទឹកស្លាប់ គឺជនជាតិវៀតណាម ជាមេការក្រុមហ៊ុនសម្បទានសេដ្ឋកិច្ចឈ្មោះ ហ័ងអាញ់ លំផាត់។
អភិបាលរងខេត្តស្ទឹងត្រែង លោក យ៊ូ បាសិទ្ធ មានប្រសាសន៍បញ្ជាក់ថា ទឹកជំនន់ទន្លេសេសាន និងទន្លេស្រែពក នៅខេត្តស្ទឹងត្រែង ចាប់ស្រកវិញហើយ ក៏ប៉ុន្តែទឹកបានឡើងនៅទន្លេសេកុង ដែលកំពុងហូរចាក់ទៅទន្លេមេគង្គក្រោម៖ «ស្ទឹងត្រែង ស្រកហើយ តែល្បឿនហូរហ្នឹង គឺខ្លាំង ព្រោះសេកុង ឡើងខ្ពស់មកពីលើមកលិចពីលើមកៗពីសៀមប៉ាង មកពីខាងឡាវ មក។ ថ្ងៃនេះកំពុងបន្តស្រក ថ្ងៃនេះក្មេងជំទង់ម្នាក់អត់ស្គាល់អត្តសញ្ញាណ គឺបានលង់ទឹកស្លាប់។ករណីពីរទៀត ក្មេង១ ចាស់១ គឺរឿងផ្សេងៗគ្នាក្នុងរដូវទឹកជំនន់តែម្តង»។
ចំណែកអភិបាលស្រុកលំផាត់ លោក គង់ ស៊្រុន បញ្ជាក់ដែរថា ទឹកស្រកផុតដងផ្លូវជាតិលេខ៧៦ ដែលបានជន់លិចកាលពីថ្ងៃទី៤ កន្លងទៅ។ លោកបន្តថា អាជ្ញាធរខេត្តបានដឹកនាំជំនួយសង្គ្រោះទៅចែកជូនប្រជាពលរដ្ឋកំពុងស្នាក់នៅបណ្ដោះអាសន្ន នៅទីទួលសុវត្ថិភាពនៅរសៀលថ្ងៃដដែលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។