អ្នកជំនាញផ្នែករ៉ែ និងថាមពល ដែលជាសមាជិករបស់គណៈកម្មាធិការសម្របសម្រួលកម្មវិធីវិទ្យាសាស្ត្រ និងភូគព្ភសាស្ត្រ ប្រចាំតំបន់អាស៊ីអាគ្នេយ៍ និងអាស៊ីបូព៌ា មកពី ១៤ប្រទេស កំពុងជួបពិភាក្សាគ្នារយៈពេល ៤ថ្ងៃនៅខេត្តសៀមរាប ចាប់ពីថ្ងៃទី៩ រហូតដល់ថ្ងៃទី១២ ខែមីនា។
ប្រទេសទាំង១៤ នោះមានដូចជា កម្ពុជា ថៃ ឡាវ វៀតណាម មីយ៉ាន់ម៉ា ម៉ាឡេស៊ី ហ្វីលីពីន សិង្ហបុរី ឥណ្ឌូនេស៊ី ព្រមទាំងប្រទេសជប៉ុន និងកូរ៉េខាងត្បូង។ល។
បណ្ដាប្រទេសប្រជាជាតិអាស៊ីអាគ្នេយ៍ ដែលហៅកាត់ថា អាស៊ាន (ASEAN) ទាំង ១០ប្រទេស រួមជាមួយនឹងប្រទេស ៤ ផ្សេងទៀតនៅតំបន់អាស៊ីបូព៌ា បានបង្ហាញជំហរកាលពីព្រឹកថ្ងៃពុធ ទី៩ ខែមីនា ថា នឹងរួមគ្នាអភិវឌ្ឍសេដ្ឋកិច្ច លើកស្ទួយកម្រិតជីវភាពរបស់ប្រជាពលរដ្ឋនៅក្នុងតំបន់ឲ្យកាន់តែប្រសើរឡើងសម្រាប់អនាគត តាមរយៈការកាត់បន្ថយគ្រោះធម្មជាតិ និងការទាញយកធនធានរ៉ែពីក្រោមដីមកប្រើប្រាស់។
ការបង្ហាញពីជំហររួមគ្នានេះ ធ្វើឡើងនៅក្នុងកិច្ចប្រជុំនៃគណៈកម្មាធិការសម្របសម្រួលកម្មវិធីវិទ្យាសាស្ត្រ និងភូគព្ភសាស្ត្រប្រចាំតំបន់អាស៊ីអាគ្នេយ៍ និងអាស៊ីបូព៌ា ដែលហៅកាត់ថា ស៊ី.ស៊ី.អូ.ភី (CCOP) ដែលកំពុងប្រព្រឹត្តទៅនៅខេត្តសៀមរាប។
រដ្ឋលេខាធិការក្រសួងរ៉ែ និងថាមពល នៃប្រទេសកម្ពុជា គឺលោក សុខ សុខាវ៉ាន់។ លោកបានថ្លែងនៅក្នុងកិច្ចប្រជុំគណៈកម្មាធិការសម្របសម្រួលកម្មវិធីវិទ្យាសាស្ត្រ និងភូគព្ភសាស្ត្រប្រចាំតំបន់អាស៊ីអាគ្នេយ៍ និងអាស៊ីបូព៌ា ថា កិច្ចប្រជុំលើកទី៦៦ នេះ នឹងជជែកអំពីគម្រោងផែនការធំៗស្ដីពីធនធានរ៉ែ និងប្រេងកាត សម្រាប់យកទៅអនុវត្តការងាររបស់គណៈកម្មាធិការអន្តររដ្ឋាភិបាលនៅឆ្នាំក្រោយ ក៏ប៉ុន្តែវាជាឱកាសល្អសម្រាប់កម្ពុជា ដែលទទួលបានបទពិសោធន៍ច្រើនពីបណ្ដាប្រទេសដែលឈានមុខផ្នែកវិស័យរ៉ែ និងថាមពល។ លោក សុខ សុខាវ៉ាន់ បញ្ជាក់ថា បច្ចុប្បន្ន អ្នកជំនាញបានរុករកឃើញធនធានរ៉ែជាច្រើនប្រភេទនៅក្រោមដីនៃប្រទេសកម្ពុជា ដូចជា រ៉ែមាស រ៉ែដែក និងរ៉ែប្រេងកាត ជាដើម ហើយកម្ពុជា កំពុងរៀនសូត្រយកបទពិសោធន៍ពីប្រទេសជាច្រើន ដើម្បីទាញយកធនធានរ៉ែទាំងនោះសម្រាប់ការអភិវឌ្ឍសេដ្ឋកិច្ច ប៉ុន្តែក៏ត្រូវធានាឲ្យបរិស្ថានធម្មជាតិមាននិរន្តរភាព និងធ្វើឲ្យផែនដីនៅមានពណ៌បៃតងដដែល៖ « ធនធាន រ៉ែរបស់ យើង ឥឡូវនេះ គឺបានឈានទៅដល់ការមានកម្រិតនៃការធ្វើអាជីវកម្មរ៉ែ ។ ឥឡូវនេះ ក្រុមហ៊ុនមួយចំនួនបានឈានទៅដល់ការធ្វើអាជីវកម្មហើយ »។
ឯកសារជំនួយស្មារតីរបស់កិច្ចប្រជុំនៃគណៈកម្មាធិការសម្របសម្រួលកម្មវិធីវិទ្យាសាស្ត្រ និងភូគព្ភសាស្ត្រប្រចាំតំបន់អាស៊ីអាគ្នេយ៍ និងអាស៊ីបូព៌ា ឲ្យដឹងថា ក្រុមអ្នកជំនាញផ្នែករ៉ែ និងថាមពល មកពីប្រទេសចំនួន១៤ ក្នុងតំបន់អាស៊ីអាគ្នេយ៍ និងអាស៊ីបូព៌ា នឹងចំណាយពេល ៤ថ្ងៃចាប់ពីថ្ងៃទី៩ រហូតដល់ថ្ងៃទី១២ មីនា ដើម្បីពិភាក្សាគ្នាទៅលើគម្រោងសិក្សាធនធានប្រេងកាត ឧស្ម័នដែលមិនធម្មតា និងកំណត់តំបន់សិលាខ្មៅនៅក្នុងប្រទេសដែលជាសមាជិក។
មន្ត្រីបច្ចេកទេសនៃអគ្គលេខាធិការគណៈកម្មាធិការសម្របសម្រួលកម្មវិធីវិទ្យាសាស្ត្រ និងភូគព្ភសាស្ត្រប្រចាំតំបន់អាស៊ីអាគ្នេយ៍ និងអាស៊ីបូព៌ា លោកបណ្ឌិត អាឌីឆាត ស៊ូរិនឃុម (Adichat Surinkum) បានចាត់ទុកប្រទេសកម្ពុជា គឺជាចំណុចកណ្ដាលនៃគោលដៅពិសេសមួយរបស់សេដ្ឋកិច្ចអាស៊ាន ដែលពោរពេញដោយធនធានរ៉ែប្រេងកាត និងរ៉ែដទៃទៀត។ ធនធានធម្មជាតិដែលកម្ពុជា មាននេះ មិនត្រឹមតែអាចជួយអភិវឌ្ឍសេដ្ឋកិច្ចកម្ពុជា ប៉ុណ្ណោះទេ គឺថែមទាំងអាចជួយដល់សេដ្ឋកិច្ចអាស៊ាន ប្រសិនបើចេះប្រើប្រាស់ និងការពារធនធានធម្មជាតិទាំងនោះឲ្យបានត្រឹមត្រូវ៖ « ដើម្បីការពារធនធានរ៉ែ ព្រមទាំងជៀសវាងមិនឲ្យមានការបំពុលបរិស្ថានដោយសារការធ្វើអាជីវកម្មរ៉ែទាំងនោះផង កម្ពុជា គួរបណ្ដុះបណ្ដាលសមត្ថភាពប្រជាពលរដ្ឋឲ្ យយល់ដឹងថា តើវា នឹងមានការប៉ះពាល់ អ្វីខ្លះ នៅពេល ដែលគេ ជីក និងធ្វើ អាជីវកម្មរ៉ែ ហើយក៏គួរបណ្ដុះបណ្ដាលសមត្ថភាពពលរដ្ឋឲ្យយល់ដឹងអំពីវិធីដ៏ប្រសើរក្នុងការប្រើប្រាស់ធនធានរ៉ែទាំងនោះដែរ »។
គណៈកម្មាធិការសម្របសម្រួលកម្មវិធីវិទ្យាសាស្ត្រ និងភូគព្ភសាស្ត្រប្រចាំតំបន់អាស៊ីអាគ្នេយ៍ និងអាស៊ីបូព៌ា យល់ថា ថ្វីត្បិតតែធនធានរ៉ែ ឧស្ម័ន និងប្រេងកាត មានសារសំខាន់ជួយដល់ការអភិវឌ្ឍសេដ្ឋកិច្ច ក៏ប៉ុន្តែកិច្ចការពារធនធានទឹក សុវត្ថិភាពចំណីអាហារ និងបរិស្ថាន ដែលអាចនឹងប៉ះពាល់ពីការទាញយកធនធានរ៉ែទាំងនោះ ក៏ត្រូវតែគិតគូរឲ្យបានហ្មត់ចត់ដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។